(បន្ទាយមានជ័យ)៖ នៅព្រឹកថ្ងៃទី២៤ ខែសីហា ឆ្នាំ២០២២នេះ ក្នុងសាលប្រជុំសាលាខេត្តបន្ទាយមានជ័យ មានការបើកកិច្ចប្រជុំស្តីពីការត្រៀម បង្ការ មុនពេលទឹកជំនន់ចូលមកដល់ នៅពេលខាងមុខនេះ ដឹកនាំដោយលោក ឃុន សុខា ទីប្រឹក្សាគណៈកម្មការជាតិគ្រប់គ្រងគ្រោះមហន្តរាយ និងលោក លីសុ វណ្ណារិទ្ធ អភិបាលរងខេត្ត។
កិច្ចប្រជុំនេះ លោក លីសុ វណ្ណារិទ្ធ បានឲ្យដឹងថា ៧ខែ ក្នុងឆ្នាំ២០២២នេះ មានផលប៉ះពាល់ និងមានការខូចខាត៖
១៖ ខ្យល់កន្ត្រាក់ប៉ះពាល់ផ្ទះប្រជាពលរដ្ឋមានចំនួន ៦៨០ខ្នង ឆ្ងន់៩០ខ្នង របើកស័ង្កសីចំនួន ៦.៤០៥សន្លឹក ក្បឿងចំនួន១១១សន្លឹក សាលារៀន៦ខ្នង បង្គោលភ្លើង៧ដើម និងមានមនុស្សរបួស៦នាក់ស្រី១នាក់
២៖ រន្ទះបាញ់មនុស្សស្លាប់ ៣នាក់ស្រី១នាក់ កុមារ១នាក់ របួស១នាក់
៣៖ អគ្គីសភ័យ ឆេះផ្ទះប្រជាពលរដ្ឋ អស់ចំនួន២៤ខ្នង ខូចខាតទាំងស្រុង២៤ខ្នង
៤៖ យុទ្ធភ័ណ្ឌមិនទាន់ផ្ទុះមានមនុស្សរបួសដាច់ជើង១នាក់។
លោក ឃុន សុខា ថ្លែងថា បើតាមការសន្និដ្ឋានរបស់លោក ការប្រែប្រួលអាកាសធាតុ ទឹកជំនន់វាអាចកើតមានឡើងនាពេលខាងមុខ ក្នុងនោះលោកបានឲ្យ
ស្រុក ក្រុង និង ឃុំសង្កាត់ ត្រៀម បង្ការគ្រោះមហន្តរាយមុនរដូវទឹកជំនន់ដែលអាចកើតមានជាយថាហេតុ ក្នុងពេលខាងមុខ ក្នុងការត្រៀមបង្ការទុកជាមុន នៅពេលមានគ្រោះមហន្តរាយ កំឡុងពេលគ្រោះមហន្តរាយ និងក្រោយពេលមានគ្រោះមហន្តរាយដោយទឹកជំនន់នេះ ព្រោះវាមានសារៈសំខាន់ណាស់។
ក្នុងនោះលោកបានធ្វើការណែនាំដល់ស្រុក ក្រុង និង ឃុំសង្កាត់ ត្រូវសហការជាមួយភាគីពាក់ព័ន្ធទាំងអស់ផ្ដល់ព័ត៌មានឲ្យបានច្បាស់លាស់ ជាក់លាក់ និងឆាប់រហ័សពីគ្រោះមហន្តរាយនានា និងពិនិត្យតាមដានជាប្រចាំ អំពីស្ថានភាពអាកាសធាតុ ដែលងាយបង្កឲ្យមានជំនន់ទឹកភ្លៀងក្នុងរដូវវស្សា ពិសេសបញ្ហាគ្រោះទឹកជំនន់ អាចកើតមាននៅក្នុងរដូវវស្សាឆ្នាំនេះ ដើម្បីងាយស្រួលដល់ក្រុមការងារ ក្នុងការចុះជួយប្រជាពលរដ្ឋរងគ្រោះ បានទាន់ពេលវេលាផងដែរ៕
