(ឡុងដ៍)៖ ចក្រភពអង់គ្លេស នឹងប្រឈមមុខជាមួយនឹង លក្ខខណ្ឌដ៏តឹងរឹងបំផុត ក្នុងនាមជាសមាជិកអង្គការពាណិជ្ជ​កម្មពិភពលោក (WTO) បើសិនជា​ចក្រភពអង់គ្លេស សម្រេចចិត្តចាកចេញពីសហភាពអឺរ៉ុប (EU)  នេះបើយោងតាមការចេញផ្សាយ របស់សារព័ត៌មាន Channel News Asia ចេញផ្សាយនៅថ្ងៃទី២៦ ខែឧសភា។

លោក Roberto Azevedo ប្រធានអង្គការពាណិជ្ជ​កម្មពិភពលោក (WTO) បានថ្លែងប្រាប់កាសែត Financial Times នៅថ្ងៃនេះថា បើសិនជាចក្រភពអង់គ្លេស បានសម្រេចចិត្តចាកចេញពី EU មែននោះ ចក្រភពអង់គ្លេស នឹងជួបការលំបាកខ្លាំងក្នុងការធ្វើពាណិជ្ជកម្ម នៅតំបន់អឺរ៉ុប ដោយសារតែ WTO នឹងកំណត់លក្ខខណ្ឌថ្មីឲ្យចក្រភពអង់គ្លេស ​ក្នុងការចរាចរណ៍ទំនិញផ្សេងៗ បើទោះបីជាចក្រភព អង់គ្លេស នៅតែជាសមាជិករបស់ WTO ក្ដី ប៉ុន្តែប្រទេសមួយនេះ បានចាកចេញពីសហភាពអឺរ៉ុប ដូច្នេះវាមិនអាចល្អប្រសើរដូចមុន បានឡើយ។

គួរបញ្ជាក់ផងដែរថា ចក្រភពអង់គ្លេស បានប្រកាសឲ្យដឹងថា ខ្លួនមានបំណងចង់ចាកចេញពី​សហភាពអឺរ៉ុប ដោយសារ​សម្រេចចិត្តនេះ ត្រូវបានក្រុមអ្នកជំនាញវិភាគថា ចក្រភពអង់គ្លេសនឹងខាតបង់ច្រើន បើសិនជាដើរចេញពីសហភាពអឺរ៉ុប​មែន៕