(ភ្នំពេញ)៖ ប្រជាពលរដ្ឋក្នុងមូលដ្ឋាន បានជូនព័ត៌មានមកកាន់កងរាជអាវុធហត្ថរាជធានីភ្នំពេញ តាមរយៈផេកផ្លូវការរបស់លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញថា មានករណីជួញដូរ និងប្រើប្រាស់គ្រឿងញៀន នៅចំណុចផ្លូវបេតុង ក្នុងបុរីសន្តិភាព២ ស្ថិតក្នុងភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ។

ក្រោយពេលទទួលបានព័ត៌មាន លោកឧត្តមសេនីយ៍ឯក រ័ត្ន ស្រ៊ាង បានដាក់បទបញ្ជាដោយផ្ទាល់ ដល់ក្រុមការងារ ដែលមានកម្លាំងមូលដ្ឋានអាវុធហត្ថខណ្ឌពោធិ៍សែនជ័យ សហការជាមួយ កម្លាំងជំនាញការិយាល័យប្រឆាំង បទល្មើសគ្រឿងញៀន កងរាជអាវុធហត្ថរាជធានីភ្នំពេញ ចុះធ្វើការស្រាវជ្រាវនិងបង្ក្រាបទីតាំងខាងលើនេះ ចំនួន០៥លើកផ្ទួនៗគ្នាទាំងពេលយប់ និងពេលថ្ងៃ និងឃាត់ខ្លួនជនសង្ស័យសរុបចំនួន១៦នាក់ និងចាប់យកនូវវត្ថុតាងគ្រឿងញៀនសរុបចំនួន៥៥កញ្ចប់តូចធំ ព្រមទាំងសម្ភារសម្រាប់សេពគ្រឿងញៀនបានមួយចំនួនទៀត បញ្ជូនទៅតុលាការ ជាបន្តបន្ទាប់ ដូចភ្លៀងរលឹម។

*លើកទី១៖ នៅថ្ងៃទី២៦ ខែកក្កដា ឆ្នាំ២០២២ ឃាត់ខ្លួនជនសង្ស័យចំនួន០២នាក់ ឈ្មោះ សំ ឃ្លោក ភេទប្រុស អាយុ៣០ឆ្នាំ និង ឈ្មោះ ណើ រិទ្ធ ភេទប្រុស អាយុ២០ឆ្នាំ ដកហូតថ្នាំញៀនបានចំនួន ១៥កញ្ចប់តូចធំ។
*លើកទី២៖ នៅរសៀលថ្ងៃទី០១ ខែសីហា ឆ្នាំ២០២២ ឃាត់ខ្លួនជនសង្ស័យចំនួន០២នាក់ ឈ្មោះ ប៉ោត ប៉ុង ភេទប្រុស អាយុ២៣ឆ្នាំ និង ឈ្មោះ សន ពិសិដ្ឋ ភេទ ប្រុស អាយុ២៣ឆ្នាំ ដកហូតថ្នាំញៀនបានចំនួន០៥កញ្ចប់។
*លើកទី៣៖ នៅយប់ថ្ងៃទី០១ ខែសីហា ឆ្នាំ២០២២ ឃាត់ខ្លួនជនសង្ស័យចំនួន០២នាក់ ឈ្មោះ សួស សារ៉ាត់ ហៅមី ភេទប្រុស អាយុ៣២ឆ្នាំ និង ឈ្មោះ ចាន់ ដារារិទ្ធ ភេទប្រុស អាយុ២៥ឆ្នាំ ដកហូតសម្ភារៈជក់គ្រឿងញៀនមួយចំនួន។
*លើកទី៤៖ នៅថ្ងៃទី២៧ ខែសីហា ឆ្នាំ២០២២ ឃាត់ខ្លួនជនសង្ស័យចំនួន០៤នាក់ ឈ្មោះ យឹម វាសនា ភេទប្រុស អាយុ១៨ឆ្នាំ, ឈ្មោះ យឹម ចាន់សុខលី ភេទប្រុស អាយុ៣៩ឆ្នាំ, ឈ្មោះ សេម ឌីណា ភេទស្រី អាយុ២៦ឆ្នាំ និងឈ្មោះ ញឹង ស្រីលក្ខ័ ភេទស្រី អាយុ២៤ឆ្នាំ ដកហូតថ្នាំញៀនបានចំនួន១៨កញ្ចប់តូចធំ។ ក្នុងប្រតិបត្តិការលើកទី៤នេះផងដែរ មានជនសង្ស័យម្នាក់ឈ្មោះ យឹម វាសនា បានលាន់មាត់គួរឲ្យអស់សំណើចថា "ហាក ចាប់បានពុកខ្ញុំដែរ គាត់ទើបនឹងចេញពីមណ្ឌលម្សិលមិញហ្នឹង"។
*លើកទី៥៖ នៅថ្ងៃទី២៩ ខែសីហា ឆ្នាំ២០២២ ឃាត់ខ្លួនជនសង្ស័យចំនួន០៤នាក់ ឈ្មោះ សម្បត្តិ កែវ ហៅម៉ាប់ ភេទប្រុស អាយុ២៦ឆ្នាំ, ឈ្មោះ ជា ដានីត ភេទស្រី អាយុ២៤ឆ្នាំ, ឈ្មោះ ពៅ បញ្ញាពេជ្រ ភេទស្រី អាយុ១៨ឆ្នាំ, ឈ្មោះ អ៊ុយ ផានិត ភេទប្រុស អាយុ២២ឆ្នាំ ដកហូតថ្នាំញៀនបានចំនួន០៧កញ្ចប់។ ក្នុងប្រតិបត្តិការលើកទី៥នេះ អាវុធហត្ថរាជធានីភ្នំពេញស្រាវជ្រាវ ដឹងថាគ្រឿងញៀនដែលជនសង្ស័យបានចែកចាយ គឺយកមកពីខេត្តកំពង់ស្ពឺ ដូច្នេះកម្លាំងជំនាញអាវុធហត្ថរាជធានីភ្នំពេញ បានពន្លាតដែនដី បន្តទៅសហការជាមួយ កម្លាំងជំនាញអាវុធហត្ថខេត្តកំពង់ស្ពឺ និងមូលដ្ឋានអាវុធហត្ថស្រុកគងពិសី ឃាត់ខ្លួនបានជនសង្ស័យចំនួន០២នាក់ទៀត ឈ្មោះ វ៉ាន សុភ័ក្រ ភេទប្រុស អាយុ២៤ឆ្នាំ និង ឈ្មោះ ភី ចយ ភេទប្រុស អាយុ១៨ឆ្នាំ នៅចំណុច ផ្ទះគ្មានលេខ ផ្លូវលំ ភូមិភានសា ឃុំព្រះនិព្វាន ស្រុកគងពិសី ខេត្តកំពង់ស្ពឺ ដកហូតថ្នាំញៀនបានចំនួន១០កញ្ចប់បន្ថែមទៀត។

គួរបញ្ជាក់ថា ការងារបង្ក្រាបរបស់សមត្ថកិច្ចអាចធ្វើសម្រេចទៅបាន ក៏ដោយសារមានការចូលរួមសហការផ្តល់ព័ត៌មាន ពីប្រជាពលរដ្ឋផងដែរ ដូច្នេះអាវុធហត្ថរាជធានីភ្នំពេញសូមអំពាវនាវនិងលើកទឹកចិត្ត ដល់ប្រជាពលរដ្ឋដែល រស់នៅក្នុង ភូមិសាស្ត្ររាជធានីភ្នំពេញ សូមចូលរួមសហការផ្តល់ព័ត៌មាន និងរាយការណ៍អំពីបទល្មើសដែលខ្លួនបានដឹង មកកាន់លេខទូរស័ព្ទបន្ទាន់១២៩១ ឬតាមប្រព័ន្ធ WhatsApp ឬ Telegram លេខ ០៣១ ៥៥៥ ៥៦៦៩ ឬតាមរយៈផេកហ្វេសប៊ុកដែលមានឈ្មោះថា Phnom Penh Gendarmerie ក្រុមការងារធានារក្សាការសម្ងាត់ជូនបងប្អូនគ្រប់ពេលវេលា៕