(ភ្នំពេញ​)​៖ ចៅក្រមស៊ើបសួរ នៃសាលាដំបូងរាជធានីភ្នំពេញ លោក​ លី​ លិបម៉េង នៅវេលាម៉ោងប្រមាណ៦៖៣០នាទីថ្ងៃទី០២ ខែមិថុនា ឆ្នាំ២០១៦នេះ បានសម្រេចឃុំខ្លួន លោកមេធាវី ពេជ រតនា ជាបណ្តោះអាសន្នហើយ ក្រោមការចោទប្រកាន់ពីបទ​ប៉ុនប៉ងស៊កប៉ាន់ចៅក្រម។

លោក ពេជ រតនា ដែលជាសមាជិកនៅក្នុង​គណៈមេធាវីកម្ពុជា ត្រូវបានសមត្ថកិច្ចអង្គភាពប្រឆាំងអំពើពុករលួយ (ACU) បញ្ជូនទៅកាន់សាលាដំបូងរាជធានីភ្នំពេញ នៅម៉ោង៨៖០០ ព្រឹកថ្ងៃទី០២ ខែមិថុនា ឆ្នាំ២០១៦ បន្ទាប់ពីបានឃាត់​ខ្លួនអស់រយៈពេល២ថ្ងៃ។ លោកត្រូវបានសមត្ថកិច្ចអង្គភាព​ប្រឆាំងអំពើពុករលួយនាំខ្លួន​ពីចំណត ពហុកីឡដ្ឋានជាតិអូឡាំពិក នៅព្រឹកថ្ងៃទី៣១ ខែឧសភា ឆ្នាំ២០១៦ ភ្លាមៗបន្ទាប់ពីលោកចេញពី​សាលាដំបូងរាជធានីភ្នំពេញ ហើយដើរទៅកាន់​រថយន្តរបស់លោក។

លោក​ ងិន​ ពេជ្រ​ ព្រះ​រាជ​អាជ្ញា​រង​អម​សាលា​ដំបូង​រាជធានី​ភ្នំពេញ​ សម្រេច​ចោទ​ប្រកាន់ ​លោក​មេធាវី​ ពេជ​ រតនា​ ពី​បទ​ប៉ុនប៉ង​សូកប៉ាន់​ចំពោះ​ចៅក្រម​ តាម​មាត្រា​៥១៨នៃ​ក្រម​ព្រហ្មទណ្ឌ​។ បទ​ល្មើស​នេះ​ កំណត់​ការ​ផ្តន្ទា​ទោស​ដាក់​ពន្ធនាគារ​ពី​៥ឆ្នាំ​ទៅ​១០ឆ្នាំ​។

សូមជំរាបថា នៅព្រឹកថ្ងៃទី០២ ខែមិថុនា ឆ្នាំ២០១៦នេះ ខណៈដែល លោកមេធាវី ពេជ រតនា កំពុងស្ថិតនៅក្នុងការ​សួរចម្លើយដោយព្រះរាជអាជ្ញារង ងិន ពេជ្រ មានមេធាវីប្រមាណ១០០នាក់ នៅក្នុងគណៈមេធាវី បានផ្តិតមេដៃ​ធ្វើញត្តិ ដើម្បីសុំឱ្យតុលាការអនុញ្ញាតឱ្យ លោក ពេជ រតនា នៅក្រៅឃុំ។

ឆ្លើយតបនឹងករណីសមាជិកគណៈមេធាវីជិត១០០នាក់ ផ្តិតមេដៃស្នើ​សុំកុំឲ្យមានការ​ឃុំខ្លួនលោក ពេជ រតនា ត្រូវបានលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានថ្លែង​ប្រាប់អង្គភាព Fresh News វិញថា «មេធាវីជាសសរមួយ របស់ច្បាប់មុន​ធ្វើអ្វីត្រូវគិតដល់ច្បាប់ជាធំ»