(អេហ្ស៊ីប)៖ គិតមកដល់ពេលនេះ មានប្រទេសធំៗ​ចំនួន៤ បានចូលរួមនៅក្នុងយុទ្ធនាការស្វែងរកយន្តហោះ EgyptAir ជើង​ហោហើរ Flight 804 ដែលត្រូវបាន​គេអះអាងថា បានធ្លាក់នៅក្បែរកោះ Karpathos របស់ប្រទេសក្រិច ប៉ុន្តែប្រតិបត្តិការស្វែងរកនេះ មានការរាំងស្ទះ ដោយសារតែអាកាសធាតុនៅសមុទ្រម៉េឌីទែរ៉ាណេ មិនអំណោយផល នេះ​បើយោងតាមការចេញផ្សាយរបស់សារព័ត៌មាន CNN ចេញផ្សាយមុននេះបន្តិច។

ប្រទេសដែលចូលរួមនៅក្នុងប្រតិបត្តិការស្វែងរក និងជួយសង្គ្រោះនោះ មានក្រិច, បារាំង, សហរដ្ឋអាមេរិក និង​​ចក្រ​ភពអង់គ្លេស នៅពេលនេះ ក្រុមស្វែងរក និងជួយសង្គ្រោះទាំង៤ប្រទេស បាន​កំពុងតែចេញប្រតិបត្តិការ​នៅ​ក្បែរ​កោះ Karpathos របស់ក្រិច ប៉ុន្តែការស្វែងរកនេះ ត្រូវបាន​គេរាយការណ៍មកថា មានការរាំងស្ទះដោយសារតែ​បញ្ហាអាកាសធាតុ។

នៅក្នុងប្រតិបត្តិការ ក្រុមសង្គ្រោះអេហ្ស៊ីប បានប្រទះឃើញដានប្រេង ដែលទំនងជាធ្លាយចេញ ពីយន្តហោះអេហ្ស៊ីប និងបំណែកមួយចំនួនទៀត នៃតួយន្តហោះ នៅលើដែនទឹកសមុទ្រមេឌីទែរ៉ាណេ។

ក្រសួងការពារជាតិរបស់ប្រទេសក្រិច ក៏បានឲ្យដឹងថា អាជ្ញាធររបស់អេហ្ស៊ីប បានរកបំណែកនៃសាកសព​ និង​កៅអ៊ីចំនួន២ ព្រមទាំងវ៉ាលីផងដែរ នៅក្នុងប្រតិបត្តិការស្វែងរកយន្តហោះ EgyptAir ជើងហោះហើរ Flight 804 ដែលបានធ្លាក់នៅក្នុង សមុទ្រមេឌីទែរ៉ាណេ។

គួរបញ្ជាក់ផងដែរថា យន្តហោះ EgyptAir ជើងហោះហើរ Flight 804 បានបាត់ពីរ៉ាដា ខណៈហោះចេញពីអាកាសយានដ្ឋាន Charles de Gaulle ក្នុងទីក្រុងប៉ារីស ប្រទេសបារាំង នៅម៉ោង ២៣៖០៩នាទី ទៅកាន់អាកាសយាន​ដ្ឋាន Cairo Airport ទីក្រុងគែ ប្រទេសអេហ្ស៊ីប ដោយផ្ទុកមនុស្ស ៦៦នាក់ ក្នុងនោះមានសហនាវិក ១០នាក់ ហើយត្រូវបានក្រុមហ៊ុន និងរដ្ឋាភិបាលអេហ្ស៊ីប​បញ្ជាក់ថា បានធ្លាក់នៅក្នុងសមុទ្រ៕