(ក្រចេះ)៖ យ៉ាងហោចណាស់មាន មនុស្សចំនួន៣នាក់ ត្រូវបានជួយសង្គ្រោះទាន់ពេល និងម្នាក់ទៀតបានបាត់ខ្លួន ក្នុងឧប្បត្តិហេតុទឹកហូរគួចរថយន្ត១គ្រឿងធ្លាក់ចូលទៅក្នុងទឹក។ ហេតុការណ៍នេះ បានកើតឡើងកាលពីវេលាម៉ោង ០០៖៣០នាទីរំលងអាធ្រាត្រ ឈានចូលថ្ងៃទី២៤ ខែសីហា ឆ្នាំ២០២២ នៅចំណុចទំនប់ថ្ពង ភូមិថ្ពង ឃុំស្នួល ស្រុកស្នួល ខេត្តក្រចេះ។

ប្រភពពីសមត្ថកិច្ចស្រុកស្នួល បានឱ្យដឹងថា ជនរងគ្រោះមានគ្នាចំនួន៤នាក់ បើករថយន្ត ម៉ាកតូយូតាព្រូស ពណ៌ទឹក ប្រាក់ ស៊េរីឆ្នាំ២០០៥ ពាក់ស្លាកលេខភ្នំពេញ2AY-8448 ។ ប្រភពបន្តទៀតថា ខណៈពេលមេឃកំពុងធ្លាក់ភ្លៀងខ្លាំងលិចផ្លូវខ្នងទំនប់ ជនរងគ្រោះបានបើករថយន្តឆ្លងកាត់ ក៏ប៉ើងរថយន្តចូលទៅក្នុងប្រឡាយទឹកទំនប់ បណ្តាលរថយន្តរងការខូចខាតទាំងស្រុង រីឯមនុស្សត្រូវគេជួយអន្តរាគមន៍ និងដឹកយកទៅសង្គ្រោះនៅឯមន្ទីរពេទ្យបង្អែកស្រុកស្នួល ចំនួន៣នាក់ ចំណែកម្នាក់ទៀតកំពុងតែបាត់ខ្លួន រហូតមកដល់វេលាម៉ោងជាង ១០ព្រឹកនេះ នៅមិនទាន់រកឃើញនៅឡើយទេ។

ជនរងគ្រោះទី១ ឈ្មោះ ឈួន រតនះ ភេទប្រុស អាយុ៣០ឆ្នាំ រស់នៅភូមិក្បាលស្នួល ឃុំស្នួល ស្រុកស្នួល ខេត្តក្រចេះជាអ្នកបើកបរ, ទី២ ឈ្មោះ ខឹម វីណា ភេទប្រុស អាយុ៣១ឆ្នាំ, ទី៣ឈ្មោះ អ៊ុច សុភា ភេទ ប្រុស អាយុ៣១ឆ្នាំ ដែលអ្នកទាំង៣ រងរបួស ត្រូវបានគេបញ្ជូនព្យាបាលនៅមន្ទីរពេទ្យបង្អែកស្រុកស្នួល។ ដោយឡែក ជនរងគ្រោះម្នាក់ ទៀតឈ្មោះ ទិត្យ មេសា ភេទប្រុស អាយុ៣១ឆ្នាំ កំពុងបាត់ខ្លួន រកពុំទាន់ឃើញនៅឡើយ៕