(ម៉ូស្គូ)៖ វិមានក្រឹមឡាំង បានចេញសេចក្ដីប្រកាសនៅថ្ងៃនេះថា ប្រធានាធិបតីរុស្ស៊ី លោក Vladimir Putin នឹងទៅ​បំពេញ​ទស្សនកិច្ចនៅក្នុងប្រទេស​ក្រិចចំនួន ២ថ្ងៃ ដែលជាដំណើរទស្សនកិច្ចដ៏កម្រមួយនៅក្នុងប្រវត្តិសាស្ត្រ នេះបើយោងតាមការចេញផ្សាយរបស់សារព័ត៌មានស៊ិនហួ ចេញផ្សាយនៅថ្ងៃទី២៣ ខែឧសភា។

នៅក្នុងដំណើរទស្សនកិច្ចពីរថ្ងៃ ចាប់ពីថ្ងៃទី២៧-២៨ខែឧសភា លោក Putin នឹងជួបពិភាក្សាជាមួយប្រធានាធិបតីក្រិច លោក Prokopis Pavlopoulos និងនាយករដ្ឋមន្ត្រីក្រិច លោក Alexis Tsipras។ វិមានក្រឹមឡាំង បានបញ្ជាក់ថា ទិដ្ឋភាពសំខាន់នៃដំណើរទស្សនកិច្ចនោះ គឺដើម្បីបង្កើនកិច្ចសហប្រតិបត្តិការទ្វេភាគីទៅលើវិស័យពាណិជ្ជកម្ម សេដ្ឋកិច្ច ការវិនិយោគរួមគ្នា ព្រមទាំងគម្រោងរួមគ្នាលើវិស័យ​ថាមពល និង​ដឹកជញ្ជួន។

ជាមួយគ្នានោះ លោក Putin នឹងធ្វើការផ្លាស់ប្ដូរទស្សនៈស្ដីអំពីបញ្ហាអន្តរជាតិមួយចំនួនដែលកើតមានឡើងនាពេល​បច្ចុប្បន្ន ជាពិសេសគឺប្រទេសទាំងពីរនឹងមានការចុះហត្ថលេខាលើកិច្ចព្រមព្រៀងរួមគ្នាជាច្រើនវិស័យផងដែរ៕