(ភ្នំពេញ)៖ អភិបាលខេត្តបន្ទាយមានជ័យ លោក សួន បវរ បានចេញលិខិតស្នើសុំឲ្យ អភិបាលខេត្តស្រះកែវ ប្រទេសថៃ កំណត់ពេលវេលា និងទីកន្លែងសម្រាប់ ដំណើរការ នៃការរៀបចំប្រជុំពិភាក្សា ដើម្បីតភ្ជាប់ផ្លូវ និងបើកច្រកទ្វារតំបន់ព្រំដែន៤៣ ស្ថិតនៅឃុំ អូរបីជាន់ ស្រុកអូជ្រៅ ខេត្តបន្ទាយមានជ័យ។

នេះបើយោងតាមលិខិតជូនដំណឹង របស់អភិបាលខេត្តបន្ទាយមានជ័យនៅថ្ងៃទី៣០ ខែឧសភា ឆ្នាំ២០១៦ ដែលអង្គភាព Fresh News ទើបទទួលបាននៅថ្ងៃនេះ។ យោងតាមលិខិតនេះ លោកសួន បវរ បានបញ្ជាក់ថា «ដើម្បីជម្រុញ ការបើកច្រកទ្វារតំបន់ដែនលេខ៤៣ ឲ្យបានឆាប់នាពេលខាងមុខនេះ រដ្ឋបាលខេត្តបន្ទាយមានជ័យ សូមស្នើឯកឧត្តមអភិបាលខេត្តស្រះកែវ នៃប្រទេសថៃ កំណត់ពេលវេលា និងទីកន្លែងសម្រាប់ជួបប្រជុំ ថ្នាក់ខេត្តទាំងពីរ (បន្ទាយមានជ័យ និងខេត្តស្រះកែវ) ដើម្បីពិភាក្សាគ្នា រកដំណោះស្រាយ និងជម្រុញដំណើរការ បើកច្រកជាផ្លូវការ នៅពេលខាងមុខ»។

ការស្នើសុំនេះបានធ្វើឡើង ដោយយោងតាមកិច្ចប្រជុំអភិបាលខេត្តជាប់ព្រំដែននាថ្ងៃទី២៦-២៨ ខែសីហា ឆ្នាំ២០១៥ នៅទីក្រុមបាងកករវាង សម្តេច ក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ ជាមួយលោក អនុពង្ស ផៅចិន្តា រដ្ឋមន្រ្តីក្រសួងមហាផ្ទៃ ប្រទេសថៃ ដោយភាគីទាំង២ បានឯកភាពជាគោលការណ៍ ឲ្យដំណើរការ បើកច្រកទ្វារតំបន់ដែនលេខ៤៣ ប៉ុន្តែរហូតមកដល់ពេលនេះ ច្រកមិនទាន់ដំណើរការជាផ្លូវការនៅឡើយទេ ដោយមូលហេតុ ទីតាំងដែលត្រូវបើកច្រក មានបញ្ហាមួយចំនួន មិនទាន់ដោះស្រាយចប់។ គួរបញ្ជាក់ថា ច្រកទ្វារតំបន់ដែនលេខ៤៣ មានទីតាំងស្ថិតនៅភូមិសាស្រ្តឃុំបីជាន់ ស្រុកអូជ្រៅ ខេត្តបន្ទាយមានជ័យ ឈមនឹងភូមិ ណូនម៉ាក់ម៉ុន ក្រុកគោកស៊ូង ខេត្តស្រះកែវ ប្រទេសថៃ៕