(ស្វាយរៀង)៖ លោកស្រី ម៉ែន ភក្តី ហុកឡងឌី និងលោក ម៉ែន វិបុល អភិបាលខេត្តស្វាយរៀង និងលោកស្រី ព្រមទាំងកូនចៅ នាថ្ងៃទី១៨ ខែកញ្ញា ឆ្នាំ២០២២ បានចូលរួមបង្សុកូលឧទ្ទិសកុសលជូនដល់បុព្វការីជន ពិសេសឧទ្ទិសកុសលជូនវិញ្ញាក្ខន្ធលោកនាយឧត្តមសេនីយ៍ ហុក ឡងឌី អតីតអគ្គស្នងការនគរបាលជាតិ នៅចេតិយតម្កល់អដ្ឋិធាតុ ស្ថិតក្នុងបរិវេណវត្តតាជៃ ឃុំកំពង់ចំឡង ស្រុកស្វាយជ្រំ ខេត្តស្វាយរៀង។
សូមបញ្ជាក់ថា បុណ្យភ្ជុំបិណ្ឌ ជាពិធីបុណ្យមួយដែលធំជាងគេនៅក្នុងចំណោមពិធីបុណ្យទាំងអស់ចំពោះអ្នកកាន់ព្រះពុទ្ធសាសនា។ ជារៀងរាល់ឆ្នាំនៅពេលដល់ថ្ងៃខែ ដែលត្រូវប្រារព្ធពិធីបុណ្យភ្ជុំបិណ្ឌគ្រប់បងប្អូនកូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយតែងតែធ្វើដំណើរទៅជួបជុំគ្នា ជាពិសេសឪពុកម្ដាយនៅស្រុកកណើត ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់នៅវត្តអារាម។ ទាំងនេះគឺជាទម្លាប់មួយដែលគេនិយមធ្វើតៗគ្នារបស់ជនជាតិខ្មែរជាយូរមកហើយ។
នៅក្នុងឱកាសនៃពិធីបុណ្យភ្ជុំបិណ្ឌ និងកាន់បិណ្ឌទី៨នេះ លោកស្រី ម៉ែន ភក្ដី ហុកឡងឌី និងលោកអភិបាលខេត្ត លោក ហ៊ុន ម៉ានិត ត្រូវជាកូនប្រសារ បានប្រគេនបច្ច័យសម្រាប់កសាងវត្តចំនួន១,៧៥០ដុល្លារ បច្ច័យសម្រាប់ប្រគេនព្រះសង្ឃចំនួន៧០០,០០០រៀល និងទេយ្យទានមានដូចជាអង្ករ៩បាវធំ ទឹកដោះគោ៤កេះធំ ត្រីខ៤កេះធំ មី៤កេះធំ ទឹកសុទ្ធវីតាល់ និងសម្ភារផ្សេងៗទៀត ព្រមទាំងបានជូនថវិកា និងសារុង ក្រមា ដល់លោកយាយលោកតា ប្រជាពលរដ្ឋចំនួន១០០នាក់ ក្នុងម្នាក់ៗទទួលបានថវិកា៤០,០០០រៀល និងជូនថវិកាដល់កម្លាំងមានសមត្ថកិច្ច កម្លាំងប្រជាការពារចំនួន១៥នាក់ ម្នាក់ៗទទួលបានសារុង ក្រមា និងថវិកា៨០,០០០រៀលផងដែរ៕
