(ភ្នំពេញ)៖ នៅថ្ងៃម្សិលមិញ និងនៅថ្ងៃទី២៨ ខែឧសភា ឆ្នាំ២០១៦នេះ បងប្អូនអាជីវករដែលលក់ដូរ​នៅតាមផ្លូវលេខ១៣៩ នៃផ្សារសេរីភាព​ជាង២០នាក់ ក្នុងសង្កាត់វាលវង់ ខណ្ឌ៧មករា បានចេញ​មកតវ៉ា ដោយចោទប្រកាន់​ទៅលើក្រុមហ៊ុន​សំណង់មួយមានឈ្មោះ «ហុងលីគ្រុប» បានសាងសង់ ហើយហ៊ុព័ទ្ធរបងចូលតាម​ផ្លូវដែលពួកគាត់​កំពុងតែប្រកប​របរអាជីវកម្ម។ ចំពោះការតវ៉ា និងការចោទ​ប្រកាន់ទៅលើនេះ សំណង់របស់ក្រុមហ៊ុនខាងលើ ត្រូវបានអភិបាលខណ្ឌ៧មករា លោក លឹម សុភា ចេញមកបញ្ជាក់ថា តាមពិតទៅខាងក្រុមហ៊ុន បានសង់សំណង់របស់ខ្លួន​មានច្បាប់​អនុញ្ញាតត្រឹមត្រូវ និងមានការវាយតម្លៃរួចហើយ ពីគណៈកម្មការជំនាញ មិនដូចជាការលើកឡើងរបស់បងប្អូនអាជីវករ។

លោកអភិបាលខណ្ឌបានប្រាប់ភ្នាក់ងារ Fresh News នៅរសៀលថ្ងៃទី២៨ ខែឧសភា ឆ្នាំ២០១៦នេះថា តាមពិតបងប្អូនអាជីវករ​ទៅវិញទេ ដែលធ្វើការលក់ដូរនៅលើ​ចិញ្ចើមផ្លូវលេខ១៣៩ ខុសច្បាប់ និងបង្កភាពអនាធិបតេយ្យទៅវិញទេ តែអាជ្ញាធររបស់លោកកន្លងទៅមានការយោគយល់ ចេះតែបិទភ្នែកម្ខាងទៅ ដើម្បីឲ្យបងប្អូនអាចរកស៊ីបានដើម្បីចិញ្ចឹមជីវភាពគ្រួសារ។ លោក លឹម សុភា បានបន្តទៀត​ថា មូលហេតុដែលនាំ​ក្រុមហ៊ុនគ្រប និងហ៊ុព័ទ្ធរបងខាងលើនេះ ដោយសារតែបង្ការ និងទប់ស្កាត់គ្រោះថ្នាក់ ដែលអាចកើតមានឡើង ជាយថាហេតុ​ណាមួយ ពេលកំពុងសាងសង់នោះ។

អភិបាល​ខណ្ឌរូបនេះ បានបញ្ជាក់ថា «រឿងនេះ ខាងក្រុមហ៊ុន​គេមានច្បាប់អនុញ្ញាត និងមានការវាយតម្លៃត្រឹមត្រូវហើយពីមន្រ្តីជំនាញ តែបងប្អូនអាជីវករទៅវិញទេ ដែលលក់លើចិញ្ចើមផ្លូវខុសច្បាប់ និងបង្កភាពអនាធិបតេយ្យនោះ តែអាជ្ញាធរយើងចេះ​តែបិទភ្នែកទៅ​សម្រាប់ជីវភាពពួកគាត់»។ យ៉ាងណាក៏ដោយ ខាងអាជ្ញាធរខណ្ឌ នឹងទទួលយកការតវ៉ា របស់អាជីវករទៅដោះស្រាយបន្តទៀត តាមច្បាប់ទម្លាប់។

លោកថ្លែងថា «នៅថ្ងៃចន្ទសប្តាហ៍ក្រោយនេះ យើងនឹងជួបពិភាក្សាគ្នាដោះស្រាយរវាងបងប្អូនអាជីវករ និងខាងក្រុមហ៊ុនខុនដូរ ហើយ»៕