(កំពង់ចាម)៖ ប្រធានសាខាកាកបាទក្រហមខេត្តកំពង់ចាម លោក អ៊ុន ចាន់ដា និងលោក ខ្លូត ផន ប្រធានក្រុមប្រឹក្សាខេត្ត នាព្រឹកថ្ងៃទី១៨ ខែមិថុនា ឆ្នាំ២០២២នេះ បានដឹកនាំថ្នាក់ដឹកនាំសមាជិក សមាជិកា មន្ទីរអង្គភាពជុំវិញខេត្ត មន្ត្រីប្រតិបត្តិ យុវជន អ្នកស្ម័គ្រចិត្តកាកបាទក្រហមកម្ពុជាសរុប១៩៨នាក់ ប្រារព្ធពិធីបុណ្យចម្រើនព្រះជន្មសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា គម្រប់ព្រះជន្ម៨៦យាងចូល៨៧ព្រះវស្សា ដែលបានប្រព្រឹត្តទៅនាសាលសន្និសីទសាលាខេត្តកំពង់ចាម។
ស្ថិតក្នុងឱកាសនោះ លោក អ៊ុន ចាន់ដា និងលោក ខ្លូត ផន ប្រធានក្រុមប្រឹក្សាខេត្ត ព្រមទាំងគណៈកិត្តិយសគណៈ:កម្មាធិការ និងសហការីនៃសាខាកាកបាទក្រហមកម្ពុជាខេត្តកំពង់ចាម បានសូមព្រះបរមរាជានុញ្ញាតលើកហត្ថប្រណម្យបង្គំទូលថ្វាយព្រះសព្ទសាធុការពរជ័យ បវរសួស្តី សិរីវឌ្ឍនមង្គលគ្រប់ប្រការ ថ្វាយសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គមានព្រះរាជសុខភាពល្អបរិបូរណ៍ ព្រះបញ្ញាញាណភ្លឺថ្លា ព្រះកាយពលមាំមួន និងព្រះជន្មាយុយឺនយូរជាងរយព្រះវស្សា ចាកផុតពីព្រះរោគាព្យាធិនានា ដើម្បីគង់ប្រថាប់ជាមហាម្លប់ដ៏ត្រជាក់ត្រជុំដល់ប្រជានុរាស្រ្ត ជាកូន ចៅ ចៅទួតរបស់ព្រះអង្គ ប្រកបដោយសុខដុមរមនាជារៀងដរាបតទៅ។
បន្ទាប់មក ព្រះនាគសត្ថា ស៊ាង លាង ព្រះបាឡាត់គណខេត្ត និងព្រះមន្ត្រីសង្ឃ៨អង្គ បានសូត្រពុទ្ធជ័យមង្គលចម្រើនព្រះបរិត្ត ដើម្បីឧទ្ទិសព្រះរាជកុសលថ្វាយសម្ដេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ទៅតាមទំនៀមទម្លាប់ប្រពៃណីយសាសនាផងដែរ៕
