(ភ្នំពេញ)៖ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលនៃ មូលនិធិគន្ធបុប្ផាកម្ពុជា (ម.គ.ក.) បានដឹកនាំកិច្ចប្រជុំក្រុមប្រឹក្សាបរធនបាល លើកទី៦ ដោយមានវត្តមានចូលរួមពីលោកសាស្ត្រាចារ្យវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល នាថ្ងៃទី៤ ខែសីហា ឆ្នាំ២០២២ មានដើម្បីពិនិត្យវឌ្ឍនភាពការងាររបស់មន្ទីរពេទ្យគន្ធបុប្ផា និងបង្កើនការកៀរគរវិភាគទានសប្បុរសធម៌ពីគ្រប់ទិសទី ក្នុងគោលដៅរួមចំណែកទ្រទ្រង់ដល់ប្រតិបត្តិការ និងនិរន្តរភាពរបស់មន្ទីរពេទ្យគន្ធបុប្ផា ខណៈឆមាសទី១ឆ្នាំ២០២២នេះ មន្ទីរពេទ្យនេះបានពិនិត្យ និងព្យាបាល កុមារ និងស្រ្តី ជិត៤០ម៉ឺននាក់ ដោយចំណាយថវិកាប្រមាណជាង១៥លានដុល្លារអាមេរិក។

តាមរយៈសេចក្តីប្រកាសព័ត៌មានរបស់មូលនិធិគន្ធបុប្ផាកម្ពុជា ដែលបណ្តាញព័ត៌មាន Fresh News ទទួលបាននៅថ្ងៃទី៥ សីហានេះ បានឱ្យដឹងថា ក្នុងរយៈពេល៦ខែ ដើមឆ្នាំ២០២២នេះ មន្ទីរពេទ្យគន្ធបុប្ផា បានប្រើប្រាស់ថវិកាសរុបចំនួនប្រមាណ ១៥.៩៧ លានដុល្លារអាមេរិក (ដោយមិនរាប់បញ្ចូលចំណាយថវិកាជាតិ តាមរយៈក្រសួងសុខាភិបាល) ដើម្បីផ្តល់សេវាពិនិត្យ ពិគ្រោះ និងព្យាបាលទារក កុមារ និងស្ត្រីមានផ្ទៃពោះ ដោយឥតគិតថ្លៃ។ ក្នុងចំណោមថវិកាដែលបានចំណាយនេះ ក្នុងនោះថវិកាចំនួន ៦.៩២ លានដុល្លារអាមេរិក ទទួលបានពីប្រភពនៅក្នុងស្រុក រួមមាន៖ការបរិច្ចាគដោយផ្ទាល់នៅមន្ទីរពេទ្យចំនួន ៩១៦ ៦៥៧ ដុល្លារអាមេរិក, ការឧបត្ថម្ភរបស់មូលនិធិគន្ធបុប្ផាកម្ពុជាជាង៣ លានដុល្លារ និងការផ្ទេរថវិការបស់រាជរដ្ឋាភិបាលដោយផ្ទាល់ចំនួន ២.៩លានដុល្លារអាមេរិក ។

ក្នុងរយៈពេល៦ខែឆ្នាំនេះ មន្ទីរពេទ្យគន្ធបុប្ផាបានពិនិត្យ និងព្យាបាលអ្នកជំងឺជិត៤០ម៉ឺននាក់។ ក្នុងនោះអ្នកជំងឺកុមារបានមកពិគ្រោះ និងព្យាបាលនៅក្នុងផ្នែកពិគ្រោះជំងឺក្រៅចំនួន ២៦៦ ៣៤២ នាក់
អ្នកជំងឺកុមារបានចូលមកសម្រាកព្យាបាលក្នុងមន្ទីរពេទ្យចំនួន ៤៧ ២៧០ នាក់, ស្រ្តីមានផ្ទៃពោះបានពិនិត្យ និងព្យាបាលនៅផ្នែកពិគ្រោះជំងឺក្រៅសម្ភព ៣៨ ៤២៦ នាក់ ,ស្រ្តីមានផ្ទៃព្រោះបានសម្រាក និងសម្រាលកូន ចំនួន៨ ៩១៨ នាក់
,ព្យាលបាលជំងឺគ្រុនឈាមធ្ងន់ធ្ងរចំនួន ៩៤៩ នាក់ , និងវះកាត់សរុបបានចំនួន ១០ ៥៣៧ នាក់។

ដោយឡែកការកៀរចំណូលរបស់មូលនិធិគន្ធបុប្ផាកម្ពុជា ក្នុងឆមាសទី១ ឆ្នាំ២០២២ ទទួលបានចំណូលសរុបចំនួនប្រមាណ ១៦.០៣ លានដុល្លារអាមេរិកកើនឡើង២% បើធៀបនឹងឆមាសទី១ ឆ្នាំ២០២១។ ការកើនឡើងនេះ ដោយសារ៖ ការកើនឡើងវិញបណ្ដើរៗ នៃការកាត់កម្រៃសំបុត្រចូលទសន្សនាតំបន់រមណីយដ្ឋានអង្គរ ដែលមានចំនួន ៥៣ ០៩២ ដុល្លារអាមេរិក កើនឡើង ១៩១% បើធៀបនឹងរយៈពេលដូចគ្នា ក្នុងឆ្នាំ២០២១, ចំណូលការប្រាក់ចំនួន ២.០៧ លានដុល្លារអាមេរិក កើនឡើង ៧២% បើធៀបនឹងរយៈពេលដូចគ្នា ក្នុងឆ្នាំ២០២១ និងការបរិច្ចាគដោយផ្ទាល់ទៅមន្ទីរពេទ្យគន្ធបុប្ផាទាំងប្រាំទីតាំង ៩១៦ ៦៥៧ ដុល្លារអាមេរិក កើនឡើង ៦%បើធៀបទៅនឹងឆមាសទី១ ក្នុងឆ្នាំ ២០២១។

អគ្គបណ្ឌិតសភាចារ្យ ឧបនាយករដ្ឋមន្រ្តី បានវាយតម្លៃខ្ពស់លើការខិតខំប្រឹងប្រែងបំពេញការងាររបស់គណៈគ្រប់គ្រង និងលោកគ្រូអ្នក-គ្រូពេទ្យនៃមន្ទីរពេទ្យគន្ធបុប្ផាកម្ពុជាទាំងប្រាំទីតាំង និងបានលើកទឹកចិត្តឱ្យបំពេញការងារដ៏មានសារៈសំខាន់នេះថែមទៀត ដើម្បីចូលរួមកសាង និងអភិវឌ្ឍទំពាំងស្នងឬស្សីរបស់ប្រទេសជាតិ និងបានណែនាំឱ្យក្រុមការងារលេខាធិការដ្ឋានមូលនិធិគន្ធបុប្ផាកម្ពុជា ខិតខំបន្ថែមទៀត ក្នុងការផ្សព្វផ្សាយដល់សាធារណជនឱ្យបានយល់ដឹងអំពីវត្តមាន និងសារៈសំខាន់នៃការបង្កើតមូលនិធិគន្ធបុប្ផាកម្ពុជា និងបន្តជំរុញការបង្កើតគណៈកម្មការទ្រទ្រង់មូលនិធិគន្ធបុប្ផាកម្ពុជាប្រចាំក្រសួង-ស្ថាប័នរដ្ឋ និងក្រុមហ៊ុនឯកជននានា ដើម្បីផ្សព្វផ្សាយ និងបង្កើនការកៀរគរវិភាគទានសប្បុរសធម៌ពីគ្រប់ទិសទី ក្នុងគោលដៅរួមចំណែកទ្រទ្រង់ដល់ប្រតិបត្តិការ និងនិរន្តរភាពរបស់មន្ទីរពេទ្យគន្ធបុប្ផា និងលើកស្ទួយស្មារតី “ខ្មែរជួយខ្មែរ” ឱ្យបានកាន់តែទូលំទូលាយ ៕