(បារាំង)៖ មន្ត្រីសុខាភិបាលបារាំង បានបញ្ជាក់ជាផ្លូវការថា មានអ្នកជំងឺម្នាក់បានស្លាប់ដោយសារពាក់ព័ន្ធនឹងជំងឺ Zika ហើយក៏ជាមនុស្សដំបូងគេបំផុតផងដែរ នេះបើយោងតាមការចេញផ្សាយរបស់សារព័ត៌មកាន AP ចេញផ្សាយនៅ​ថ្ងៃទី​២១ ខែឧសភា។

អ្នកជំងឺដែលស្លាប់ដោយសារជំងឺ Zika នេះ ត្រូវបានមន្ត្រីសុខាភិបាលបញ្ជាក់ថា​ មានអាយុ ៨៤ឆ្នាំ រស់នៅកោះ Martinique បានចូលសម្រាក​នៅ​ក្នុងមន្ទីរពេទ្យអស់រយៈពេល ១០ថ្ងៃ ដោយទទួលបានការថែទាំងយ៉ាងយកចិត្តទុកដាក់បំផុត តែគួរឲ្យសោកស្ដាយ។ មន្ត្រីសុខាភិបាល បានបញ្ជាក់ថា អ្នកជំងឺបានស្លាប់ដោយសារពាក់ព័ន្ធនឹងជំងឺ Zika ដោយបានធ្វើឲ្យប្រព័ន្ធភាពស៊ាំ វាយប្រហារប្រព័ន្ធសរសៃប្រសាទ និងបណ្តាលឲ្យខ្សោយសាច់ដុំ ធ្វើឲ្យពិបាកដកដង្ហើម និងស្លាប់តែម្ដង។

គួរបញ្ជាក់ផងដែរថា អង្គការសុខភាពពិភពលោក (WHO) បានចេញសេចក្ដីជូនដំណឹងថា ឥឡូវនេះជំងឺ Zika បានរីករាយដាលមកដល់តំបន់អាហ្វ្រិកហើយ ដោយក្នុងនោះតំបន់ Cape Verde នៃទ្វីបអាហ្វ្រិកមានការរីករាលដាល់ដំបូងរហូតដល់ទៅ ២០០ករណីឯណោះ ហើយស្របពេល​ជាមួយ​គ្នា​នោះដែរ មជ្ឈមណ្ឌលគ្រប់គ្រង និងការពារជំងឺ (CDC) របស់អាមេរិក បានបង្ហាញនូវរបាយការណ៍ ដ៏គួរឲ្យភ្ញាក់ផ្អើលមួយគឺស្រ្តីមានផ្ទៃពោះនៅអាមេរិកប្រមាណ ១៥៧នាក់ បានឆ្លងមេរោគ Zika៕