(ភ្នំពេញ)៖ នៅចុងខែកញ្ញា ឆ្នាំ២០២២ខាងមុខនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា មានដំណើរទស្សនកិច្ចក្រៅប្រទេសដ៏មមាញឹកមួយ ទៅកាន់សហរដ្ឋអាមេរិក ប្រទេសគុយបា និងប្រទេសជប៉ុនផងដែរ។

ថ្លែងក្នុងអញ្ជើញប្រគល់សញ្ញាបត្រ ជូននិស្សិតសាកលវិទ្យាល័យពុទ្ធិសាស្ត្រ ៦២៣នាក់ នៅព្រឹកថ្ងៃទី១៧ ខែសីហា ឆ្នាំ២០២២នេះ សម្តេចតេជោ ហ៊ុន សែន បានបញ្ជាក់ថា នៅថ្ងៃទី២៣ ខែកញ្ញា ឆ្នាំ២០២២ សម្តេច នឹងត្រូវថ្លែងសុន្ទរកថាដោយផ្ទាល់ នៅអង្គការសហប្រជាជាតិ (UN) សហរដ្ឋអាមេរិក។

បន្ទាប់ពីបញ្ចប់ការងារនៅអាមេរិក សម្តេចនឹងត្រូវបន្តដំណើរតាមជើងហោះ ទៅកាន់ប្រទេសគុយបា ក្នុងការបំពេញទស្សនកិច្ច រយៈពេល២ថ្ងៃ គឺថ្ងៃទី២៤-២៥ ខែកញ្ញា ឆ្នាំ២០២២។

បន្ទាប់មកទៀត ក្រោយចប់ទស្សនកិច្ចនៅគុយបា សម្តេចតេជោនឹងត្រូវដឹកនាំគណៈប្រតិភូ បន្តដំណើរទៅកាន់ទីក្រុងតូក្យូ ប្រទេសជប៉ុន ដើម្បីចូលរួមពិធីបុណ្យសព អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ នៅថ្ងៃទី២៧ ខែកញ្ញា ឆ្នាំ២០២២។

សម្តេចតេជោ ហ៊ុន សែន បានថ្លែងយ៉ាងដូច្នេះថា «ក្នុងខែកញ្ញាខាងមុខនេះ ខ្ញុំត្រូវទៅអានសុន្ទរកថានៅមហាសន្និបាតអង្គការសហប្រជាជាតិ ដោយផ្ទាល់ គឺមិនអានតាម Online ដូចពេលមុនទេ គឺខ្ញុំទៅដោយផ្ទាល់ ដោយសារឆ្នាំនេះយើងជាប្រធានអាស៊ានតែម្តង ហើយកាលមុននេះ គ្រោងទុកថានឹងអាចសុន្ទរកថានៅល្ងាចថ្ងៃទី២៣ ខែកញ្ញា ប៉ុន្តែឥឡូវនេះត្រូវបានផ្លាស់ប្តូរជាមួយបង់ក្លាដេស ដែលគាត់មានម៉ោងពេលព្រឹក សុំឲ្យគាត់ទៅអានម៉ោងយើងនៅពេលល្ងាច ឯខ្ញុំមកអាននៅពេលព្រឹកវិញ។ បន្ទាប់ចេញពីនោះមក ល្ងាចថ្ងៃទី២៣ ខែកញ្ញា ខ្ញុំទៅហោះធ្វើទស្សនកិច្ចនៅគុយបា ដែលទស្សនកិច្ចនេះ ធ្វើឡើងនៅថ្ងៃទី២៤-២៥ ខែកញ្ញា។ រសៀលថ្ងៃទី២៥ ខែកញ្ញា ខ្ញុំត្រូវហោះចេញពីឡាហាវ៉ា មកកាន់ទីក្រុងតូក្យូ។ មកដល់ទីក្រុងតូក្យូ ល្ងាចថ្ងៃទី២៦ ខែកញ្ញា ហើយថ្ងៃទី២៧ ខែកញ្ញា ខ្ញុំនឹងចូលរួមបុណ្យសព អតីតនាយករដ្ឋមន្ត្រីជប៉ុន ស៊ិនហ្សូ អាបេ ដែលជាមិត្តភក្តិដ៏ល្អរបស់យើង»។

សម្តេចតេជោនាយករដ្ឋមន្ត្រីបានថ្លែងបញ្ជាក់ថា ចំពោះការធ្វើដំណើរទៅក្រៅប្រទេស នៅពេលបច្ចុប្បន្ននេះ មានភាពងាយស្រួលបើបើប្រៀបធៀបជាមួយសម័យមុន ដោយសារបច្ចុប្បន្នសម្តេចអាចធ្វើការពីចម្ងាយបាន តាមរយៈប្រព័ន្ធបច្ចេកវិទ្យាព័ត៌មាន។

ជាមួយគ្នានេះ សម្តេចតេជោ ហ៊ុន សែន ក្នុងនាមជាប្រធានអាស៊ានផងនោះ បានថ្លែងបញ្ជាក់ថា នៅខែវិច្ឆិកា ឆ្នាំ២០២២ខាងមុខនេះ សម្តេចមានភារកិច្ចរវល់ច្រើន ក្នុងការប្រជុំទាំងក្នុងប្រទេស និងក្រៅប្រទេស៕