(ភ្នំពេញ)៖ អគ្គិភ័យបានឆាបឆេះតូបលក់ដូរផ្សារតូចទួលសង្កែ នៅវេលាម៉ោង១១៖៣០នាទីយប់ ថ្ងៃទី០៥ ខែកញ្ញា ឆ្នាំ២០២២ សិ្ថតនៅតាមបណ្តោយផ្លូវលេខ៩០១ ក្រុមទី៤ ភូមិចុងខ្សាច់ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។

លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ បានឲ្យដឹងថា ហេតុការណ៍ អគ្គិភ័យឆាបឆេះនេះ គឺបណ្តាលមកពីការឆ្លងចរន្តអគ្គីសនីបង្កជាអគ្គិភ័យ ហើយធ្វើឲ្យខូចខាតឆេះតូបលក់ដូរចំនួន ៩តូប ទំហំ១.៥ម៉ែត្រ គុណ២ម៉ែត្រ អស់ទាំងស្រុង ដែលសង់ឡេីងអំពី ដែកប្រក់ស័ង្កសី។

ជិតមួយម៉ោងក្រោយ បន្ទាប់ពីការសង្គ្រោះអន្ដរាគមន៍យ៉ាងយកចិត្តទុកដាក់ អគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យ រាជធានីភ្នំពេញ ចំនួន១២គ្រឿង ប្រេីប្រាស់ទឹកអស់ចំនួន៦ឡាន, រថយន្តសាលាខណ្ឌឫស្សីកែវ ចំនួន១គ្រឿង ពុំបានប្រើប្រាស់ទឹក, រថយន្តក្រុមហ៊ុន OCIC ជ្រោយចង្វារ ចំនួន៦គ្រឿង ប្រើប្រាស់អស់ទឹកចំនួន១ឡាន៕