(ភ្នំពេញ)៖ មន្រ្តីជលផលរបស់កម្ពុជា មួយក្រុមបានចុះសិក្សា និង ដកស្រង់បទពិសោធន៍មួយចំនួនពីការចិញ្ចឹមត្រី និង ការផលិតចំណីត្រីជា ដើម នៅក្នុងប្រទេសបង់ក្លាដែស ដែលជាប្រទេស​មួយទទួលបានជោគជ័យ​ខ្ពស់លើការចិញ្ចឹមត្រី និងមានការអភិវឌ្ឍខ្ពស់​លើខ្សែសង្វាក់វារីវប្បកម្ម​ក្នុងអំឡុងពេល​ដប់ឆ្នាំចុងក្រោយនេះ។

ដំណើរទស្សនកិច្ចសិក្សាលើ​ការចិញ្ចឹមត្រីនៅប្រទេស​បង់ក្លាដែសនេះ បានធ្វើឡើងចាប់ពីថ្ងៃទី១៥ ដល់ថ្ងៃទី២១ ខែឧសភា ឆ្នាំ២០១៦ ដឹកនាំដោយលោកបណ្ឌិត ហាវ វិសិដ្ឋ អគ្គនាយករង នៃរដ្ឋបាល​ជលផល និងមានការចូលរួមពីមន្រ្តីជាន់ខ្ពស់មកពីរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ក្រសួងពាណិជ្ជកម្ម និងក្រសួងសេដ្ឋកិច្ច និង ហិរញ្ញវត្ថុ។

ក្នុងដំណើរទស្សនកិច្ចសិក្សានេះមន្រ្តីកម្ពុជា បានទៅទស្សនាស្ថាប័ន និង គ្រឹះស្ថានអាជីវកម្មជលផលនានាជាច្រើន ដូចជាកសិដ្ឋានចិញ្ចឹមត្រី រោងចក្រផលិតចំណីត្រី ទីតាំងភ្ញាស់កូន រោងចក្រកែច្នៃ មន្ទីរពិសោធន៍ និង សមាគមជលផលនានា។

មន្រ្តីកម្ពុជា បានកោតសរសើរទៅលើការអភិវឌ្ឍខ្សែសង្វាក់តម្លៃជលផល តាមរយៈការអនុវត្ត​កម្មវិធីមូលនិធិពី​របស់សហ​ភាពអឺរ៉ុប ដែលហៅថា BEST ដើម្បីធ្វើឱ្យ​វិស័យនេះ​ស្របតាមលក្ខខណ្ឌ និងតម្រូវ​ការទីផ្សារពិភពលោក តាមរយៈការបញ្ចូលគ្នា និង វិធីសាស្ដ្រពីផលិតកម្មកសិ កម្មទៅដល់ការប្រើប្រាស់​នៅក្នុងលក្ខខណ្ឌ នៃការអភិវឌ្ឍសមត្ថភាព​ធ្វើតេស្ត ការកសាងសមត្ថភាព​ធនធានមនុស្ស ការអនុវត្ត ដើម្បីធ្វើឱ្យប្រសើរឡើង​នូវកម្មវិធីសុវត្ថិភាព​ម្ហូបអាហារនៅគ្រប់​កម្រិតទាំងអស់ នៃខ្សែសង្វាក់ការផ្គត់ផ្គង់​ពីផលិតកម្មកសិកម្ម​ទៅដល់ការប្រើប្រាស់ រួមទាំងការអនុវត្ត​ល្អនូវវារីវប្បកម្ម (GAP) កំណែទម្រង់​ក្របខ័ណ្ឌច្បាប់ កសាងការអនុលោមតាម​ច្បាប់ក្នុងសង្គម​ក្នុងវិស័យកែច្នៃ ភាពល្អប្រសើរជាង​មុនក្នុងការអនុលោម​តាមច្បាប់តាមរយៈ​ការតាមដាន​នៃផលិតផល​ជលផល។

លោកវេជ្ជបណ្ឌិត Shetty ប្រធានទីប្រឹក្សាបច្ចេកទេសរបស់អង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) បានបន្ថែមថាដំណើរទស្សនកិច្ចសិក្សានេះ ជាឱកាសមួយ​ដែលមានសារៈ​ប្រយោជន៍​ខ្លាំង​ណាស់​សម្រាប់គណៈប្រតិភូកម្ពុជាដើម្បីទទួលបាន​នូវចំណេះដឹង និងបទពិសោធន៍បន្ថែម​នៅក្នុងការអភិវឌ្ឍ​ខ្សែសង្វាក់​តម្លៃដែលអាច​យកមកអនុវត្ត​នៅក្នុងប្រទេសកម្ពុជា ដើម្បីលើក​កម្ពស់ និង បង្កើនសមត្ថភាព​ប្រកួតប្រជែង​ក្នុងវិស័យជលផល ដូចដែលមានកំណត់​នៅក្នុងក្របខណ្ឌ នៃផែនការយុទ្ធ​សាស្រ្តវិស័យ​ជលផល និង យុទ្ធសាស្រ្ត​សមាហរណកម្មពាណិជ្ជ​កម្មកម្ពុជា។

គំរូអភិវឌ្ឍន៍វារីវប្បកម្មនៃប្រទេសបង់ក្លាដែសអាចជាឱកាស​ល្អសម្រាប់ស្ថាប័ន​ជលផល អ្នកនេសាទ កសិករ ពាណិជ្ជករ អ្នកកែច្នៃ និង អ្នកវិនិយោគក្នុង​ប្រទេសកម្ពុជា។ ការសិក្សានេះនឹង​​ជួយ​ប្រទេស​កម្ពុជា​ក្នុងការរៀប​ចំអនុសាសន៍ យុទ្ធសាស្រ្តសមស្របសម្រាប់ការអភិវឌ្ឍខ្សែសង្វាក់​តម្លៃវារីវប្បកម្មរួម​នៅក្នុងប្រទេស។ វានឹងអាចជួយទៅដល់​រដ្ឋាភិបាល​​ក្នុងការរៀបចំផែនការ​សកម្មភាពលម្អិត សម្រាប់កម្មវិធី​ជំនួយរបស់​សហភាពអឺរ៉ុប​នាពេលខាងមុខ ក្នុងការអភិវឌ្ឍខ្សែ​សង្វាក់​តម្លៃវារីវប្បកម្ម​នៅកម្ពុជា។

លេខាធិការនៃក្រសួងជលផល​ប្រទេសបង់ក្លាដែស និង Bangladesh Frozen Food Exporters Association បានសម្តែងនូវឆន្ទៈរបស់ពួកគេក្នុង​កិច្ចសហប្រតិបត្តិការរួមគ្នា​ជាមួយប្រទេសកម្ពុជា ដើម្បីអអភិវឌ្ឍវិស័យនេះ​នាពេលអនាគត។

ដំណើរទស្សនកិច្ចសិក្សានេះទទួលបានការគាំទ្រពីកម្មវិធីពិពិធកម្ម និង ការពង្រីកការនាំចេញ  (CEDEP II) ដែលទទួលបានជំនួយហិរញ្ញវត្ថុពីក្របខណ្ឌជំរុញសមាហរណកម្ម (EIF) និង អនុវត្តដោយអង្គការ UNIDO ដែលរួមសហការជា​មួយរដ្ឋបាល​ជលផល និង ក្រសួងពា ណិជ្ជកម្ម៕