(ភ្នំពេញ)៖ នៅព្រឹកថ្ងៃសៅរ៍ ទី២១ ខែឧសភា ឆ្នាំ២០១៦នេះ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា រួមជាមួយគណៈប្រតិភូជាន់ខ្ពស់ នឹងត្រឡប់មកដល់ព្រលានយន្តហោះក្រុងភ្នំពេញ​វិញ ក្រោយពីបានបញ្ចប់កិច្ចប្រជុំកំពូលរំលឹកខួប២០ឆ្នាំ នៃទំនាក់ទំនង អាស៊ាន-រុស្ស៊ី រយៈពេល៤ថ្ងៃ នាទីក្រុងសូឈី ប្រទេសរុស្ស៊ី ប្រកបដោយភាពជោគជ័យ។

កាលពីម្សិលមិញពេលល្ងាច បន្ទាប់ពីបញ្ចប់កិច្ចប្រជុំកំពូលអាស៊ាន-រុស្ស៊ី រួច សម្តេចតេជោ ហ៊ុន សែន បានដឹកនាំគណ:ប្រតិភូជានខ្ពស់កម្ពុជា ចេញពីទីក្រុងសូឈី ប្រទេសរុស្ស៊ី ដោយវិលត្រឡប់មកដល់កម្ពុជាវិញនៅព្រឹកថ្ងៃសៅរ៍នេះ។

សូមជំរាបថា ក្រោយពីបញ្ចប់កិច្ចប្រជុំកំពូលអាស៊ាន-រុស្ស៊ី សម្តេចតេជោ បានឲ្យដឹងតាមរយៈ Facebook ថា កិច្ចប្រជុំកំពូលអាស៊ាន-រុស្ស៊ីនេះ ប្រទេសទាំងអស់បានប្តេជ្ញាពង្រឹងមិត្តភាព និងសហប្រតិបត្តិការជាមួយសហព័ន្ធរុស្ស៊ី ដើម្បីសន្តិភាពក្នុងតំបន់ និងក្នុងពិភពលោក រួមទាំងរួមគ្នាពង្រីកវិស័យពាណិជ្ជកម្ម និងវិនិយោគ ឲ្យបានទូលំទូលាយដែលនាំមកនូវផលប្រយោជន៍ សម្រាប់ប្រជាជាតិទាំងអស់ផងដែរ។

សម្តេចតេជោ ហ៊ុន សែន បានសង្កត់ធ្ងន់ថា «នេះជាមោទនភាពរបស់កម្ពុជា ដែលមានមិត្តមហាអំណាចដ៏ល្អប្រកបដោយភាព ស្មោះត្រង់ដូចជារុស្ស៊ី ដែលបានជួយកម្ពុជា តាំងពេលមុនរហូត មកដល់ពេលនេះ ជាពិសេសជួយបណ្តុះបណ្តាលធនធានមនុស្សដល់កម្ពុជា»៕