(សេអ៊ូល)៖​ អគ្គលេខាធិការអង្គការសហប្រជាជាតិ (UN) លោក បាន គីមួន អាចនឹងឈរឈ្មោះ ជាបេក្ខភាព​ប្រធានាធិបតីកូរ៉េខាងត្បួង នៅក្នុងការបោះឆ្នោតជ្រើសរើស ប្រធានាធិបតី​ថ្មីនៅឆ្នាំ ២០១៧ នេះបើយោងតាមការ​ចេញផ្សាយ​ របស់សារព័ត៌មានកូរ៉េខាងត្បួង។

លោក គីមួន នឹងលាឈប់ពីពីប្រមុខ UN នៅចុងឆ្នាំនេះ ហើយលោកនឹងត្រឡប់មកកាន់​ទឹកដីកំណើត របស់ខ្លួនវិញ​នៅ​ថ្ងៃទី០១ ខែមករា ឆ្នាំ២០១៧ ពោលគឺលោកមានពេល ១២ខែ ដើម្បីត្រៀមខ្លួនចូលរួម នៅក្នុងយុទ្ធនាការបោះឆ្នោត ដែលនឹងចាប់ផ្ដើមនៅខែធ្នូ ឆ្នាំ២០១៧។

ថ្លែងនៅក្នុងវេទិកាមួយ ក្នុងដំណើរទស្សនកិច្ចនៅកូរ៉េខាងត្បួង លោក គីមួន បាននិយាយថា «ពេលខ្ញុំត្រឡប់មកពី UN វិញ, ខ្ញុំនឹងពិចារណា បន្ថែមទៀតទៅលើតួនាទីរបស់ខ្ញុំក្នុង​នាមជា​ពលរដ្ឋកូរ៉េខាងត្បួងម្នាក់។ ប៉ុន្តែនៅពេលនេះ ខ្ញុំត្រូវបំពេញតួនាទី របស់ខ្ញុំឲ្យបានល្អបំផុត»។

គួរបញ្ជាក់ផងដែរថា លោក គីមួន គឺជាអតីតរដ្ឋមន្ត្រីការបរទេស​របស់កូរ៉េខាងត្បួង ចន្លោះឆ្នាំ ២០០៤-២០០៦ ក្នុងសម័យ​លោកប្រធានាធិបតី Roh Moo-Hyun៕