(ភ្នំពេញ)៖ ទីបំផុតសំបុកគ្រឿងញៀន ស្ថិតនៅតំបន់ត្រពាំងឈូក សង្កាត់ទឹកថ្លា ខណ្ឌសែនសុខ ដែលបានកើតឡើងដូចវែកចកនិងស្ទើ ក្លាយជាជម្ងឺមហារីកទៅហើយនោះ ឥឡូវនេះ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី​ ប្រធានអាជ្ញាធរជាតិប្រយុទ្ធប្រឆាំង គ្រឿងញៀន​ បានដឹកនាំកិច្ចប្រជុំមួយជាមួយអាជ្ញាធរ និងសមត្ថកិច្ចពាក់ព័ន្ធជាច្រើននាក់ ដើម្បីរកយុទ្ធសាស្រ្ត ធ្វើការបង្ក្រាបនិងលុបបំបាត់ បញ្ហាសង្គមមួយនេះ ឲ្យខាងតែបាន។

កិច្ចប្រជុំនេះ បានធ្វើឡើងនៅព្រឹកថ្ងៃទី០៨​ ខែមិថុនា​ ឆ្នាំ២០១៦​នេះ ដោយមានការអញ្ជើញចូលរួមពីអភិបាលរង រាជធានីភ្នំពេញលោក ឃួង ស្រេង ស្នងការរាជធានីភ្នំពេញ នាយឧត្តមសេនីយ៍ ជួន សុវណ្ណ ថ្នាក់ដឹកនាំមេបញ្ជាការអាវុធហត្ថក្រុង តំណាងអយ្យការ អភិបាលខណ្ឌ ស្នងការរង អធិការខណ្ឌ ថ្នាក់ដឹកនាំក្រសួងសុខាភិបាល​ ក្រសួងសង្គមកិច្ច​ អតីតយុទ្ធជន​​និងយុវនីតិសម្បទា ក្រសួងអប់រំ​ អគ្គស្នងការដ្ឋាន នគរបាលជាតិ គណៈកម្មាធិការត្រួតពិនិត្យគ្រឿងញៀន រាជធានីភ្នំពេញ ចៅសង្កាត់ និងមន្រ្តីពាក់ព័ន្ធជាច្រើននាក់ផ្សេងទៀត។

យោងតាមរបាយការណ៍សភាពការណ៍ពីចៅសង្កាត់ទឹកថ្លា​ កម្លាំងសមត្ថកិច្ច​ និងការបកស្រាយរបស់សមត្ថកិច្ច​រួចមក​​ នាយឧត្តមសេនីយ៍​ កែ​ គឹមយ៉ាន​ បានណែនាំគណៈកម្មាធិការត្រួតពិនិត្យ គ្រឿងញៀនរាជធានីភ្នំពេញ ត្រូវបង្កើតគណៈកម្មការត្រួតពិនិត្យគ្រឿងញៀន គ្រប់សង្កាត់ ដើម្បីគ្រប់គ្រង​និងដោះស្រាយបញ្ហាកុំឲ្យរីករាលដាល បញ្ហាគ្រឿងញៀន។

បន្ទាប់មកនាយឧត្តមសេនីយ៍​ កែ​ គឹមយ៉ាន​ បានដាក់ចេញយុទ្ធសាស្រ្ត៤ចំណុចមាន​៖

១.ការពង្រឹងយន្តការផ្សព្វផ្សាយអប់រំ​ ដោយឲ្យមានការចូលរួមពីឱពុកម្តាយ​ អាណាព្យាបាល​ សិស្សានុសិស្ស​ យុវជនកាយរិទ្ធ​ យុវជនកាក បាទក្រហម​ សហភាពសហពន្ធ័យុវជនកម្ពុជា និងអាជ្ញាធរមូលដ្ឋានមានសមត្ថកិច្ច។

២.ការពង្រឹងការងារព្យាបាលស្តារនីតិសម្បទា អ្នកញៀនគ្រឿងញៀនដោយធ្វើការផ្សព្វផ្សាយ ឱ្យបានទូលំទូលាយនូវទីតាំងបំរើសេវា ព្យាបាលស្តារនីតិសម្បទា អ្នកញៀនគ្រឿងញៀន។

៣.ពង្រឹងការអនុវត្តច្បាប់​ បង្រ្កាបអ្នកលក់គ្រឿងញៀន​ និងអប់រំអ្នកប្រើប្រាស់គ្រឿងញៀន​និងណែនាំអោយទៅទទួលយកសេវាព្យាបាល​ និងស្តារនីតិសម្បទា​  និង៤.ពង្រឹងស្ថាបន័​ គ្រប់ស្ថាបន័​ ក្រសួងពាក់ព័ន្ធត្រូវបង្កើតអង្គភាពធ្វើការងារគ្រឿងញៀន៕