(ប៉ៃលិន)៖ លោកស្រី បាន ស្រីមុំ អភិបាលខេត្តប៉ៃលិន នៅថ្ងៃទី០៧ ខែកក្កដា ឆ្នាំ២០២២នេះ បានអញ្ជើញប្រកាសសមាសភាពប្រធានក្រុមប្រឹក្សា ឃុំ ជំទប់ទី១ ទី២ ចៅសង្កាត់ ចៅសង្កាត់រងទី១ ទី២ និងសមាជិកក្រុមប្រឹក្សាសង្កាត់បយ៉ាខា ឃុំអូរអណ្តូង អាណត្តិទី៥ ឆ្នាំ២០២២ ស្ថិតនៅនៅសាលាសង្កាត់បយ៉ាខា ក្រុងប៉ៃលិន សាលាឃុំអូរអណ្តូង ស្រុកសាលាក្រៅ ដោយមានការចូលរួមពីសំណាក់ ប្រធានក្រុមប្រឹក្សាស្រុក អាជ្ញាធរស្រុក មន្ត្រីពាក់ព័ន្ធ និងប្រជាពលជាច្រើននាក់។
ថ្លែងនាឱកាសនោះ លោកស្រី បាន ស្រីមុំ បានសង្កត់ធ្ងន់ថា ទោះសង្កាត់បយ៉ាខា និងឃុំអូរណ្តូង មានសមាជិកក្រុមប្រឹក្សាមកពីគណបក្សតែមួយក៏ដោយ ក៏សមាជិក ក្រុមប្រឹក្សា ឃុំ សង្កាត់ថ្មី គ្រប់រូបត្រូវប្រកាន់គោលជំហរ សាមគ្គីភាព និងឯកភាពជាតិ ដោយត្រូវរួមគ្នាខិតខំបម្រើសេវាជូនប្រជាពលរដ្ឋឲ្យល្អប្រសើរ និងបន្តកសាង អភិវឌ្ឍន៍នៅមូលដ្ឋានឲ្យកាន់តែរីកចម្រើនជឿនលឿនទ្វេរឡើង ជាពិសេសដើម្បីបំពេញទៅតាមតម្រូវការរបស់ប្រជាពលរដ្ឋដែលជាម្ចាស់ឆ្នោត ប្រកបដោយលទ្ធិ ប្រជាតេយ្យ សំដៅចូលរួមចំណែកកាត់បន្ថយភាពក្រីក្រ ស្របតាមគោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជា។
លោកស្រីអភិបាលខេត្ត បានថ្លែងបន្តថា ដើម្បីធានាបាននូវការផ្ដល់សេវានានាក្នុងមូលដ្ឋាន បញ្ហាគន្លឹះសំខាន់គឺការបំពេញតួនាទី ភារកិច្ចរបស់តួអង្គស្នូលចំនួន ៥គឺ៖
មេឃុំ ចៅសង្កាត់, ស្មៀនឃុំ សង្កាត់, ប៉ុស្តិ៍នគរបាលរដ្ឋបាលឃុំ សង្កាត់, មណ្ឌលសុខភាព ឬប៉ុស្តិ៍សុខភាព, មេភូមិ អនុភូមិ។
ដូច្នេះសូមឲ្យតួអង្គទាំង៥ខាងលើនេះ ត្រូវខិតខំយកចិត្តទុកដាក់អនុវត្តតួនាទី ភារកិច្ចរបស់ខ្លួន ក្នុងផ្តល់សេវាសាធារណៈនានា ជូនប្រជាពលរដ្ឋ ក្នុងមូលដ្ឋានរបស់ខ្លួន ឲ្យបានល្អប្រសើរ ប្រកបដោយក្រមសីលធម៌វិជ្ជាជីវៈ និងកែលម្អឥរិយាបថ ក្នុងការប្រាស្រ័យទាក់ទងជាមួយប្រជាពលរដ្ឋ ប្រកបដោយតម្លាភាព គណនេយ្យភាព និងយុត្តិធម៌ ពិសេសត្រូវយកចិត្តទុកដាក់លើការចុះហត្ថលេខាឯកសារដីធ្លី ប្រយត្នជាន់ប្លង់តែមួយម្ចាស់ច្រើននាក់ និងត្រូវចុះពិនិត្យជាក់ស្តែងផ្ទាល់ ចៀសវាងការ ទន្ទ្រាន យកដីភ្នំ ដីកម្មសិទ្ធរដ្ឋ ហើយដោយមិនត្រូវមានការរើសអើង ការបែងចែកបក្សពួក គ្រួសារនិយម និងនិន្នាការនយោបាយឡើយ ។
សូមជម្រាបជូនថា ដំណើរការបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ដែលប្រព្រឹត្តិទៅថ្ងៃទី៥ ខែមិថុនា កន្លងទៅនេះ ជាលទ្ធផលក្នុងសង្កាត់ បយ៉ាខា មានអាសន:ចំនួន៥ ឃុំអូរអណ្តូងមានអាសនៈសរុប ចំនួន០៥ មកពីគណបក្សគណបក្សប្រជាជនកម្ពុជា មាន០៥អាសនៈ ដោយទទួលបានតំណែង ជាប្រធាន ក្រុមប្រឹក្សាឃុំ ជាមេឃុំ ជំទប់ទី១ ជំទប់ទី២ និងសមាជិកក្រុមប្រឹក្សា ចំនួន០៣អាសនៈ៕
