(ភ្នំពេញ)៖ លោក ថៃ នរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈ បានប្រាប់អង្គភាព Fresh News នៅថ្ងៃទី០៤ ខែមិថុនា ឆ្នាំ២០១៦នេះថា រាជរដ្ឋាភិបាលកម្ពុជា នឹងមិនព្រងើយកន្តើយឡើយ ប្រសិនជាប្រទេសថៃ ដាក់ល្ខោនខោល ដាក់ជាសម្បត្តិបេតិកភណ្ឌពិភពលោកមែននោះ។ 

ការលើកឡើងរបស់លោក ថៃ នរៈសត្យា អ្នកនាំពាក្យក្រសួងវប្បធម៌នាពេលនេះ ធ្វើឡើងក្រោយពីមានការចុះផ្សាយពីកាសែតបាងកកប៉ុស្តិ៍របស់ថៃ បានដកស្រង់សំដីរដ្ឋមន្ត្រី​​​ក្រសួង​​​វប្បធម៌​ថៃ​​ លោក​ Vira Rojpojchanarat ថា ថៃនឹងយកល្ខោនខោល ​​​​​​​​​ឲ្យ​​ដាក់​ក្នុង​បញ្ជី​​បេតិកភណ្ឌ​ពិភព​លោក​។

លោក ថៃ នរៈសត្យា បានបញ្ជាក់ឲ្យដឹងថា «កម្ពុជាបានរៀបចំបញ្ចី សម្បត្តិបេតិកភ័ណ្ឌពិភពលោក ចំនួន៦មុខ ដើម្បីដាក់ទៅអង្គការយូណេស្កូ នៅក្នុងចំនោម សម្បត្តិបេតិកភ័ណ្ឌ ពិភពលោក ដែលគ្រោងនឹងដាក់នោះ ក៏មានល្ខោនខោលដែរ។ គម្រោងនេះកម្ពុជាបានរៀបចំបញ្ចីឈ្មោះតាំងពីឆ្នាំ២០០៥ មកម្ល៉េះ។ បើប្រទេសថៃដាក់ល្ខោនខោលជាសម្បត្តិ បេតិកភណ្ឌពិភពលោក មែននោះ រាជរដ្ឋាភិបាលកម្ពុជា និងក្រសួងវប្បធម៌ មិនព្រងើយកន្តើយឡើយ ហើយសូមបងប្អូនកុំអាលភ័យពេក ព្រោះថៃគ្រាន់តែមានគ្រោងតែប៉ុណ្ណោះ»។

សម្រាប់ប្រទេសថៃវិញ បានបញ្ជាក់ឲ្យដឹងថា ​​​​​ល្ខោន​ខោលនេះ​​​ជា​​សម្បត្តិវប្បធម៌​ទី​មួយ ស្ថិត​​​ក្នុង​ចំណោម​​​​​​​សម្បត្តិវប្បធម៌​​ទាំង​​​​​៥ ​ដែល​ថៃ​​គ្រោង​​ស្នើ​​​​​​​​​​​ទៅកាន់​អង្គការ​​យូណេស្កូ ឲ្យ​​ដាក់​ក្នុង​បញ្ជី​​បេតិកភណ្ឌ​ពិភព​លោក​ រហូត​ដល់​ឆ្នាំ​២០២១។

​​​​​​​​​​​​​បន្ទាប់​ពី​​​​​ស្នើ​​​ល្ខោន​ខោលដំបូង​គេ​​ក្នុង​ឆ្នាំ​នេះ នៅ​ឆ្នាំ​​​បន្ទាប់​​​​​​​​​ថៃ​នឹង​ស្នើ​ដាក់​កីឡា​ប្រដាល់សេរី​​ Muai Thai, ​ការ​ម៉ាស្សា​​តាម​ប្រពៃណី​, របាំ​​​ NORA និង​​​​​​អាហារ​​​ប្រពៃណី​ថៃ​​ទៀត​។ ​នេះបើ​តាម​​​​​​​​​រដ្ឋមន្ត្រី​​​ក្រសួង​​​វប្បធម៌​ថៃ​​ លោក​ Vira Rojpojchanarat និយាយ​ថា​​​ «ហេតុ​ផល​​​​ទី​មួយ​​ដែល​​គេ​​ជ្រើស​រើស​​​​យក​ល្ខោន​ពាក់​មុខ​​​ ​​ ​​​ដាក់​​មុន​គេ​ ព្រោះ​​វា​​បាន​បង្ហាញ​​ពី​គំនិត​ដ៏​​ឧដុង្គឧត្ដម​នៃ​​វប្បធម៌​ថៃ»។

​​​​ប៉ុន្តែសម្រាប់កម្ពុជាវិញ បានបង្ហាញដោយយោងតាមប្រវត្ថិសាស្រ្តឲ្យដឹងថា ​​​​តាម​​​ជំនឿ​សាសនា​ហិណ្ឌូ​ ​តាំងពីសម័យមុនបាន​​រៀបរាប់​ថា ល្ខោន​​​ពាក់មុខ​ខោល ​​​​​​ជា​​ឈុត​ឆាក​​ក្នុង​រឿង​រាមកេរ្តិ៍​​​​​​​ និយាយ​​ពី​ការ​​ប្រយុទ្ធ​រវាង​​​តួអង្គ​ព្រះរាម ដែល​ជា​អវតារ​របស់​​ព្រះ​វិស្ណុ​ ជា​មួយ​នឹង​តួអង្គ​យក្ស​​ក្រុង​រាពណ៍ ​ដែល​ចាប់​​​​ពង្រត់​​​​ភរិយា​​​​របស់​ព្រះរាម​។ ល្ខោន​ខោលត្រូវ​បាន​គេ​សម្ដែង​​​​​ដំបូង​​​​​​​​ ក្នុង​សម័យ​​អយុធ្យា​ កាល​ពី​​​​​ជា​ច្រើន​​សតវត្ស​មុន។ នេះជាដើមចម ដែលសរបញ្ជាក់ឲ្យឃើញថា ល្ខោន​ខោល ​​គឺជារបស់កម្ពុជា និងជានិមត្តរូបតំណាងឲ្យកម្ពុជាផងដែរ៕