(ក្រចេះ)៖ លោកបណ្ឌិត កៅ ម៉ាឌីឡែន ប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដី ខេត្តក្រចេះ នៅថ្ងៃទី០៧ ខែសីហា ឆ្នាំ២០២២នេះ បានអញ្ជេីញចាប់ឆ្នោតប្រគល់ដីជូនប្រជាពលរដ្ឋទីទាល់ក្រចំនួន១៨គ្រួសារ ដែលសព្វថ្ងៃរស់នៅលើដីចំណីផ្លូវ ក្នុងសង្កាត់ក្រចេះ ក្រុងក្រចេះ ជាអំណោយដ៏ថ្លៃថ្លារបស់លោក វ៉ា ថន អភិបាលខេត្តក្រចេះ។
លោកបណ្ឌិត កៅ ម៉ាឌីឡែន បានឱ្យដឹងថា ការបែងចែកដីលំនៅដ្ឋានជូនប្រជាពលរដ្ឋទាំង១៨គ្រួសារនេះ គឺជាការគិតគូរ និងយកចិត្តទុក្ខដាក់ខ្ពស់របស់លោក វ៉ា ថន អភិបាលខេត្តក្រចេះ ដែលបានមេីលឃេីញពីទុក្ខលំបាករបស់ប្រជាពលរដ្ឋ និងចំណាយថវិកាផ្ទាល់ខ្លួន និងស្វែងរកទីតាំងដីសម្រាប់ផ្ដល់ជូនប្រជាពលរដ្ឋ ដើម្បីតាំងលំនៅដ្ឋានឱ្យបានសមរម្យ មានសុវត្ថិភាព ផាសុខភាព នៅជិតសាលារៀន មណ្ឌលសុខភាព និងផ្សារជាដើម។
លោកបណ្ឌិតបានបញ្ជាក់ថា ដីដែលប្រជាពលរដ្ឋទទួលបានពេលនេះ មិនមែនជាដីសប្បទានទេ ប៉ុន្តែ ជាដីរបស់លោកអភិបាលខេត្តចំណាយថវិកាផ្ទាល់ខ្លួនទិញជូនបងប្អូនក្នុង១គ្រួសារ ទទួលបានដីទំហំ ៨គុណ ២០ម៉ែត្រ ដែលមានទីតាំងជាប់អនុវិទ្យាល័យ ហ៊ុន សែន កាប៉ូ និងជាប់ផ្លូវជាតិលេខ៧ ស្ថិតនៅភូមិកាប៉ូ១ សង្កាត់អូរឫស្សី ក្រុងក្រចេះ ខេត្តក្រចេះ។
ក្នុងឱកាសនោះលោក ឡាយ លីតា ជាតំណាងរបស់ប្រជាពលរដ្ឋបានសម្ដែងអំណរគុណយ៉ាងកក់ក្តៅចំពោះទឹកចិត្តដ៏ថ្លៃថ្លាបំផុតរបស់លោកអភិបាលខេត្ត ដែលបានផ្ដល់ទីតាំងដីលំនៅដ្ឋានដល់ពួកគាត់ទាំង ១៨គ្រួសារ ដែលជួបការលំបាកខ្វះខ្វាត គ្មានដីធ្លី សង់លំនៅដ្ឋាន ប៉ុន្តែពេលនេះ លោកអភិបាលខេត្តបានចែកដីឱ្យសម្រាប់សង់លំនៅដ្ឋាន ពួកគាត់ពិតជាសប្បាយចិត្តរកអ្វីប្រៀបស្មើពុំបានឡើយ៕
