(ប៉េកាំង)៖ វិចារណកថាមួយ ដែលចេញផ្សាយដោយកាសែតទីភ្នាក់ងារព័ត៌មានផ្លូវការណ៍របស់ចិន បាន​ចំអកឡុងឡឺយ​ដល់​ប្រធានាធិបតីថ្មីរបស់តៃវ៉ាន់ ថាជាស្ត្រី «ជ្រុលនិយម ឬរចនាបទជ្រុលនិយម» ក៏ដោយសារតែគាត់ជា​មនុស្សស្រី ដែល​មិនទាន់រៀបការ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២៧ ខែឧសភា។

នៅក្នុងវិចារណកថា ដែលចេញផ្សាយដោយសារទីភ្នាក់ងារសារព័ត៌មានស៊ិនហួ បានលើកឡើងថា លោកស្ត្រី Tsai Ing-wen ជាមនុស្សមិនទាន់រៀបការ ខ្វះភាពកក់ក្ដៅក្នុងគ្រួសារ ខ្វះអារម្មណ៍ស្និទ្ធស្នាល ជីវិតមនោសញ្ចេតនា ដូច្នេះហើយ​ទើប​គាត់ប្រកាន់គោលគំនិតជ្រុលនិយមខុសប្រក្រតី។

ជាងនេះទៅទៀត នៅក្នុងវិចារណកថា បានសរសេរថា ក្នុងមានជាអ្នកនយោបាយស្ត្រី ដែលមិនទាន់រៀបការ គឺបន្ទុកនូវ​ផ្លូវអារម្មណ៍ច្រើន ដោយសារតែគ្មានស្នេហា ក្ដីស្រឡាញ់ គ្រួសារ ដូច្នេះគាត់នឹង​បង្ហាញអារម្មណ៍របស់គាត់ទៅតាម​ការ​ដឹកនាំ ដែលនាំឲ្យ​ប្រទេសមានភាពជ្រុលនិយម។

គួរបញ្ជាក់ផងដែរថា លោក Tsai Ing-wen ទើបតែប្រកាសចូលកាន់តំណែងជាប្រធានាធិបតីតៃវ៉ាន់ កាលពីថ្ងៃសុក្រ សប្ដាហ៍មុន ហើយលោកស្ត្រីគឺជាប្រធានាធិបតីដំបូងគេអង្អស់របស់តៃវ៉ាន់ និងជាប្រធានាធិបតីដែលបង្ហាញជំហខ្ពស់​ក្នុង​ការទាមទារ​ឯករាជពីចិន ខណៈដែលចិនបានប្រកាសនឹងប្រើកម្លាំងយោធា បើសិនជាតៃវ៉ាន់ហ៊ាន​ប្រកាសឯករាជ៕