(ភ្នំពេញ)៖ មន្ដ្រីជំនាញសុខាភិបាល បានក្រើនរំលឹកជាថ្មីទៅកាន់ឪពុកម្ដាយ ឬអាណាព្យាបាលគ្រប់រូប កុំបណ្ដោយឲ្យកូនតូចៗរបស់ខ្លួនប្រើប្រាស់នូវគ្រឿងអេឡិចត្រូនិចច្រើនពេក ព្រោះយូរៗទៅអាចប្រឈមនឹងជំងឺផ្លូវចិត្ត ឬអូទីហ្សឹម។
កុមារដែលកើតជំងឺអូទីហ្សឹម ត្រូវបានគេកត់សម្គាល់ថា ដោយសារកុមារនោះចូលចិត្តនៅម្នាក់ឯង មិនចាប់អារម្មណ៍ចំពោះអ្នកនៅជុំវិញខ្លួន អាយុដល់២ឆ្នាំហើយ មិនទាន់ចេះនិយាយ និងពេលខឹងម្តងៗមិនចង់ឲ្យគេលួងលោមជាដើម។
ផ្ដើមចេញពីកត្ដារួមចំណែកនេះហើយ បានជានាយកដ្ឋានសុខភាពផ្លូវចិត្ត និងការបំពានគ្រឿងញៀន នៃក្រសួងសុខាភិបាល ឧបត្ថម្ភដោយអង្គការសុខភាពពិភពលោក ផ្ដើមរៀបចំសេចក្ដីព្រាងផែនការយុទ្ធសាស្ដ្រសុខភាពផ្លូវចិត្ត ២០២២-២០៣០។ កិច្ចប្រជុំពិគ្រោះយោបល់នេះ ត្រូវបានធ្វើឡើងនៅព្រឹកថ្ងៃទី២២ ខែសីហា ឆ្នាំ២០២២នេះ ក្រោមអធិបតីភាព លោក ហុក គឹមចេង អគ្គនាយកបច្ចេកទេសសុខាភិបាល។
បើតាមលោក ហុក គឹមចេង កត្ដាជំងឺអូទីហ្សឹម ក៏រួមផ្សំជំរុញឲ្យក្រសួងសុខាភិបាល ពិសេសនាយកដ្ឋានសុខភាពផ្លូវចិត្ត និងការបំពានគ្រឿងញៀន សិក្សារៀបចំសេចក្ដីព្រាងផែនការយុទ្ធសាស្ដ្រសុខភាពផ្លូវចិត្តនេះឡើងផងដែរ ដើម្បីជាការដាស់តឿន និងពញាក់ស្មារតីរបស់ប្រជាពលរដ្ឋ។
លោក ហុក គឹមចេង បានថ្លែងយ៉ាងដូច្នេះថា «កុមារដែលមិនសូវបាននៅជិតកៀគកើយជាមួយឪពុក ម្ដាយ ជាពិសេសម្ដាយ ហើយបានប្រើប្រាស់គ្រឿងអេឡិចត្រូនិកជាដើម ក្នុងនោះយូរៗទៅអាចធ្វើឲ្យកុមារកើតជាជំងឺផ្លូវចិត្តម្យ៉ាង ដែលយើងហៅថា អូទីហ្សឹម កាន់តែមានច្រើនឡើងៗ។ ផ្ដើមចេញពីការព្រួយបារម្ភនេះហើយ ដែលនាយកដ្ឋានសុខភាពផ្លូវចិត្ត និងបំពានគ្រឿងញៀន ក្រសួងសុខាភិបាល នឹងរៀបចំផែនការយុទ្ធសាស្ដ្រសុខភាពផ្លូវចិត្តឆ្នាំ២០២៣-២០៣០ ឲ្យស្របយុទ្ធសាស្ដ្រសុខាភិបាល សំដៅធ្វើយ៉ាងណាឲ្យប្រជាពលរដ្ឋរបស់យើងរាប់តាំងពីទារក កុមារ ដល់មនុស្សវ័យចំណាស់ មានសុខភាពល្អ ពិសេសសុខភាពផ្លូវចិត្ដ»។
អគ្គនាយកបច្ចេកទេសសុខាភិបាលរូបនេះ បានបញ្ជាក់ទៀតថា ការរៀបចំផែនការសុខភាពផ្លូវចិត្តនេះ គឺមានសារៈសំខាន់ខ្លាំងណាស់ដោយសារតែស្របគ្នាជាមួយផែនការយុទ្ធសាស្ដ្រសុខាភិបាល ២០២៣-២០៣០ ហើយក៏ឆ្លើយតបទៅនឹងសេចក្ដីត្រូវការរបស់ប្រជាជនកម្ពុជា ក្នុងការធ្វើយ៉ាងណាឲ្យសុខមាលភាពប្រជាជនល្អប្រសើរ ពិសេសបញ្ហាសុខភាពផ្លូវចិត្តត្រូវតែរកឲ្យឃើញ និងព្យាបាលឲ្យទាន់ពេលវេលា។
លោកបានអះអាងទៀតថា ការរៀបចំផែនការយុទ្ធសាស្ដ្រនេះ ក៏មានការគាំទ្រពីអង្គការសុខភាពពិភពលោក និងអង្គការជាដៃគូជាច្រើន ព្រមទាំងមន្ដ្រីជំនាញឯកទេសពីមន្ទីរពេទ្យថ្នាក់ជាតិ មន្ទីរពេទ្យខេត្ត អ្នកជំនាញការជាតិ អន្ដរជាតិជាច្រើនទៀត ដើម្បីចូលរួមរៀបចំការនេះមានលក្ខណៈគ្រប់ជ្រុងជ្រោយ។ ដោយសារបញ្ហាសុខភាពផ្លូវចិត្តនេះពាក់ព័ន្ធពហុវិស័យ ដូច្នេះក៏មានការចូលរួមពីក្រសួងមហាផ្ទៃ និងក្រសួងសង្គមកិច្ច អតីតយុទ្ធជន និងយុវនីតិសម្បទាផងដែរ។
គួរជម្រាបថា របាយការណ៍ស្រាវជ្រាវបានបង្ហាញឲ្យដឹងថា មុនពេលមានការរាតត្បាតជំងឺកូវីដ១៩ នៅលើពិភពលោក មានអ្នកជំងឺផ្លូវចិត្តប្រមាណ៩៧០លាននាក់ (ប្រេវ៉ាឡង់ចំណុចនៃជំងឺផ្លូវចិត្តមានប្រមាណ១៣ភាគរយ) ក្នុងចំណោមប្រជាជន៨នាក់ មានម្នាក់មានជំងឺផ្លូវចិត្ត៕
