(ភ្នំពេញ)៖ តុលាការ​កំពូល​ នៅ​ព្រឹក​ថ្ងៃ​ទី​៨​ ខែ​មិថុនា​ ឆ្នាំ​២០១៦​ បើក​សវនាការ​ជំនុំជម្រះ​សំណុំរឿង​លោក​ ហុង​ សុខហួរ​ អតីត​សមាជិក​ព្រឹទ្ធ​សភា​គណបក្ស​សម​ រង្ស៊ី​ ចំនួន​ពីរ​ករណី​។

លោក​ចៅក្រម​ សឹង​ បញ្ញា​វុឌ្ឈ​ ប្រធាន​ក្រុម​ប្រឹក្សា​ជំនុំជម្រះ​ ថ្លែង​ថា​ សំណុំ​រឿង​ទី​១​ គឺ​ការ​សម្រេច​របស់​សាលាដំបូង​រាជធានី​ភ្នំពេញ​ តម្រូវ​ឲ្យ​លោក​ ហុង​ សុខហួរ​ ប្រគល់​កុំព្យូទ័រ​ដែល​ប្រើប្រាស់​សម្រាប់​បង្ហោះ​ផែនទី​ក្លែង​ក្លាយ​មក​ឲ្យ​តុលាការ​ និង​តម្រូវ​ឲ្យ​មេធាវី​ការពារ​ក្ដី​ប្រគល់​ភស្តុតាង​ទាំងអស់​ មុន​ពេល​សវនាការ​សាជាថ្មី​ ។ សំណុំរឿង​ទី​២​ ការ​សម្រេច​ឃុំ​ខ្លួន​បណ្ដោះ​អាសន្ន​ លើ​លោក​ ហុង​ សុខហួរ​ ដែល​មេធាវី​ការពារ​លោក​ ហុង​ សុខហួរ​ ចាត់​ទុក​ជា​ ខុស​នឹង​នីតិវិធី​ច្បាប់​។

ទោះបី​យ៉ាងណា​ ក្រោយ​ការ​សួរ​ដេញដោល​ តុលាការ​កំពូល​សម្រេច​លើក​ពេល​ប្រកាស​សាលដីកា​ ទៅ​ព្រឹក​ថ្ងៃ​ទី​២២​ ខែ​មិថុនា​ ខាង​មុខ​នេះ​វិញ​។ ​

លោក ហុង​សុខ​ហួរ ជាប់ចោទ​ពី​បទ​ក្លែងបន្លំ​ឯកសារ​សាធារណៈ បទ​ប្រើប្រាស់​ឯកសារ​ក្លែង​សាធារ​ណៈ​ក្លែង និង បទ​ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ ​ដល់​សន្តិសុខ​សង្គម ដែល​ចែង​ឲ្យ​ផ្ដន្ទាទោស​តាម​មាត្រា ៦២៩ មាត្រា ៦៣០ និង​មាត្រា ៤៩៥ នៃ​ក្រមព្រហ្មទណ្ឌ ពាក់ព័ន្ធ​ការ​ក្លែង​សន្ធិសញ្ញា​ព្រំដែន​កម្ពុជា វៀតណាម ឆ្នាំ​១៩៧៩ ត្រង់​មាត្រា​៤ រួច​យក​ឯកសារ​ក្លែង​នេះ ទៅ​បង្ហោះ​ក្នុង​ផេ​ក​ហ្វេ​ស​ប៊ុ​ក​របស់​ លោក សម រង្ស៊ី ដែល​ជា​ដើមចម​នាំ​ឲ្យ​តុលាការ​ចោទប្រកាន់​ លោក សម រង្ស៊ី ពី​បទ​សមគំនិត​ក្នុង​បទល្មើស​នេះ។

បទចោទប្រកាន់​ទាំងនោះ នឹង​ត្រូវ​ផ្ដន្ទាទោស​ដាក់​ពន្ធនាគារ​ចន្លោះ​ពី៥ ទៅ១០ឆ្នាំ៕