(ភ្នំពេញ)៖ Fresh News ​​TV ក្រោមកិច្ចសហការជាមួយទូរទស្សន៍ជាតិកម្ពុជា (ទទក) នឹងធ្វើការផ្សាយបន្តផ្ទាល់ ( Live) សកម្មភាពនានា នៃព្រះរាជពិធីបុណ្យច្រត់ព្រះនង្គ័ល ពីខេត្តសៀមរាប នៅថ្ងៃទី២៤ ខែឧសភា ឆ្នាំ២០១៦ ស្អែកនេះ។

ព្រះរាជពិធីច្រត់ព្រះនង្គ័ល នឹងប្រារព្ធឡើងនៅលើលានជល់ដំរី ក្នុងតំបន់អង្គរ ខេត្តសៀមរាប។ បើតាមការប្រកាសរបស់ អាជ្ញាធរខេត្តសៀមរាប បានឱ្យដឹងថា នេះជាលើកទី២ហើយ (លើកទី១ នៅឆ្នាំ២០១១) សម្រាប់ការប្រារព្ធព្រះរាជពិធីបុណ្យ ប្រពៃណីជាតិដ៏ធំនេះ នៅលើទឹកដីអង្គរ ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា។

Fresh News TV នឹងផ្សាយបន្តផ្ទាល់ទៅកាន់ Facebook, Youtube ផងដែរ។

សូមជម្រាបថា ព្រះរាជពិធីច្រត់ព្រះនង្គ័លតែងតែ ប្រារព្ធធ្វើឡើងជារៀងរាល់ឆ្នាំនៅក្នុងខែពិសាខ នៅឯវាលព្រះមេរុ ស្ថិតនៅខាងជើងព្រះបរមរាជវាំង នៃរាជធានីភ្នំពេញសព្វថ្ងៃ តែឆ្នាំខ្លះព្រះរាជពិធីនេះ ក៏ធ្វើនៅតាមបណ្តាខេត្តដែរ ដែលមានប្រវត្តិយូរលង់ណាស់មកហើយ។

ព្រះរាជពិធីបុណ្យប្រពៃណីនេះ ធ្វើឡើងក្នុងគោលបំណងផ្សងមើល ប្រផ្នូលរបស់ស្រុកទេស ទៅតាមការបរិភោគរបស់ «គោឧសភរាជ»។ ម្យ៉ាងទៀតក៏ជាការដាស់តឿន ក្រើនរំឭកដល់ប្រជាជនខ្មែរ ដែលពឹងផ្អែកលើការធ្វើកសិកម្មជាចម្បងនោះ ឱ្យបានដឹងថា រដូវវស្សាបានចូលមកដល់ហើយ៕