(សៀមរាប)៖ វេទិកាសេដ្ឋកិច្ចពិភពលោក (WEF) បង្ហាញបំណងធ្វើការកាន់តែជិតស្និទ្ធ និងពង្រឹងកិច្ចសហការឱ្យកាន់តែរឹងមាំថែមទៀតជាមួយកម្ពុជា និងអាស៊ាន។
បំណងនេះ ត្រូវបានស្តែងឡើងដោយលោក លោក ចូអុក លី (Joo-Ok Lee) ប្រធានកម្មវិធីតំបន់អាស៊ី-ប៉ាស៊ីហ្វិក និងជាសមាជិកនៃគណៈកម្មការប្រតិបត្តិនៃវេទិកាសេដ្ឋកិច្ចពិភពលោក ក្នុងឱកាសជួបពិភាក្សាការងារជាមួយលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម កាលពីរសៀលថ្ងៃទី១៣ ខែកញ្ញា ឆ្នាំ២០២២ សណ្ឋាគារផាកហៃយ៉ាត។
ក្នុងជំនួបនោះ លោក ចូអុក លី បានសម្ដែងនូវក្ដីសោមនស្សរីករាយចំពោះ លោករដ្ឋមន្ដ្រី ដែលចំណាយពេលវេលាដ៏មមាញឹកក្នុងអំឡុងកិច្ចប្រជុំរដ្ឋមន្ដ្រីសេដ្ឋកិច្ចអាស៊ាន ទទួលជួបរូបលោក និងសហការី។
លោក ចូអុក លី បានជម្រាបជូន លោករដ្ឋមន្ដ្រី អំពីសារសំខាន់នៃការចូលរួម និងចែករំលែកនូវសារសំខាន់ៗរបស់សម្ដេចតេជោនាយករដ្ឋមន្ដ្រីកម្ពុជា កាលពីកិច្ចប្រជុំប្រចាំឆ្នាំ២០២២ របស់ WEF នៅទីក្រុងដាវ៉ូស-ក្លូស្ទ័រ នាខែឧសភា កន្លងទៅ។ ប៉ុន្តែលោក ចូអុក លី សម្ដែងនូវការសោកស្ដាយដែលសម្ដេចតេជោនាយករដ្ឋមន្ដ្រី មិនអាចអញ្ជើញចូលរួមកិច្ចប្រជុំប្រចាំឆ្នាំ២០២៣ របស់ WEF នៅខែមករា ឆ្នាំ២០២៣ ដោយសារមានភាពមមាញឹកច្រើននៅឆ្នាំ២០២៣ ខាងមុខនេះ ។ ទោះជាយ៉ាងណាក៏ដោយ លោកសង្ឃឹមថា សម្ដេចតេជោនាយករដ្ឋមន្ដ្រី នឹងអាចអញ្ជើញចូលរួមកិច្ចប្រជុំប្រចាំឆ្នាំរបស់ WEF នាឱកាសក្រោយៗទៀត។ ឆ្លៀតក្នុងឱកាសនោះ លោក ចូអុក លី បានគោរពជូន ឯកឧត្តមរដ្ឋមន្ដ្រី ដោយផ្ទាល់នូវលិខិតអញ្ជើញចូលរួមកិច្ចប្រជុំប្រចាំឆ្នាំ២០២៣ របស់ WEF។
លោក ចូអុក លី បានបន្ដលើកឡើងអំពី ទស្សនកិច្ចរបស់លោកសាស្ត្រាចារ្យ ក្លូស ឆ្វាប់ ស្ថាបនិក និងជាប្រធានប្រតិបត្តិនៃអង្គការ WEF មកប្រទេសកម្ពុជានៅខែវិច្ឆិកា ខាងមុខនេះ ដោយលោកសាស្ដ្រាចារ្យ នឹងអញ្ជើញមកចូលរួមក្នុងកិច្ចសន្ទនាសកលស្តីពីអាស៊ានលើកទី២។ លោកបានបន្ដថា WEF មានគោលបំណងចង់ពង្រឹងកិច្ចសហប្រតិបត្តិការជាមួយអាស៊ាន និងកម្ពុជា ឱ្យកាន់តែរឹងមាំជាមុន។
លោករដ្ឋមន្ដ្រី បានថ្លែងអំណរគុណដល់តំណាង WEF ដែលបានរាយការណ៍នូវសកម្មភាព និងគម្រោងទស្សនកិច្ចរបស់លោកសាស្ដ្រាចារ្យមកប្រទេសកម្ពុជា នៅខែវិច្ឆិកាខាងមុខនេះ។ លោករដ្ឋមន្ដ្រី បានជម្រាបជូនថា ក្រសួងពាណិជ្ជកម្ម ក៏ដូចជារាជរដ្ឋាភិបាលកម្ពុជា ស្វាគមន៍ចំពោះកិច្ចសហប្រតិបត្តិការអន្ដរជាតិជាមួយ WEF និងដំណើរទស្សនកិច្ចរបស់លោកសាស្ដ្រាចារ្យ មកប្រទេសកម្ពុជា នាពេលខាងមុខ។
ឆ្លៀតក្នុងឱកាសនោះ លោករដ្ឋមន្ត្រី ប៉ាន សូរស័ក្តិ បានជម្រាបជូនជាសង្ខេបពីគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលកម្ពុជា និងក្របខ័ណ្ឌច្បាប់នានា ដូចជា ច្បាប់ស្ដីពីពាណិជ្ជកម្មអេឡិចត្រូនិក ច្បាប់ស្ដីពីសុវត្ថភាពចំណីអាហារ ច្បាប់ស្ដីពីវិនិយោគ និងច្បាប់មួយចំនួនទៀត ដែលគាំទ្រដល់ការធ្វើពាណិជ្ជកម្ម និងវិនិយោគនៅកម្ពុជា ប្រកបដោយភាពប្រកួតប្រជែងខ្ពស់ ដើម្បីឈានដល់ការសម្រេចគោលដៅក្លាយជាប្រទេសមានចំណូលខ្ពស់នៅឆ្នាំ២០៥០។
លោករដ្ឋមន្ត្រី បានបន្តថា កម្ពុជាកំពុងធ្វើជាម្ចាស់ផ្ទះ រៀបចំកិច្ចប្រជុំរដ្ឋមន្ដ្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធនៅ នៅថ្ងៃទី១១-១៨ ខែកញ្ញា ឆ្នាំ២០២២ នៅខេត្តសៀមរាបផងដែរ។ លោករដ្ឋមន្ដ្រី បានបញ្ជាក់ជូនថា ក្រសួងពាណិជ្ជកម្ម ក៏ដូចរាជរដ្ឋាភិបាលកម្ពុជា ស្វាគមន៍ចំពោះកិច្ចសហប្រតិបត្តិការអន្ដរជាតិជាមួយ WEF និងស្ថាប័នអន្ដរជាតិផ្សេងៗទៀត ក្នុងការគាំទ្រ និងជំរុញកំណើនសេដ្ឋកិច្ច និងពាណិជ្ជកម្មកម្ពុជា និងតំបន់៕
