(ភ្នំពេញ)៖ អត្តសញ្ញាណប័ណ្ណសញ្ជាតិខ្មែរ របស់ប្រជាពលរដ្ឋជិត២៤ម៉ឺនសន្លឹក ដែលត្រូវបានបញ្ជូនទៅកាន់នាយកដ្ឋានអត្តសញ្ញាណប័ណ្ណ ត្រូវបានបោះពុម្ភរួចហើយ ប៉ុន្តែគិតត្រឹមថ្ងៃទី២៧ ខែឧសភា ឆ្នាំ២០១៦ តាមបណ្តាស្នងការដ្ឋានរាជធានី-ខេត្តចំនួន២៤ (លើកលែងតែស្នងការដ្ឋានខេត្តកែប) មិនទាន់បានទៅយកពីនាយកដ្ឋានមកចែកជូនប្រជាពលរដ្ឋ​ នៅតាមមូលដ្ឋាននៅឡើយទេ។ យោងតាមរបាយការណ៍ បង្ហាញអំពីចំនួនអត្តសញ្ញាណប័ណ្ណសញ្ជាតិខ្មែររបស់នាយកដ្ឋានអត្តសញ្ញាណប័ណ្ណ ដែលអង្គភាព Fresh News ទទួលបាននៅរសៀលថ្ងៃទី២៨ ខែឧសភា ឆ្នាំ២០១៦នេះ បានបង្ហាញថា «អត្តសញ្ញាណប័ណ្ណសញ្ជាតិខ្មែរចំនួន២៣៨១០៧សន្លឹក ត្រូវបានបោះពុម្ភរួចហើយ តែស្នងការរាជធានី-ខេត្តចំនួន២៤ មិនទាន់មកទទួលយកនៅឡើយទេ»។

របាយការណ៍ដដែលបានបន្តថា សម្រាប់ស្នងការដ្ឋានរាជធានីភ្នំពេញ មានចំនួន១៣៩៧៧សន្លឹក ខេត្តកណ្តាល២៧១៣សន្លឹក ខេត្តកំពង់ស្ពឺ៦៩១៧សន្លឹក ខេត្តកំពង់ឆ្នាំង៣៣៧១៦សន្លឹក ខេត្តព្រៃវែង៥៣៨៤សន្លឹក ខេត្តកំពង់ចាម១២៣សន្លឹក ខេត្តក្រចេះ១៣៥៧សន្លឹក ខេត្តស្ទឹងត្រែ៥២៧៩សន្លឹក ខេត្តស្វាយរៀង៧៤៣៣សន្លឹក ខេត្តតាកែវ១៦៧៨៩សន្លឹក ខេត្តកំពត៤៨៧០សន្លឹក ខេត្តព្រះសីហនុ២២៩៥សន្លឹក ខេត្តកោះកុង៥៤៩សន្លឹក ខេត្តកំពង់ធំ៤០០៧សន្លឹក ខេត្តពោធិ៍សាត់៣៦៦៨សន្លឹក ខេត្តបាត់ដំបង២១៥១៤សន្លឹក ខេត្តសៀមរាប៣៣២២៦សន្លឹក ខេត្តបន្ទាយមានជ័យ៤១៦៩០សន្លឹក ខេត្តឧត្តរមានជ័យ៦៥១៩សន្លឹក ខេត្តប៉ៃលិន៤៨៨សន្លឹក ខេត្តព្រះវិហារ៥២១៣សន្លឹក ខេត្តមណ្ឌលគិរី៣៣៦៧សន្លឹក ខេត្តរតនគិរី១៨១៤សន្លឹក និងខេត្តត្បូងឃ្មុំ១៥១៩៩សន្លឹក។

សូមបញ្ជាក់ថា កាលពីពេលថ្មីៗនេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានជំរុញឱ្យមន្រ្តីជំនាញនានា ពន្លឿនការធ្វើអត្តសញ្ញាប័ណ្ណជូនប្រជាពលរដ្ឋ ហើយឱ្យប្រជាពលរដ្ឋ រាយការណ៍បើសិនជាមានមន្រ្តីនៅមូលដ្ឋានមានភាពអសកម្ម នៅក្នុងដំណើរការធ្វើអត្តសញ្ញាណប័ណ្ណនេះ។

Facebook សម្តេចតេជោ ហ៊ុន សែន បានសរសេរថា៖ «អត្តសញ្ញាណប័ណ្ណសញ្ជាតិខ្មែរ គឺតម្រូវឱ្យប្រជាពលរដ្ឋមានគ្រប់ៗគ្នា ដើម្បីសំគាល់ខ្លួនផង និងសម្រាប់ចូលរួមបោះឆ្នោតផង។ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានមានប្រសាសន៍បញ្ជាក់ជាច្រើនលើកមកហើយថា សេវាតម្រូវការចាំបាច់ដូចជាការធ្វើ អត្តសញ្ញាណ​ប័ណ្ណ​សញ្ជាតិខ្មែរ គឺត្រូវធ្វើឱ្យបានឆាប់ជូនប្រជាពលរដ្ឋ។ ដូច្នេះប្រសិនបើបងប្អូនមានបញ្ហានៅមិនទាន់បានទទួលអត្តសញ្ញាណប័ណ្ណថ្មីទេ គឺពេលនេះក្រុមការងារ (អគ្គនាយកដ្ឋាន​អត្តសញ្ញាណកម្ម) នឹងដោះស្រាយជូនបងប្អូនទូទាំងប្រទេស ឱ្យបានឆាប់តែម្តង»។

ការអំពាវនាវជាថ្មី របស់សម្តេចតេជោ ហ៊ុន សែន បានធ្វើឡើងបន្ទាប់ពីមានប្រជាពលរដ្ឋមួយចំនួនបានរាយការណ៍ អំពីភាពយឺតយ៉ាវ ក្នុងការធ្វើអត្តសញ្ញាណប័ណ្ណសញ្ជាតិខ្មែរជូនពួកគេ។ ពលរដ្ឋបានរាយការណ៍ជូនសម្តេចតេជោ ហ៊ុន សែនថា រយៈពេលនៃការធ្វើអត្តសញ្ញាណប័ណ្ណ នៅតាមមូលដ្ឋានរបស់ពួកគេគឺ យូរខ្លាំងណាស់ អ្នកខ្លះរហូតដល់ជាងមួយឆ្នាំក៏មាន ហើយមិនទាន់បានទទួល ID នៅឡើយ។

សម្តេចបានចោទសួរថា តើមានករណីពិតបែបនេះពិតមែនទេ? ពាក់ព័ន្ធករណីនេះប្រជាពលរដ្ឋជាច្រើនបានសម្តែងការពេញចិត្ត ចំពោះការយកចិត្តទុកដាក់ពីសំណាក់សម្តេចតេជោ ហ៊ុន សែន និងមានភាព​ជឿជាក់លើ Facebook សម្តេចតេជោ ដែលពួកគាត់ផ្តល់ព័ត៌មានពិតៗដល់នាយករដ្ឋមន្រ្តី តាមរយៈ Facebook ហើយប្រជាពលរដ្ឋបានសម្តែងការថ្លែងអំណរគុណ ចំពោះជំរុញ​ឱ្យមន្រ្តីជំនាញនានា ពន្លឿនការធ្វើអត្តសញ្ញាប័ណ្ណ​ជូនប្រជាពលរដ្ឋឲ្យបានឆាប់។

ជាមួយគ្នានេះ ក្រសួងមហាផ្ទៃ ក៏បានបង្ហាញនូវគេហទំព័រដើម្បីឲ្យប្រជាពលរដ្ឋ អាចចូលទៅសួរនាំបានតាមរយៈគេហទំព័រ www.gdi.gov.kh និង Facebook Page https://www.facebook.com/gdi.gov.kh/ និងលេខទូរស័ព្ទសម្រាប់ទំនាក់ទំនង បើសិនមានចម្ងល់ណាមួយចំពោះរឿង​ អត្តសញ្ញាណប័ណ្ណនេះ៕