(ភ្នំពេញ)៖ សិស្សានុសិស្សកម្ពុជា ទទួលបានមេដាយមាស និងប្រាក់ ៧៥គ្រឿង ពីការប្រកួតពានរង្វាន់បញ្ញវន្តពិភពលោក (The World Scholar's Cup) វគ្គ Global Round នៅប្រទេសថៃ។

The World Scholar's Cup ប្រចាំឆ្នាំ២០២២ ត្រូវបានប្រព្រឹត្តឡើងរយះពេលមួយសប្តាហ៍ ចាប់ពីថ្ងៃទី០១ ដល់ថ្ងៃទី០៧ ខែកញ្ញា ឆ្នាំ២០២២។ ក្រុមហ៊ុន Bright Education Consultant and Travel.Co,Ltd បានបញ្ជូនសិស្សានុសិស្សកម្ពុជាចំនួន ៣០រូប ជាបេក្ខជនឆ្នើម មកពីសាលាផ្សេងៗគ្នាទៅចូលរួមការប្រកួតប្រជែងនេះ។ ប្រទេសជាកម្ពុជាជាប្រទេសមួួយក្នុងចំណោប្រទេសចំនួន២៥ មកពីជុំវិញពិភពលោក ដែលបានបញ្ជូនសិស្សចូលរួមប្រកួតប្រជែង។

ជាលទ្ធផលសិស្សកម្ពុជា ទទួលបានមេដាយមាស ២០គ្រឿង និងមេដាយប្រាក់ ៥៥គ្រឿង។ សិស្សានុសិស្សទាំងអស់មកពីសាលាផ្សេងៗគ្នា ដូចជា CIA International School, Western International School, Paragon International School, Footprints International School, Beijing International Academy, World International School, ICS International School, International School of Phnom Penh, Abundant life International School, Westview Cambodian International School, Invictus International School, Aii language Center និង Harrods International School។

ជាមួយគ្នានេះ សិស្សានុសិស្សកម្ពុជាច្រើនរូប ត្រូវបាន ជាប់បន្តទៅវគ្គបន្ទាប់នាទឹកដីសហរដ្ធអាមេរិក នាពលខាងមុន។

តាមរយ:សមទ្ធិផលទាំងនេះ បានបង្ហាញឲ្យឃើញថា សិស្សានុសិស្សកម្ពុជា ពិតជាមានសមត្ថភាពពេញលេញ ព្រមទាំងទទួលបានឱកាសប្រកួតប្រជែងសមត្ថភាពលំដាប់ពិភពលោក។ ការខិតខំប្រឹងប្រែងរបស់ពួកគេ ពិតជាធ្វើឱ្យមាតាបិតា លោកគ្រូអ្នកគ្រូ និងសាលា មានមោទនភាពជាខ្លាំង ហើយសមិទ្ធផលដែលពួកគេទទួលបានលើកនេះ អាចជាកម្លាំងចិត្តឱ្យពួកគេកាន់តែប្រឹងប្រែងលើការសិក្សារបស់ពួកគេបន្ថែមទៀត។

សិស្សឈ្មោះ ឈាង សុខីវុឌ្ឍ ជាម្ចាស់មេដាយមាសចំនួន ២គ្រឿង និងមេដាយប្រាក់ ៨គ្រឿង បានបង្ហាញអារម្មណ៍ថា រូបគេពិតជាសប្បាយរីករាយណាស់ដែលបានចូលរួមកម្មវិធី The world Scholar's Cup នេះ និងតំណាងឲ្យប្រទេសកម្ពុជា សម្រាប់មេដាយរបស់ប្អូនគឺបានដោយសារការប្រឹងប្រែងយ៉ាងពិតប្រាកដ និងទៅតាមប្រភេទវិញ្ញាសារនៃកម្មវិធីរៀបចំ។ រូបគេ បានអរគុណប៉ាម៉ាក់ លោកគ្រូ អ្នកគ្រូ និង អរគុណដ៏ក្រុមហ៊ុន Bright ដែលនាំយកកម្មវិធី WSC នេះមកស្រុកខ្មែរ និង បានដឹកនាំសិស្សទៅប្រឡងនៅក្រៅប្រទេសផងដែរ។

លោក ឯល ណូរី ជាប្រធានផ្នែកទីផ្សារបានបង្ហាញអារម្មណ៍ថា សប្បាយត្រេកអរក្រែងលែងបន្ទាប់ពីឃើញសិស្សនុសិស្សកម្ពុជាទទួលបានមេដាយមាស ប្រាក់ ជាច្រើន។ លើសពីនេះទៀត ចូលរួមត្រេកអរ និង សូមអរគុណដ៏សិស្សានុសិស្ស អាណាព្យាបាល ទាំងអស់ដែលបានមានទំនុកចិត្តមកលើខាងក្រុមហ៊ុនប្រាយ ។

លោក សូមអរគុណរដ្ធាភិបាលដែលយកចិត្តទុកដាក់លើកស្ទួយវិស័យអប់រំ រហូតមានការប្រឡងប្រជែងនានា៕