(ភ្នំពេញ)៖ លោក ឡី សុភាព ប្រធានសមាគមសម្ព័ន្ធភាពអង្គការ សមាគម និងវិស័យឯកជននៅកម្ពុជា និងជាប្រធានសមាគមសហព័ន្ធវិនិយោគិនកម្ពុជា បានអំពាវនាវដល់បណ្ដាធុរកិច្ចជន ពាណិជ្ជករ អាជីវករទាំងក្នុងប្រព័ន្ធនិងក្រៅប្រព័ន្ធ ត្រូវប្រកាន់ខ្ជាប់នូវត្រឹមត្រូវច្បាស់លាស់ និងមានចំណេះជំនាញ វិជ្ជាជីវៈ ជាពិសេសក្រមសីលធម៌ ដើម្បីមុខរបរ ការងារអាចរីកចម្រើនទៅបាន។
ការលើកឡើងរបស់លោកបែបនេះធ្វើឡើងក្នុងពិធីសំណេះសំណាល និងអាហារសាមគ្គីជាមួយថ្នាក់ដឹកនាំសមាជិក-សមាជិកាយុវជនសេដ្ឋកិច្ចផែនក្រៅប្រព័ន្ធ អមជាមួយពិធីប្រកាសទទួលស្គាល់សមាសភាពសមាគម និងបញ្ចូលសមាជិកសកម្មនៃសមាគមសហព័ន្ធវិនិយោគិនកម្ពុជា សមាគមសហព័ន្ធអភិវឌ្ឍន៍ដីធ្លី និងសំណង់កម្ពុជា និងសមាគមសហព័ន្ធធុរកិច្ចទីផ្សារបណ្ដាញកម្ពុជា នារសៀលថ្ងៃទី២៧ ខែសីហា ឆ្នាំ២០២២ ក្រោមវត្តមានលោក ហោ សេរីវឌ្ឍន៍ អនុប្រធានសភាមុខរបរ និងមីក្រូសហគ្រាសកម្ពុជា ដែលមានសមាជិកចូលរួមសរុប១០០០នាក់។
លោក ឡី សុភាព បានលើកឡើងថា កន្លងមក ធុរកិច្ចជន ពាណិជ្ជករ អាជីវករតែងជួបការលំបាក ដោយសារតែចាប់យកគោលដៅដៃគូសហការខុស មិនត្រូវមុខជំនាញ ប៉ុន្តែពេលនេះមានសមាគម ពាណិជ្ជករ អាជីវក និងធុរកិច្ចជនទាំងអស់នឹងមានភាពងាយស្រួលក្នុងកិច្ចការងារទាំងអស់នេះ ហើយកិច្ចការងារទាំងអស់នេះអាចអនុវត្តទៅបានល្អ ចាំបាច់ត្រូវការឲ្យសមាជិក-សមាជិកាទាំងអស់មានភាពត្រឹមត្រូវច្បាស់លាស់ និងមានចំណេះ ជំនាញ វិជ្ជាជីវៈ ជាពិសេសក្រមសីលធម៌តែម្តង។
លោក ឡី សុភាព ក៏បានផ្តាំផ្ញើដល់សមាជិកដែលត្រូវបានប្រកាសតែងតាំង និងបញ្ចូលជាសមាជិកនាឱកាសនេះ ត្រូវដឹងថាក្នុងនាមជាថ្នាក់ដឹកនាំត្រូវមើលមនុស្សឲ្យបានត្រឹមត្រូវ ហើយត្រូវជ្រើសរើសមនុស្សដោយប្រើគន្លឹះ៤និង៣ ដែលសំដៅដល់មនុស្សដែលមានឆន្ទៈ វីរិយៈ ចិត្តៈ និងវិមង្សា ខណៈគន្លឹះ៣ សំដៅដល់សច្ចៈ ខន្តី និងកត្តញ្ញូតា ជាពិសេសត្រូវមានព្រហ្មវិហាធម៌ក្នុងខ្លួនជាចាំបាច់។
លោកបន្តថា ក្លាយជាមេដឹកនាំមានការតែងតាំង ចាត់តាំង និងបញ្ចូលសមាជិកទៅហើយ យើងត្រូវតែគិតដល់ការងារ៣ ទី១.សមត្ថភាព គឺត្រូវតែមានចំណេះដឹងវិជ្ជាជីវៈ បូកនឹងបទពិសោធន៍ ទី២.លទ្ធភាព ត្រូវតែមានការងារ និងមុខរបរ ដើម្បីធានាលើប្រភពហិរញ្ញវត្ថុត្រឹមត្រូវ និងទី៣ត្រូវតែមានបក្ខពួក ដែលត្រូវមានខ្នងបង្អែកក្នុងរចនាសម្ពន្ធរបស់ខ្លួន ដៃគូសហកា និងអ្នកគាំទ្រ។
នាឱកាសនេះដែរ លោក ហោ សេរីវឌ្ឍន៍ បានប្រកាសគាំទ្រការប្តេជ្ញាចិត្តរបស់សមាគមដែលខិតខំបំពេញភារកិច្ចឲ្យកាន់តែប្រសើរ និងផ្តាំផ្ញើថាក្នុងនាមអ្នកដែលបានទទួលការតែងតាំងថ្មី ក្នុងនោះការតែងតាំងគឺជាការទទួលខុសត្រូវ មានតួនាទីគឺមានការទទួលខុសត្រូវន្ថែម ដូច្នេះការតែងតាំងមិនមែនតែការទទួលតំណែង ហើយយើងសប្បាយរីករាយ អង្គុយធ្វើមន្ត្រីជើងដប់ ឬអ្នកកាន់តំណែងជើងដប់ ដោយគ្រាន់តែបំពេញភារកិច្ចត្រឹមមួយកន្លែងបានទេ។
លោក ហោ សេរីវឌ្ឍន៍ បានគូសបញ្ជាក់ដែរថា បើយើងនិយាយអំពីអំណាចរដ្ឋបាល នោះហើយគឺជាអំណាចដែលទទួលបានពីការតែងតាំង ឯអំណាចទាំង៤ផ្សេងទៀត គឺជាឥទ្ធិពលរបស់បុគ្គលដែលគាត់ខិតខំរៀនសូត្រ ទទួលបានវិជ្ជាជីវៈ ខិតខំរៀនសូត្រឲ្យចេះប្រាស្រ័យទាក់ទង ចេះយល់ពីអ្នកដទៃ ទទួលបានការគាំទ្រពីអ្នកដទៃ ចេះដឹកនាំអ្នកដទៃឲ្យតាមផ្លូវត្រូវ និងចេះប្រមូលផ្តុំកម្លាំង៕
