(ភ្នំពេញ)៖ នាយករដ្ឋមន្រ្តីស្តីទី សម្ដេចក្រឡាហោម ស ខេង និងជាប្រធានគណៈកម្មាធិការជាតិសុវត្ថិភាព ចរាចរណ៍ផ្លូវគោកនៅថ្ងៃទី០២ ខែមិថុនា ឆ្នាំ២០១៦នេះ មានសម្រេចដាក់ចេញ​នូវទិសដៅ​៩ចំណុចបន្ថែម ដើម្បីសម្រេចការអនុវត្តច្បាប់ចរាចរណ៍ផ្លូវគោក ឲ្យមានប្រសិទ្ធភាពខ្ពស់ជាងមុន ក្រោយពីបានធ្វើការបូកសរុបការងារការអនុវត្តច្បាប់ចរាចរណ៍ផ្លូវគោក ប្រចាំខែឧសភា ឆ្នាំ២០១៦​រួចមក។ នៅរសៀលថ្ងៃនេះ សម្តេចក្រឡាហោម ស ខេង បានអញ្ជើញចូលរួមដឹកនាំប្រជុំបូកសរុបការងារច្បាប់ចរាចរណ៍ផ្លូវគោក ដោយមានការចូលរួមពីអគ្គស្នងការនគរបាលជាតិ និងមន្រ្តីនគរបាល​ជាន់ខ្ពស់មួយចំនួនទៀត។

សម្ដេចក្រឡាហោម បានថ្លែងថា ទិសដៅទាំង៩ចំណុចនោះ រួមមាន៖ ទី១. បន្តជំរុញការផ្សព្វផ្សាយ និងអប់រំច្បាប់ចរាចរណ៍ផ្លូវគោក ឱ្យបានទូលំទូលាយបន្ថែមទៀត តាមគ្រប់រូបភាពដល់ប្រជាពលរដ្ឋ នៅតាមផ្ទះ ឱ្យបានគ្រប់ៗគ្នា, ទី២. បន្តការរឹតបន្តឹង ត្រួតពិនិត្យការអនុវត្តច្បាប់ ឱុំយបានជាប់ជាប្រចាំទាំងយប់ទាំងថ្ងៃ ពិសេសផ្ដោតលើបញ្ហាអាទិភាព ដូចជា ការបើកបរហួសល្បឿន​កំណត់ពិនិត្យ​ជាតិស្រវឹង មិនគោរពសិទ្ធិអាទិភាព មិនពាក់មួកសុវត្ថិភាព លក្ខណៈបច្ចេកទេស ជាដើម ទី៣. បន្តជំរុញអនុគណៈកម្មការសុវត្ថិភាពចរាចរណ៍ផ្លូវគោក តាមរាជធានី-ខេត្ត, ទី៤. សិក្សាស្រាវជ្រាវវិធាន​ការគ្រប់គ្រងគោយន្ត ឱ្យមានលក្ខណៈបច្ចេកទេសធានាសុវត្ថិភាព និងវិធានការពិសេស ដើម្បីគ្រប់គ្រងអ្នកប្រើប្រាស់ម៉ូតូទំហំក្រោម ១២៥CC ទី៥. បន្តសិក្សា និងបំពាក់ឧបករណ៍បច្ចេកទេស​ត្រួតពិនិត្យល្បឿន ជាតិស្រវឹង និងបង្កើនសមត្ថភាពមន្រ្តី ទី៦. ជំរុញការបំពាក់ស្លាកសញ្ញាចរាចរណ៍ និងដោះស្រាយការកកស្ទះចរាចរណ៍ តាមរយៈការបង្កើនមធ្យោបាយដឹកជញ្ជូនសាធារណៈ ការបង្កើនចំណតសាធារណៈ ការបន្ថែមភ្លើងស្តុប ទី៧. បន្តធ្វើវិសោធនកម្មច្បាប់ស្ដីពីចរាចរណ៍ផ្លូវគោក និងតាក់តែងបទដ្ឋាននានា បម្រើដលការអនុវត្តច្បាប់, ទី៨. បន្តពង្រឹងយម្តការតាម​ដានប្រតិកម្មរបស់សាធារណៈជន ដើម្បីឆ្លើយតបឱ្យបានទាន់ពេលវេលា និងទី៩. អនុវត្តទិសដៅ តាមស្មារតីប្រជុំនាថ្ងៃ២ ខែមិថុនា ឆ្នាំ២០១៦។ សូមជម្រាបថា ការងារប្រចាំខែឧសភា ទទួលបានលិទ្ធផល​រួមមាន៖ បានត្រួតពិនិត្យយានយន្តសរុប ចំនួន៩១២,៩១៧គ្រឿង, បានរកឃើញយានយន្តល្មើស ចំនួន១១៧,៩៩០គ្រឿង, បានធ្វើការអបរំ ចំនួន៤៩,៨៧៤គ្រឿង, បានធ្វើការពិន័យ ចំនួន៦៨,១១៦គ្រឿង, ត្រួតពិនិត្យល្បឿន និងអ្នកបើកមានជាតិស្រវឹង ចំនួន៦,៨៥៣គ្រឿង, បានផ្ដល់សេវាសាធារណៈ ដោយឱ្យម្ចាស់យានយន្តទៅចុះបញ្ជី មានចំនួន៦៤,៤០៤គ្រឿង៕