(ភ្នំពេញ)៖ អគ្គិភ័យឆាបឆេះក្លឹបកម្សាន្ដមួយកន្លែងយីហោ «All Friends» បានបំផ្លាញសម្ភារអស់ទាំងស្រុង និងបានរាលដាលដល់ផ្ទះមួយខ្នង បណ្តាលឲ្យរងការខូចខាត។ ហេតុការណ៍គ្រោះអគ្គិភ័យខាងលើនេះ បានកើតឡើងនៅវេលាម៉ោង១០៖៤០នាទីព្រឹក ថ្ងៃទី០១ ខែកញ្ញា ឆ្នាំ២០២២ ដែលស្ថិតនៅតាមបណ្តោយផ្លូវ៤៨៨ ភូមិ២ ក្រុម១៤ សង្កាត់ផ្សារដើមថ្កូវ ខណ្ឌចំការមន។

លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រាប់បណ្តាញព័ត៌មាន Fresh News ដឹងថា ដោយនៅក្នុងប្រតិបត្តិការនេះ កម្លាំងជំនាញបានប្រើប្រាស់រថយន្តពន្លត់អគ្គិភ័យជិត៤០គ្រឿង។

ក្នុងនោះរួមមាន រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន២១គ្រឿង ប្រើប្រាស់ទឹកអស់២១ឡាន, រថយន្តក្រសួងមហាផ្ទៃ ចំនួន៣គ្រឿង ប្រើប្រាស់ទឹកអស់៣ឡាន, រថយន្តក្រុមហ៊ុន OCIC ទីក្រុងកោះពេជ្រ ចំនួន៤គ្រឿង ប្រើប្រាស់ទឹកអស់៤ឡាន, រថយន្តក្រុមហ៊ុន OCIC ទីក្រុងជ្រោយចង្វារ ចំនួន៦គ្រឿង ប្រើប្រាស់ទឹកអស់៦ឡាន, រថយន្តផ្សារទំនើបអូឡាំព្យា ចំនួន២គ្រឿង ប្រើប្រាស់ទឹកអស់២ឡាន និងរថយន្តក្រុមហ៊ុនស្រាបៀរកម្ពុជា ចំនួន១គ្រឿង ប្រើប្រាស់ទឹកអស់១ឡាន។

លោកវរសេនីយ៍ឯក ព្រហ្ម យ៉ន បានបញ្ជាក់ថា ចំពោះករណីគ្រោះអគ្គិភ័យខាងលើនេះ បានឆាបឆេះក្លឹបកម្សាន្ដ All Friend និងសម្ភារខូចខាតអស់ទាំងស្រុង ដែលមានទំហំ (១៦ម៉ែត្រ គុណ១៣ម៉ែត្រ) សាងសង់អំពីថ្មប្រក់ស័ង្កសី និងបានរាលដាលដល់ផ្ទះប្រជាពលរដ្ឋអស់ចំនួន មួយខ្នងខូចខាតប្រហែល២០ភាគរយ។ ចំពោះមូលហេតុដែលបណ្តាលឲ្យកើតមានគ្រោះអគ្គិភ័យខាងលើនេះ កម្លាំងសមត្ថកិច្ចជំនាញកំពុងតែធ្វើការស្រាវជ្រាវ៕