(ព្រះសីហនុ)៖ រយៈពេល៥ឆ្នាំចុងក្រោយ (២០១៧-២០២១) បរិមាណកុងតឺន័រឆ្លងកាត់កំពង់ផែស្វយ័តខេត្តព្រះសីហនុ (កសស) មានកំណើនជាមធ្យមក្នុងរង្វង់១៤% ហើយចំណូលសរុបមានកំណើន ជាមធ្យមប្រមាណ១១,៣%។ នេះបើយោងតាម លោក ថៃ ឬទ្ធី អគ្គនាយករងទទួលបន្ទុកអាជីវកម្មកំពង់ផែស្វយ័តក្រុងព្រះសីហនុ ថ្លែងក្នុងបទបង្ហាញក្នុងពិធីទទួលការអញ្ជើញទស្សនកិច្ចរបស់ កិត្តិបរិរក្សបណ្ឌិត គាត ឈន់ ប្រធានកិត្តិយសឧត្តមក្រុមប្រឹក្សាសេដ្ឋកិច្ចជាតិនៅថ្ងៃទី២០ ខែមិថុនា ឆ្នាំ២០២២។

ការអញ្ជើញដឹកនាំគណៈប្រតិភូបំពេញទស្សនកិច្ចនៅកំពង់ផែស្វយ័តក្រុងព្រះសីហនុ គឺទទួលការស្វាគមន៍ពី លោក ថៃ ឬទ្ធី អគ្គនាយករងទទួលបន្ទុកអាជីវកម្មកំពង់ផែស្វយ័តក្រុងព្រះសីហនុ តំណាងរបស់ លោក លូ គឹមឈន់ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកកំពង់ផែស្វយ័តក្រុងព្រះសីហនុនិងថ្នាក់ដឹកនាំបុគ្គលិកបានទទួលស្វាគមន៍យ៉ាងកក់ក្តៅបំផុត។

បន្ទាប់មកប្រតិភូអញ្ជើញចូលរួមគឺមាន លោក បណ្ឌិត ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោកបណ្ឌិត កែន សម្បត្តិ សមាជិកឧត្តមក្រុមប្រឹក្សាសេដ្ឋកិច្ចជាតិ និងមន្ត្រីជាន់ខ្ពស់ពាក់ព័ន្ធ ផ្សេងទៀត លោក ថៃ ឬទ្ធី បានបញ្ជាក់ថា ស្ថានភាពវឌ្ឍនភាពនៃការអភិឌ្ឍន៍និងដំណើរការអាជីវកម្មរបស់កំពង់ផែស្វយ័តក្រុងព្រះសីហនុ (កសស) ក្នុងនោះ សម្រាប់ស្ថានភាពអាជីវកម្មរបស់ខ្លួន ក្នុងរយៈពេល៥ឆ្នាំចុងក្រោយ (២០១៧-២០២១)បរិមាណកុងតឺន័រឆ្លងកាត់កសសមានកំណើនជាមធ្យមក្នុងរង្វង់១៤% ហើយចំណូលសរុបមានកំណើនជាមធ្យមប្រមាណ១១,៣%។

សម្រាប់ឆ្នាំ២០២១បរិមាណកុងតឺន័រឆ្លងកាត់ (កសស)មានកំណើនខ្ពស់ប្រមាណ ១៤,១១% ធៀបទៅនឹងឆ្នាំ២០២០ ដោយសម្រេចបានចំនួន ៧៣២.៣៨៧ ហើយទទួលបានចំណូលសរុបចំនួន ៣៤២ ៣៤៩ ២២៩ រៀល កើន ៩.៧៩ %។

បន្ទាប់មកថ្នាក់ដឹកនាំកំពង់ផែស្វយ័តក្រុងព្រះសីហនុបានគោរពអញ្ជើញកិត្តិបរិរក្សបណ្ឌិត គាត ឈន់ ប្រធានកិត្តិយសឧត្តមក្រុមប្រឹក្សាសេដ្ឋកិច្ចជាតិ និងគណៈប្រតិភូអមដំណើរទៅពិនិត្យទីតាំងអាជីវកម្មជាក់ស្តែងរបស់កំពង់ផែស្វយ័តក្រុងព្រះសីហនុផងដែរ។

ក្នុងដំណើរទស្សនកិច្ចនេះ កិត្តិបរិរក្សបណ្ឌិត គាត ឈន់ បានគូសបញ្ជាក់ថា ទស្សនកិច្ចនេះមិនមែនក្នុងន័យមកត្រួតពិនិត្យឬផ្តល់ការណែនាំលើការងាររបស់កំពង់ផែស្វយ័តក្រុងព្រះសីហនុនោះទេ ប៉ុន្តែមកទស្សនកិច្ចនិងស្វែងយល់ពីការងាររបស់កំពង់ផែ ដោយហេតុថា អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ជាអ្នកទទួលបន្ទុក ក្រោមការណែនាំផ្ទាល់ដ៏ខ្ពង់ខ្ពស់បំផុតពីសម្តេចតេជោនាយករដ្ឋមន្ត្រី។

កិត្តិបរិរក្សបណ្ឌិត បានលើកឡើងថា កំពង់ផែស្វយ័តក្រុងព្រះសីហនុ គឺជាសមាសធាតុ (Composant) មួយនៃសេដ្ឋកិច្ចហើយបានសម្រេចចំណូលប្រមាណ ជាង៨០លានដុល្លារ ក្នុងឆ្នាំ២០២១ ដែលអាចដោះស្រាយបានអំពីអតីតកាលនិងអនាគតកាលពោលគឺរក្សាបាននូវជំនឿលើការដឹកនាំរបស់ថ្នាក់ដឹកនាំរបស់កំពង់ផែរួមមានលោក លូ គឹមឈន់ ប្រធានអគ្គនាយកនៃកំពង់ផែស្វយ័តក្រុងព្រះសីហនុ ។

លើសពីនេះក្រសួងសេដ្ឋកិច្ច និងហិរញ្ញវត្ថុលើការអភិវឌ្ឍហេដ្ឋារចនាសម្ព័ន្ធនានា ទោះបីជាមានភាពមិនប្រាកដប្រជានៃជំងឺកូវីដ-១៩និងបញ្ហាសង្រ្គាមរុស្ស៊ី-អ៊ុយក្រែន ប៉ុន្តែកម្ពុជានៅតែបន្តសម្រេចបាននូវសេដ្ឋកិច្ចជាតិផងដែរ។ កំពង់ផែស្វយ័តគឺជាកន្លែងអនុវត្តគោលនយោបាយឡូជីស្ទីក (Logistics) របស់រាជរដ្ឋាភិបាល។

ជាមួយនេះកិត្តិបរិរក្សបណ្ឌិត បានសម្តែងនូវអំណរសរសើរដោយស្មោះអស់ពីចិត្តចំពោះ លោក លូ គឹមឈន់ ប្រធានអគ្គនាយកនៃកំពង់ផែស្វយ័តក្រុងព្រះសីហនុ និងលោកអគ្គនាយករងដែលជាសេនាធិការ ព្រមទាំងថ្នាក់ដឹកនាំនិងកម្មករ ដែលបានធ្វើឲ្យកំពង់ផែសម្រេចបានលទ្ធផលជាផ្លែផ្កែក្រោមបរិការណ៍នៃសន្តិភាពដែលបាន និងកំពុងបន្តគ្របដណ្តប់ពេញព្រះរាជាណាចក្រកម្ពុជាទាំងមូល។

នៅថ្ងៃទី២០ ខែមិថុនា ឆ្នាំ២០២២នេះ គឺជាថ្ងៃយើងទាំងអស់គ្នារំលឹកគុណថ្ងៃ ២០ មិថុនា ១៩៧៧ ដែលមកដល់ពេលនេះគឺខួបទី៤៥ឆ្នាំ ចំពោះអ្នកដំបូង និងមិត្តផ្ទាល់ដែលបានរំដោះកម្ពុជាពីរបប ប៉ុល ពត។

គួរបញ្ជាក់ថា ថ្ងៃទី២០ ខែមិថុនា ឆ្នាំ១៩៧៧ ជាថ្ងៃដែលសម្តេចតេជោ ហ៊ុន សែន និងយុទ្ធមិត្តរួមអាវុធដ៏ស្មោះស្ម័គ្រ៤រូបបានរួមគ្នាយកជីវិតធ្វើជាដើមទុនចេញទៅកាន់ប្រទេសវៀតណាម ស្វែងរកការគាំទ្រ ដើម្បីតស៊ូរំដោះជាតិ និងប្រជាជនកម្ពុជា ចេញពីរបបប្រល័យពូជសាសន៍ដ៏ឃោរឃៅរបស់ខ្មែរ ប៉ុល ពត និងបក្ខពួក។

ក្រោយព្រឹត្តិការណ៍នេះ ក៏មានព្រឹត្តិការណ៍បង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា នៅថ្ងៃទី១២ ឆ្នាំឧសភា ឆ្នាំ១៩៧៨ និងព្រឹត្តិការណ៍បង្កើតរណសិរ្យសាមគ្គីសង្គ្រោះជាតិកម្ពុជា នៅថ្ងៃទី០២ ខែធ្នូ ឆ្នាំ១៩៧៨ និងថ្ងៃរំដោះប្រជាជនកម្ពុជា នៅថ្ងៃទី៧ ខែមករា ឆ្នាំ១៩៧៩។

កម្ពុជាបានបន្តអភិវឌ្ឍទាំងក្នុងក្របខណ្ឌនៃសាធារណរដ្ឋប្រជាមានិតកម្ពុជា រដ្ឋកម្ពុជា និងព្រះរាជាណាចក្រកម្ពុជា ដែលមានការឯកភាពជាតិ និងមានឆន្ទៈរួមគ្នាលើការបន្តអភិវឌ្ឍប្រទេស។

បន្ថែមពីនេះ កិត្តិបរិរក្សបណ្ឌិត គាត ឈន់ បានជូនពរថ្នាក់ដឹកនាំ និងបុគ្គលិកនៃកំពង់ផែស្វយ័តក្រុងព្រះសីហនុនូវពុទ្ធពរទាំងបួនប្រការ និងបដិភាណៈព្រមទាំងទទួលបានជោគជ័យការងារ ក្នុងការចូលរួមអនុវត្តគោលនយោបាយនានា របស់រាជរដ្ឋាភិបាលជាអាទិ៍ការអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង។

ហេតុដូច្នោះហើយ គឺស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជា, ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា២០២២-២០៣៥ ក្រោមដំបូលសន្តិភាពដែលសម្តេចតេជោនាយករដ្ឋមន្ត្រីសម្រេចបានជូនកម្ពុជា៕