(ស្វាយរៀង)៖ លោក កែរ រដ្ឋា ទីប្រឹក្សាក្រសួងសុខាភិបាល និងជាប្រធានក្រុមការងារចុះជួយសង្កាត់ស្វាយរៀង តំណាងលោកស្រី ម៉ែន សំអន នាព្រឹកថ្ងៃទី១៨ ខែកញ្ញា ឆ្នាំ២០២២ បាននាំទេយ្យទានប្រគេនថ្វាយព្រះសង្ឃចំនួន២វត្ត នៅក្នុងសង្កាត់ស្វាយរៀង ក្រុងស្វាយរៀង ខេត្តស្វាយរៀង ក្នុងឱកាសបុណ្យកាន់បិណ្ឌវេនទី៨។
លោក កែរ រដ្ឋា បានថ្លែងនូវការសាកសួរសុខទុក្ខពីសំណាក់លោកស្រី ម៉ែន សំអន ប្រធានក្រុមការងារគណបក្សប្រជាជនកម្ពុជាចុះជួយខេត្តស្វាយរៀង ដែលជានិច្ចការលោកស្រីតែងតែនឹករលឹកដល់ប្រជាពលរដ្ឋនៅទូទាំងខេត្តស្វាយរៀងផងដែរ។
លោកបានកោតសរសើរចំពោះអាជ្ញាធរដែនដី កងកម្លាំងប្រដាប់អាវុធគ្រប់ថ្នាក់ រួមនិងប្រជាពលរដ្ឋ ព្រះសង្ឃ ក្នុងមូលដ្ឋានសង្កាត់ស្វាយរៀង ក្រុងស្វាយរៀងទាំងមូលដែលបានសហការគ្នាយ៉ាងល្អប្រសើរក្នុងដំណើរកិច្ចអភិវឌ្ឍន៍ហេដ្ឋារចនាសម្ព័ន្ធទាំងវិស័យពុទ្ធចក្រ និងអាណាចក្រ រក្សាបាននូវស្ថិរភាពសន្តិសុខ សណ្ដាប់ធ្នាប់សាធារណៈក្នុងសង្គម ធានាបាននូវសុខសុវត្ថិភាព និងការរស់នៅរបស់ប្រជាពលរដ្ឋប្រកបដោយជីវភាពសមរម្យផងដែរ។
លោកបានលើកឡើងថា រាជរដ្ឋាភិបាលដែលមានសម្តេចតេជោ ហ៊ុន សែន ជាប្រមុខរាជរដ្ឋាភិបាល បានឣភិវឌ្ឍប្រទេសឱ្យរីកចម្រើនលើគ្រប់វិស័យយ៉ាងឆាប់រហ័ស និងទទួលបាននូវសុខសន្តិភាពយ៉ាងពេញលេញទូទាំងប្រទេស ដោយសម្តេចតែងតែគិតគូដល់សុខទុក្ខប្រជាពលរដ្ឋជានិច្ច ក្នុងពេលជួបប្រទះបញ្ហាផ្សេងៗដោយមិនព្រងើយកន្តើយឡើយ។ ភាពរីកចម្រើនរបស់ប្រទេសជាតិ និងការរស់នៅរបស់ប្រជាពលរដ្ឋក្នុងក្ដីសប្បាយរីករាយ និងលូតលាស់រីកចម្រើនទាំងអស់ដូចសព្វថ្ងៃនេះ គឺផ្ដើមចេញនូវមូលដ្ឋានគ្រឹះនៃនយោបាយឈ្នះឈ្នះរបស់សម្ដេចតេជោ ហ៊ុន សែន។
ជាមួយគ្នានេះ លោកក៏បានអំពាវនាវឲ្យអាជ្ញាធរដែនដី កងកម្លាំងប្រដាប់អាវុធ ប្រជាពលរដ្ឋត្រូវចូលរួមថែរក្សាសុខសន្តិភាព ដើម្បីបន្តការងារអភិវឌ្ឍរីកចម្រើនជាបន្តបន្ទាប់ទៀត ជាពិសេសត្រូវបង្ក្រាបល្បែងស៊ីសងគ្រប់ប្រភេទដែលមាននៅមូលដ្ឋានឱ្អស់ ស្របតាមប្រសាសន៍របស់សម្ដេចតេជោ ហ៊ុន សែន ហើយចូលរួមគោរពនិងអនុវត្តឱ្យបានម៉ឺងម៉ាត់នូវគោលនយោបាយភូមិឃុំមានសុវត្ថិភាពឱ្យមានប្រសិទ្ធភាពខ្ពស់ផងដែរ៕
សូមបញ្ជាក់ថាទេយ្យទាន និងសម្ភារៈក្នុងមួយវត្តៗទទួលបាន គ្រឿងឧបភោគបរិភោគមួយចំនួនធំ និងប្រគេនបច្ច័យចូលរួមបុណ្យកាន់បិណ្ឌមួយវត្តៗ ចំនួន ១.០០០.០០០រៀល ។ដោយឡែក ក្រុមការងារចុះជួយសង្កាត់ស្វាយរៀង ចូលរួមកាន់បិណ្ឌទាំង២វត្តចំនួន ១.០០០.០០០រៀល និងជូនតាអាចារ្យ តាជី យាយជី កងកំលាំងការពារ ថវិកា ៧២០.០០០រៀល រីឯក្រុមប្រឹក្សាគណបក្សសង្កាត់ សាខាបក្សភូមិ ចូលរួមកាន់បិណ្ឌទាំង២វត្តចំនួន ២៧០.០០០រៀលផងដែរ៕
