(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងបញ្ជាក់ឱ្យដឹងថា ខ្សែភាពយន្ត «កូនប្រុសក្រោមពន្លឺព្រះចន្ទពេញបូណ៌មី» ថតទើបបានប្រមាណ ៣០% និងបានចំណាយថវិកាអស់ ២.៥លានដុល្លាររួចមកហើយ និងបានត្រៀមប្រើប្រាស់ថវិកា ៦លានដុល្លារដើម្បីថតរឿងនេះ។

សម្តេចតេជោ ហ៊ុន សែន បានថ្លែងយ៉ាងដូចនេះនៅក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យភ្នំពេញអន្តរជាតិ (PPIU) ចំនួនជាង ២ពាន់នាក់ នាព្រឹកថ្ងៃទី១១ ខែតុលា ឆ្នាំ២០២២នេះ។

សម្តេចតេជោ ហ៊ុន សែន បានថ្លែងដូចនេះថា «ខ្ញុំគ្រាន់តែបញ្ជាក់ជូនលោកឯងឱ្យបានច្បាស់ តម្លៃនៃការថតត្រឹមតែ ៣០% អស់ ២លាន ៥សែនដុល្លាររួចហើយ លោកឯង​ត្រូវដឹង ព្រោះរឿងប្រវត្តិសាស្ត្រមួយមិនអាចធ្វើរឿងខ្ជីខ្ជាបាននោះទេ រឿងដ៏ទៃទៀតធ្វើត្រឹមតែ ៣០ ៤០ម៉ឺន ​ឫ៥០ម៉ឺនដុល្លារ អាចចាក់បញ្ជាំងបានរាប់ខែ តែរឿងនេះ​គឺខ្ជីខ្ជាមិនបាននោះទេ ហើយម្យ៉ាងយើងយកតួរ ៣ជំនាន់ [..] គ្រាន់តែនៅពេលនោះយើងអត់មានមធ្យោបាយផ្សេង ដោយប្រើប្រាស់យន្តហោះ ឫរងក្រោះសម្រាប់​ការប្រយុទ្ធនោះទេ»។

សម្តេចតេជោ បានបន្ថែមថា រឿង «កូនប្រុសក្រោមពន្លឺព្រះចន្ទពេញបូណ៌មី» នេះកំពុងតែដំណើរការថត និងត្រៀមថវិកាចំនួន ៦លានដុល្លាអាមេរិក ស​ម្រាប់​បញ្ចប់មួយ​រឿងនេះ ហើយបើមិនគ្រាន់នោះទេ ក៏មានកូនរបស់សម្តេច ឫអ្នកដ៏ទៃក៏អាចចូលរួមបានផងដែរ ដោយមិនមានចាយលុយរដ្ឋនោះទេ ទោះបីក្នុងរឿងនេះ​បានប្រើកងទ័ព​ចន្លោះពី ១៥០០ ទៅ ២០០០នាក់ ដែលត្រូវថតក្នុងរឿងនេះ ក៏សម្តេចត្រូវចេញថវិកាសម្រាប់ឱ្យកងទ័ពដែរ។

សម្តេចតេជោ ហ៊ុន សែន បានបន្ថែមថា រឿងនេះជាដំណាក់កាលប្រវត្តិសាស្ត្រ និងជារឿងពិតដែលនិយាយពីសាច់រឿងរបស់សម្តេច ក្នុងកំឡុងពេលចូលព្រៃ ដែលចូលតាមការ​អំពាវនាវរបស់សម្តេចព្រះនរោត្តម សីហនុ ហើយការតស៊ូរបស់សម្តេច គឺចាប់ផ្តើមពីការទាមទារឱ្យព្រះកូណាបិតា យាងត្រឡប់មកមាតុប្រទេសវិញ។

សម្តេចតេជោ ហ៊ុន សែន បានបន្តថា រឿង«កូនប្រុសក្រោមពន្លឺព្រះចន្ទពេញបូណ៌មី» គឺជារឿងដែលបានរំលេចពីប្រវត្តិសាស្ត្រ និងមែនគ្រាន់តែរំលេចតួអង្គរបស់សម្តេច​មួយនោះទេ ប៉ុន្តែវាបានរំលេចនូវដំណើរជាតិតែម្តង ដោយចាប់ផ្តើមពីគេធ្វើរដ្ឋប្រហារទម្លាក់ព្រះកូណា។ សម្តេចបានគុសបញ្ជាក់ថា រឿងនេះអាចនឹងចាប់ផ្តើម​ធ្វើការចាក់​បញ្ជាំងនៅចូលឆ្នាំក្រោយផងដែរ។

សូមបញ្ជាក់ដែរថា ទាក់ទងនឹងខ្សែភាពយន្ត «កូនប្រុសក្រោមពន្លឺព្រះចន្ទពេញបូណ៌មី» កាលពីថ្ងៃទី០៨ ខែកុម្ភៈ ឆ្នាំ២០២២ ក្នុងឱកាសជួបសំណេះសំណាល និងផ្តល់​អនុសាសន៍​ជាលើកទី២ ទៅដល់អ្នកដឹកនាំសម្តែង អ្នកសម្តែង និងក្រុមការងារផលិតទាំងអស់ សម្តេចតេជោ ហ៊ុន សែន ក៏បានធ្វើការក្រើនរំលឹក ដល់គណៈកម្មការ អ្នកដឹកនាំ អ្នកនិពន្ធរឿង និងអ្នកបច្ចេកទេសថតទាំងអស់ ត្រូវខិតខំបន្តសិក្សាស្រាវជ្រាវឱ្យកាន់តែស៊ីជំរៅថែមទៀត ទាក់ទិនទៅនិងសាច់រឿង និងទីតាំងប្រវត្តិសាស្រ្ត នៃដំណើររឿង តួសំដែងគ្រប់តួអង្គទាំងអស់។

ក្នុងភាពយន្តភាគរឿង កូនប្រុសក្រោមពន្លឺព្រះចន្ទពេញបូរណ៌មី ជារឿងភាគមួយទាក់ទិនទៅ​និងដំណើរជីវិតពិត​របស់សម្តេច និងសម្តេចកិត្តិព្រឹទ្ធបណ្ឌិត ក្នុងសម័យសង្គ្រាម លន់ នល់ រដ្ឋប្រហារទម្លាក់សម្តេចព្រះនរោត្តមសីហនុ ព្រះបរមរតនកោដ្ឋ ការរត់ចូលព្រៃម៉ាកគី សម័យកាលនៃរបបប្រល័យពូជសាសន៍ ប៉ុល ពត ការឆ្លងដែនចូលទៅកាន់ប្រទេសវៀតណាម ដើម្បីស្វែងរកកម្លាំងអ្នក​ស្នេហាជាតិ មករំដោះប្រទេសចេញ ពីរបបប៉ុលពត ការជួបជុំភរិយាសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្រោយថ្ងៃរំដោះ៧មករា ឆ្នាំ១៩៧៩ ពិសេសទាក់ទិនទៅ​និងជីវិតពិតរបស់សម្តេចផ្ទាល់ ចាកចេញពីមាតាបិតាបងប្អូនបង្កើតរបស់សម្តេចពីភូមិកំណើត មកស្វែងរកការសិក្សារៀនសូត្រ នៅរាជធានីភ្នំពេញ ការស្នាក់នៅ​អាស្រ័យជាមួយ​ព្រះសង្ឃក្នុងវត្តនាគវ័ន្ត ដើម្បីការសិក្សាកុំឲ្យល្ងង់ខ្លៅ។

សម្តេចតេជោនាយករដ្ឋមន្រ្តី បន្តដាស់តឿនហើយដាស់តឿនទៀត ដល់គណៈកម្មការដឹកនាំ អ្នកនិពន្ធរឿង និងអ្នកបច្ចេកទេសថត ត្រូវយកចិត្តទុកដាក់ឲ្យបានហ្មត់​ចត់បំផុត ពីតួសំដែងនៃតួអង្គប្រវត្តិសាស្រ្តនិមួយៗ ក្នុងសាច់រឿងកូនប្រុសក្រោមពន្លឺព្រះចន្ទពេញបូរណ៌មី។ ពិសេសតួអង្គមេបញ្ជាការ សំរេច ដែលឆ្លងកាត់នូវធ្វើ​ពលីកម្ម​សាច់ស្រស់ ឈាមស្រស់ ឈ្លងកាត់សមរភូមិរាប់មិនអស់ រហូតធ្លាក់ខ្លួនពិការភ្នែក និងតួអង្គអ្នកគ្រូពេទ្យ រ៉ានី ដែលសំដៅទៅលើសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

គួរជម្រាបថា ក្នុងខ្សែភាពយន្តប្រវត្តិសាស្ត្រនៃការតស៊ូរបស់សម្តេច តេជោ ហ៊ុន សែន ចំណងជើងថា «កូនប្រុសក្រោមពន្លឺព្រះចន្ទពេញបូណ៌មី» មានកញ្ញា ហ៉ិន ច័ន្ទនីរ័ត្ន ជាតួឯកស្រី ខណៈតួឯកប្រុស គឺសម្តែងដោយ លោក ប៉ាន់ ខែមម៉ានូ៕