(ភ្នំពេញ)៖ ក្រុមកីឡាករកីឡាការនីជម្រើសជាតិកម្ពុជាចំនួន១៥៩នាក់ ត្រៀមចេញដំណើរទៅហ្វឹកហាត់នៅសាធារណរដ្ឋប្រជាមានិតចិន រយៈពេល៦ខែចាប់ពីថ្ងៃទី១៥ ខែកញ្ញា ឆ្នាំ២០២២ រហូតដល់ខែមីនា ឆ្នាំ២០២៣ ដើម្បីដកស្រង់បទពិសោធនិងបច្ចេកទេសល្អៗ ក្នុងការដណ្តើមមេដាយក្នុងការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ដែលកម្ពុជាធ្វើជាម្ចាស់ផ្ទះ។

ថ្លែងក្នុងពិធីសំណេះសំណាល និងជូនដំណើរ កីឡាករ កីឡាការិនី ជម្រើសជាតិកម្ពុជា ត្រូវចេញទៅហ្វឹកហាត់នៅប្រទេសចិន ក្រោមកម្មវិធីជំនួយផ្នែកបច្ចេកទេសកីឡា ដែលជាជំនួយឥតសំណងរបស់រដ្ឋាភិបាលចិន នាព្រឹកថ្ងៃទី១៣ ខែកញ្ញា ឆ្នាំ ២០២២នៅមជ្ឈមណ្ឌលជាតិហ្វឹកហ្វឺន កីឡា លោក Wu Guoquan ទីប្រឹក្សាសេដ្ឋកិច្ច និងពាណិជ្ជកម្មនៃស្ថានទូតចិនប្រចាំកម្ពុជា បានចូលរួមអបអរសាទរ ចំពោះកីឡាករកីឡាការិនីនិងគ្រូបង្វឹកកម្ពុជាទាំងអស់ ដែលនឹងត្រូវចេញទៅហ្វឹកហាត់នៅប្រទេសចិន ក្នុងរយៈពេលខាងមុខនេះ។

លោកបន្តថា គម្រោងនៃការបញ្ជូនកីឡាករកីឡារនីកម្ពុជា ទៅរៀននៅប្រទេសចិននេះ កើតចេញពីការខិតខំប្រឹងប្រែង របស់ថ្នាក់ដឹកនាំគណៈកម្មាធិការជាតិអូឡាំពិកកម្ពុជា និងស្ថានទូតចិនប្រចាំនៅកម្ពុជា។ លោកបានបញ្ជាក់ថា ចិន និងកម្ពុជាគឺជាមិត្តដែកថែប និងជាសហគមន៍រួមជោគវាសនា ហើយទំនាក់ទំនងទ្វេភាគីត្រូវថែរក្សា អភិវឌ្ឍកម្រិតខ្ពស់ជាយូរណាស់មកហើយ។

លោកបានបញ្ជាក់ថា ដើម្បីជួយកម្ពុជាក្នុងការរៀបចំធ្វើជាម្ចាស់ផ្ទះការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣រដ្ឋាភិបាលចិន មិនត្រឹមតែអនុវត្តន៍គម្រោងសាងសង់ពហុកីឡដ្ឋានដែលកម្ពុជារៀបចំកន្លែងប្រកួតកីឡាប៉ុណ្ណោះទេ ប៉ុន្តែថែមទាំងបានអនុវត្តន៍គម្រោងបច្ចេកទេសកីឡាសម្រាប់កម្ពុជាផងដែរ។

ជំនួយរបស់ចិននេះក្នុងគោលបំណងជួយលើកកម្ពស់ កម្រិតការប្រកួតកីឡារបស់កម្ពុជាតាមរបៀបហ្វឹកហាត់រួមគ្នា ដោយភាគីចិនផ្តល់សម្ភារៈហ្វឹកហាត់និងបញ្ជូនគ្រូឱ្យមកបង្ហាត់កីឡាករនៅកម្ពុជាដោយផ្ទាល់ និងបញ្ជូនកីឡាករកីឡាការិនី ឱ្យទៅហ្វឹកហាត់នៅប្រទេសចិន។ ការអនុវត្តគម្រោងនេះ ដើម្បីពង្រឹងទំនាក់ទំនងភាពជាដៃគូគ្រប់ជ្រុងជ្រោយ នៃប្រទេសទាំងពីរកាន់តែរឹងមាំស៊ីជម្រៅថែមទៀត ខណៈកីឡាជាភាសាទូទៅនៃការប្រាស្រ័យគ្នានៅលើពិភពលោក ហើយក៏ជាវិស័យមួយដ៏សំខាន់ក្នុងការជំរុញការស្គាល់គ្នា យល់ចិត្តគ្នាទៅវិញទៅមករវាងចិននិងកម្ពុជា។

នៅក្នុងឱកាសនោះដែរ ឯកឧត្តមវ៉ាត់ ចំរើនរដ្ឋលេខាធិការក្រសួងទេសចរណ៍ និងជាអគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ បានអរគុណដល់មិត្តចិនដែលបានគាំទ្រដល់វិស័យកីឡានៅកម្ពុជា នាពេលកន្លងមកតាមរយៈការកសាងពហុកីឡដ្ឋានជាតិមរតកតេជោ និងការជួយដល់កីឡាករកីឡាការិនីកម្ពុជា ក្នុងការហ្វឹកប្រកបដោយប្រសិទ្ធភាព។

ឯកឧត្តមបញ្ជាក់ថា ការជួយហ្វឹកហាត់ដល់កីឡាករកីឡាការនីកម្ពុជានៅពេលនេះ គឺមានសារសំខាន់ណាស់សម្រាប់កម្ពុជា ជាពិសេសសម្រាប់ព្រឹត្តិការជាប្រវត្តិសាស្ត្រ៦៤ឆ្នាំដែលកម្ពុជារង់ចាំធ្វើជាម្ចាស់ផ្ទះនៃការប្រកួត កីឡាអាស៊ីអាគ្នេយ៍លើកទី៣២ ឆ្នាំ២០២៣ខាងមុខនេះ។

ឯកឧត្តមថ្លែងដូច្នេះ៖ «ដើម្បីតបស្នងសងគុណដល់ភាគីចិនដែលបានជួយយើង កីឡាករកីឡាការិនីទាំងអស់ត្រូវខិតខំហ្វឹកហាត់ យកចំណេះដឹងយកមកលើកកម្ពស់វិស័យកីឡាកម្ពុជាឱ្យកាន់តែរីកចម្រើន។ត្រូវរៀបចំខ្លួនផ្សាភ្ជាប់ជាមួយប្រជាជនចិន និងគ្រូបង្ហាត់ចិន ត្រូវរក្សាវិន័យ សេចក្តីថ្លៃថ្នូ គោរពច្បាប់ និងការណែនាំរបស់អាជ្ញាធរចិនឱ្យបានល្អជាពិសេសវិធានការការពារកូវីដ១៩ ព្រោះការចេញទៅហ្វឹកហាត់នៅប្រទេសចិនលើកនេះ ទៅក្នុងនាមកិច្ចសហប្រតិបត្តិការរវាងរាជរដ្ឋាភិបាលកម្ពុជានិងរដ្ឋាភិបាលចិន ពោលគឺតំណាងប្រទេសជាតិទាំងមូល»។

កញ្ញា សុខ វល័ក្ខណ៍ កីឡាការនីហែលទឹកដែលត្រៀមទៅហ្វឹកហាត់នៅប្រទេសចិន បានបង្ហាញពីមោទនភាពដែលបានទៅចូលរួមហ្វឹកហាត់ លើជំនាញហែលទឹកនៅប្រទេសចិន នេះ ព្រោះប្រទេសចិនមានគ្រូល្អៗ បទពិសោធខ្ពស់ និងមានសម្ភារៈគ្រប់គ្រាន់។

កញ្ញានិយាយដូច្នេះថា៖ «ខ្ញុំសប្បាយចិត្តពេល បានទៅហ្វឹកហាត់នៅប្រទេសចិនដើម្បីដកស្រង់បទពិសោធ ដើម្បីជំរុញសមត្ថភាពរបស់ខ្ញុំឱ្យបានល្អ ដើម្បីត្រៀមយកមកប្រកួតនៅក្នុងព្រឹត្តិការណ៍ស៊ីហ្គេម ដែលកម្ពុជាជាម្ចាស់ផ្ទះនៅឆ្នាំ២០២៣»។

ជាមួយគ្នានោះដែរ កញ្ញាបូរ អ៊ីន ស៊ូ ជាកីឡាការនីវាយកូនឃ្លីលើតុអរគុណដល់រដ្ឋាភិបាលចិន ហើយកញ្ញា នឹងប្តេជ្ញាខិតខំហ្វឹកហាត់ឱ្យទទួលបានជោគជ័យនៅប្រទេសចិន ហើយយកចំណេះដឹងនោះមកសាងកេរឈ្មោះឱ្យប្រទេសជាតិកម្ពុជា។

កញ្ញានិយាយថា៖ «សង្ឃឹមថា គ្រូចិន នឹងបង្ហាត់យើងបានល្អនូវបច្ចេកទេសថ្មីៗ។ ហើយខ្ញុំតាំងចិត្តខ្ពស់ក្នុងការត្រៀមយកចំណេះដឹងពីចិន មកចូលរួមប្រកួតស៊ីហ្គេមឆ្នាំ២០២៣ ឱ្យទទួលបានលទ្ធផលល្អជួនជាតិ»។

សូមបញ្ជាក់ថា កីឡាករ កីឡាការនី ដែលត្រូវហ្វឹកហាត់នៅប្រទេសចិននៅពេលនេះ សរុបចំនួន១៥៩នាក់ មានដូចជាមកពី សហព័ន្ធកីឡាកាយសម្ព័ន្ធកម្ពុជាចំនួន១១នាក់ ខេមសហព័ន្ធយូដូ ៥នាក់ សហព័ន្ធកីឡាវ៉ូស៊ូកម្ពុជាចំនួន១០នាក់ សហព័ន្ធកីឡាបាល់បោះកម្ពុជាចំនួន១៥នាក់ សហព័ន្ធកីឡាវាយកូនឃ្លីលើតុកម្ពុជាចំនួន១០នាក់ សហព័ន្ធខ្មែរអត្តពលកម្មស្ម័គ្រចិត្តចំនួន២០នាក់ សហព័ន្ធកីឡាចំបាប់កម្ពុជាចំនួន១៥នាក់ សហព័ន្ធកីឡាវាយសីកម្ពុជាចំនួន១២នាក់សហព័ន្ធកីឡាហែលទឹកកម្ពុជា១១នាក់ សហព័ន្ធលើកទម្ងន់កម្ពុជាចំនួន១០នាក់ សហព័ន្ធបាល់ទាត់កម្ពុជាចំនួន២៥នាក់ សហព័ន្ធកីឡាបាល់ទះកម្ពុជាចំនួន១៥នាក់ និងអ្នកដឹកនាំចំនួន២នាក់៕

(អត្ថបទវិទ្យុមិត្តភាពកម្ពុជាចិន)