(ភ្នំពេញ)៖ ជាលើកដំបូងសម្រាប់ផលិតកម្ម LD Picture នៅពេលនេះ បានបើកកិច្ចសហការ ​ថតរឿងភាគ ដាក់បញ្ចាំងក្នុង​ស្ថានីយទូរទស្សន៍ PNN ក្នុងម៉ោង​ពិសេស ខណៈដែលកន្លងមក ផលិត​កម្មមួយនេះ ធ្លាប់ផលិតតែរឿងដុំ ដាក់បញ្ចាំងក្នុងរោងភាពយន្ត ដោយទទួលបានការគាំទ្រ យ៉ាងក្រាស់ក្រែល ពីសំណាក់ទស្សនិកជនទូទៅ។ កិច្ចសហការក្នុង​​ការផលិត​រឿង​ភាគ​ខ្មែរ របស់ផលិតកម្ម LD Picture នៅពេលនេះ ត្រូវបានគេមើលឃើញថា ជាជំហានថ្មីមួយទៀត ដើម្បីពង្រីកវិសាលភាព ភាពយន្តខ្មែរ និងជាការពង្រឹងគុណភាព ខ្សែភាពយន្តខ្មែរឲ្យកាន់​តែប្រសើរខ្លាំង​ ស្របទៅនឹងការវិវឌ្ឍន៍​ឥតឈប់ឈរ នៃការរីកលូតលាស់ លើវិស័យភាពយន្តខ្មែរ។

ពិធីសន្និសីទ បើកកិច្ចសហការគ្នា ជាលើកដំបូងនេះ បានធ្វើឡើងនៅក្នុងស្ទូឌីយោ នៃស្ថានីយទូរទស្សន៍ PNN ផ្ទាល់ នៅព្រឹកថ្ងៃទី០៤ ខែមិថុនា ឆ្នាំ២០១៦ នេះ ដោយមានការ​ចូលរួមដឹងឮ និងធ្វើជាសក្ខីភាព ពីសំណាក់លោក ស៊ិន ច័ន្ទសាយ៉ា ប្រធាននាយកដ្ឋានភាពយន្ត និងទស្សនីយភាព នៃក្រសួងវប្បធម៌ និងវិចិត្រសិល្បៈ, លោក លៀក លីដា ចាងហ្វាងផលិតកម្ម LD Picture តារាសម្ដែងល្បីៗ និងក្រុមការងាររបស់ផលិតកម្ម LD Picture ជាច្រើននាក់ ។ ក្នុងនោះ ក្រៅពីជួបជុំប្រកាសជាចំហ ស្ដីពីកិច្ចសហការ​ជាលើកទី១នេះ ផលិតកម្ម LD Picture ក៏បានបង្ហាញនូវឧបករណ៍ ទំនើបថ្មីបំផុត ក្នុងការផលិតរឿង ឲ្យមានគុណភាពខ្ពស់ ស្របតាមស្តង់ដារ ដែលស្ថានីយទូរទស្ស PNN អាចទទួលយកបាន ពេលដាក់បញ្ចាំង ។

លោក ស៊ិន ច័ន្ទសាយ៉ា​ ប្រធាននាយកដ្ឋានភាពយន្ត និងទស្សនីយភាព នៃក្រសួងវប្បធម៌ និងវិចិត្រសិល្បៈ បានថ្លែងថា លោកសូមចូលរួមអប​អរសាទរ ចំពោះកិច្ចសហការ​ផលិតភាពយន្តភាព ពីសំណាក់ផលិតកម្ម LD Picture សម្រាប់ដាក់បញ្ចាំង ក្នុងស្ថានីយទូរទស្សន៍ PNN នៅពេលនេះ និងបានបញ្ជាក់ឲ្យឃើញថា ការរីកចម្រើន​លើ​វិស័យភាពយន្ត កំពុងតែធ្វើដំណើរទៅមុខជាលំដាប់ ។ ជាការពិតរាជរដ្ឋាភិបាល បានដាក់ចេញនូវគោលការណ៍ ឲ្យគ្រប់ស្ថានីយទូរទស្សន៍ទាំងអស់ បញ្ចាំងភាពយន្តខ្មែរ ក្នុងម៉ោងមាស (ពីម៉ោង៧ ដល់ម៉ោង៩យប់) ដើម្បីលើកស្ទួយភាពយន្តខ្មែរ ហើយបើនិយាយ ពីតម្រូវការរឿងភាគនៅសព្វថ្ងៃនេះ គឺក្នុងស្ថានីយទូរទស្សន៍មួយ ត្រូវការ២ភាគ ក្នុង១ថ្ងៃ ហើយដោយសារស្ថានីយ ទូរទស្សន៍យើងមានច្រើន បើយើងគណនាទៅ ក្នុង១ថ្ងៃ មានតម្រូវការពីចន្លោះ៣០​ទៅ៤០ភាគ គ្រប់ទូរទស្សន៍ទាំងអស់។

លោកបន្ថែមថា នេះជាតម្រូវការមួយដ៏ខ្ពស់ សម្រាប់ទីផ្សារភាពយន្តរបស់យើង ដែលជម្រុញឲ្យផលិតករ រួមទាំងតារាសម្ដែង ត្រូវតែបង្កើនការផលិត ឲ្យបានកាន់តែច្រើន ដើម្បីបំពេញទីផ្សារ ដែលកំពុងខ្វះខាតនេះ ។ ប៉ុន្តែអ្វីដែលមានការព្រួយបារម្ភ តើយើងត្រូវធ្វើយ៉ាងម៉េច ដើម្បីឲ្យជោគជ័យ ប្រកបដោយការប្រកួតប្រជែងស្មើភាពគ្នា ? ជាមួយគ្នានេះ​ ការផលិតត្រូវផ្ដោត សំខាន់លើគុណភាព ទាំងតួសម្ដែង រូបភាព សាច់រឿង ការចាត់ចែង និងការផ្សព្វផ្សាយ ដើម្បីធ្វើយ៉ាងណាឲ្យមាន​ភាពទាក់ទាញ ។

លោក ស៊ិន ច័ន្ទសាយ៉ា បន្តថា ថ្ងៃនេះផលិតកម្ម LD Picture បានចំណាយទុនវិនិយោគ លើសម្ភារបច្ចេកទេសយ៉ាងច្រើន ដើម្បីផលិតខ្សែភាពយន្តភាគ ឲ្យមានគុណភាពខ្ពស់​​សម្រាប់ប្រកួតប្រជែង ក្នុងទីផ្សារភាពយន្តក្នុងស្រុក និងក្រៅស្រុក ដាក់បញ្ចាំងក្នុងស្ថានីយទូរទស្សន៍ PNN ។ លោកសូមកោតសរសើរ ចំពោះផលិតកម្ម LD Picture ដែលតែងតែផលិតភាពយន្ត មានគុណភាព មានការទាក់ទាញអ្នកទស្សនា ដោយបានប្រើសម្ភារបច្ចេកទេសថ្មីៗ ធ្វើឲ្យមហាជនខ្មែរ ងាកមកចាប់អារម្មណ៍ទស្សនារឿងខ្មែរ។

ដោយឡែកលោក លៀក លីដា ជាផលិតករ និងជាចាងហ្វាងផលិតកម្ម LD Picture បានថ្លែងថា ផលិតកម្ម LD Picture​ បានងាកមកមើលទីផ្សារភាពយន្តភាគ ដើម្បីជួយជម្រុញរឿងភាគខ្មែរ ឲ្យកាន់តែមានគុណភាពល្អ ដូចប្រទេសជិតខាង ហើយនៅថ្ងៃនេះដែរ ផលិតកម្ម LD Picture បានសហការជាមួយ ទូរទស្សន៍ PNN បានផលិតរឿងភាគ១រួចមកហើយ ដើម្បីត្រៀមដាក់បញ្ចាំង ដោយរឿងនេះ មានចំណងជើងថា «ម្ទេសហឺរ ប៉ះនឹងអំបិលប្រៃ» មានបច្ចេកទេសថត​ទំនើប ដែលផលិតកម្មនឹងបង្ហាញឈុតខ្លះ នៅថ្ងៃនេះ​។

លោកបានបន្តទៀតថា នេះជាលើកទី១ហើយ ដែលផលិតកម្ម បានសហការជាមួយ ស្ថានីយទូរទស្សន៍ PNN ផលិតភាពយន្តភាគ ដើម្បីដាក់បញ្ចាំង ហើយបើទោះបីជាលោក ត្រូវចំណាយ​ទុនច្រើនបន្តិចក្ដី ក៏លោកត្រូវតែសាកល្បងដែរ ក្នុងន័យធ្វើយ៉ាងណាឲ្យភាពយន្តខ្មែរ មានគុណភាពល្អ មានការគាំទ្រច្រើន ។ ចំពោះមូលហេតុ ដែលផលិតកម្ម LD Picture ចាប់ដៃគូជាមួយ ស្ថានីយទូរទស្សន៍ PNN គឺលោកបានមើលឃើញពីសក្ដានុពលដ៏ធំធេង ការគាំទ្រខ្លាំង និងរូបភាពច្បាស់ល្អ កម្រិត Full HD ត្រូវជាមួយនឹងបច្ចេកទេសផលិតរឿង របស់លោកតែម្ដង ។

ទោះបីជាយ៉ាងណា ក្នុងពិធីបើកកិច្ចសហការផលិតរឿងភាគខ្មែរ បញ្ចាំងក្នុងស្ថានីយទូរទស្សន៍ PNN នេះ តារសម្ដែងដែលបានចូលរួមទាំងអស់ បានសំណូមពរដល់ទស្សនិកជន មេត្តាចូលរួមគាំទ្រ លើកស្ទួយវិស័យភាពយន្តខ្មែរ ឲ្យកាន់តែច្រើនជាងនេះ ដើម្បីផលិតករ និងតារាសម្ដែងទាំងអស់ មានកម្លាំងចិត្ត និងផលិតឡើង ឲ្យមានគុណភាពកាន់តែប្រសើឡើងជាងនេះ ។ ខ្មែរត្រូវតែលើកតម្កើងភាពយន្តខ្មែរ ដើម្បីវប្បធម៌ដ៏រុងរឿងរបស់យើងទាំងអស់គ្នា ៕