(ភ្នំពេញ)៖ ស្រីស្រស់ម្នាក់ រវល់និយាយទូរសព្ទ័ភ្លេចមើលផ្លូវ បានបើករថយន្តជ្រុលទៅបុក ស្លាកសញ្ញាបង្ហាញផ្លូវ បណ្តាលឲ្យបាក់ និងខូចរថយន្ត តែមិនបណ្តាលឲ្យគ្រោះថ្នាក់ដល់នាងនោះទេ។
ហេតុការណ៍នេះ បានកើតឡើងនៅម៉ោង១រំលងអាធ្រាត ឈានចូលថ្ងៃទី៣ខែមិថុនា ឆ្នាំ២០១៦ ស្ថិតនៅមុខសួនច្បារក្តាន់ពីរ តាមបណ្តោយផ្លូវសហព័ន្ធរុស្ស៊ី ក្នុងសង្កាត់ស្រះចក ខណ្ឌដូនពេញ។
ស្រីស្រស់ដែលបើករថយន្តបង្កបានប្រាប់ឲ្យដឹងថា មុនកើតហេតុនាងបានបើករថយន្តមកពីដើរលេង នៅម្តុំមាត់ទន្លេ ត្រឡប់មកផ្ទះវិញ តែបើកមិនទាន់ដល់ផ្ទះផង ក៏ជួបគ្រោះថ្នាក់បណ្តាលឲ្យ បុកស្លាកបង្ហាញផ្លូវបែបនេះទៅ តែសំណាងល្អគ្រោះថ្នាក់នេះ មិនបណ្តាលឲ្យរូបនាង រងរបួសឡើយ ដោយគ្រាន់តែបាក់ស្លាក និងខូចរថយន្តតែប៉ុណ្ណោះ។
ក្រោយកើតហេតុស្រីស្រស់ រួមជាមួយរថយន្តត្រូវបាននគរបាលចរាចរណ៍ នាំយកទៅការិយាល័យនគរបាលចរាចរណ៍ក្រុងភ្នំពេញ ដើម្បីដោះស្រាយសងសំណង៕
