(អេហ្ស៊ីប)៖ លោក Francois Hollande ប្រធានាធិបតីបារាំង បានបញ្ជាក់ជាផ្លូវការនៅមុននេះបន្តិចដា យន្តហោះ​របស់​ក្រុមហ៊ុន EgyptAir ប្រភេទ Airbus 320 ជើងហោះហើរ Flight 804 ត្រូវបានធ្លាក់ ប៉ុន្តែនៅមិនទាន់ដឹងពីមូលហេតុ​ដែលបណ្ដាលឲ្យធ្លាក់នោះទេ នេះបើយោងតាមការចេញផ្សាយរបស់សារព័ត៌មាន AP ចេញផ្សាយនៅមុននេះបន្តិច។

លោក Hollande បាននិយាយថា «យន្តហោះពិតជាបានធ្លាក់មែន ប៉ុន្តែមូលហេតុនោះនៅមិនទាន់ដឹង​ ចំណែកជោគ​វាសនារបស់មនុស្សនៅលើយន្តហោះទាំងអស់ នៅមិនទាន់ទទួលបានដំណឹងទេ»។

នៅមុននេះយន្តហោះ EgyptAir ជើងហោះហើរ Flight 804 ផ្ទុកមនុស្ស ៦៦នាក់ ត្រូវបានគេរាយការណ៍មកថា បានធ្លាក់នៅក្នុងសមុទ្រមេឌីទែរ៉ាណេ ក្បែរកោះ Karpathos របស់ប្រទេសក្រិក។

មន្ត្រីអាកាសចរណ៍អេហ្ស៊ីប បានបញ្ជាក់ថា យន្តហោះ EgyptAir ជើងហោះហើរ Flight 804 ផ្ទុកមនុស្ស ៦៦នាក់ ត្រូវបានធ្លាក់ នេះបើយោងតាមការចេញផ្សាយរបស់ AP នៅមុននេះបន្តិច។

ករណីបាត់យន្តហោះ EgyptAir ជើងហោះហើរ Flight 804 ត្រូវបានគេរាយការណ៍មកថា មានជនជាតិ អេហ្ស៊ីប ៣០នាក់, បារាំង ១៥នាក់, ចក្រភពអង់គ្លេស ១នាក់, អ៊ីរ៉ាក់ ២នាក់, ប៊ែលហ្សិក ១នាក់, គុយវ៉េត ១នាក់, អារ៉ាប៊ីសាអូឌីត ១នាក់, ឆាដ ១នាក់, ព័រទុយហ្គាល់ ១នាក់, អាល់ហ្សេរី ១នាក់, កាណាដា ១នាក់, ស៊ូដង់ ១នាក់ ព្រមទាំងជនជាតិផ្សេងមួយចំនួនទៀត។

មន្ត្រីអាកាសចរណ៍អេហ្ស៊ីប បានបញ្ជាក់ថា ក្នុងរយៈពេល ១០នាទីចុងក្រោយ មុនពេលយន្តហោះ EgyptAir ជើងហោះហើរ Flight 804 បាត់ពីរ៉ាដា គឺគ្មានការហៅទូរស័ព្ទសង្គ្រោះបន្ទាន់នោះទេ នេះបើយោងតាមការចេញផ្សាយ Update មុននេះ​បន្តិចរបស់សារព័ត៌មាន Reuters។

ក្រុមហ៊ុនអាកាសចរណ៍របស់អេហ្ស៊ីប លើកឡើងថា យន្តហោះ EgyptAir ជើងហោះហើរ Flight 804 ដែលកំពុងបាត់ខ្លួន អាចនឹងធ្លាក់នៅក្នុងសមុទ្រ មេឌីទែរ៉ាណេ នេះបើយោងតាមព័ត៌មាន Sky News ចេញផ្សាយ​ Update មុននេះបន្តិច។

តាមការបញ្ជាក់បន្ថែម មានក្មេងម្នាក់ និងទារក ២នាក់ ក៏មានវត្តមានលើយន្តហោះ​ដឹក​អ្នក​ដំណើរ ជើងហោះ Flight 804 របស់ក្រុមហ៊ុនអាកាសចរណ៍ EgyptAir ដែលបាននឹងកំពុងបាត់ពីប្រព័ន្ធរ៉ាដា ខណៈកំពុងហោះហើរពី​ទីក្រុងប៉ារីស ប្រទេសបារាំង ទៅកាន់ទីក្រុងគែរ ប្រទេសអេហ្ស៊ីប នេះយោងតាមការចេញផ្សាយ របស់សារព័ត៌មាន Sky News នៅមុននេះបន្តិច។

តាមការបញ្ជាក់ពីក្រុមហ៊ុន EgyptAir បានឲ្យដឹងថា យន្តហោះដែលបានបាត់ពីប្រព័ន្ធរ៉ាដា គឺស្ថិតនៅរយៈកម្ពស់ ៣៧,០០០ហ្វីត ប្រហែល ១១,៥គីឡូម៉ែត្រ និងជាប្រភេទយន្តហោះ Airbus 320។

យន្តហោះ EgyptAir ជើងហោះហើរ Flight 804 ដែលបានបាត់នោះ គឺស្ថិតនៅពេលហោះឆ្លងកាត់សមុទ្រម៉េឌីទែរ៉ាណេ និងជាដែនអាកាសនៃប្រទេសអេហ្ស៊ីបប្រហែល១៦គីឡូម៉ែត្រ។

យោងតាមការចុះផ្សាយរបស់ Sky News ដោយដកស្រង់សំដីរបស់អ្នកនាំពាក្យក្រុមហ៊ុន EgyptAir បានឲ្យដឹងថា នៅលើយន្តហោះមានផ្ទុកមនុស្ស ៦៦នាក់ ក្នុងនោះមាន​អ្នក​ដំណើរ ៥៦នាក់ និងសហនាវិកចំនួន ១០នាក់ ដោយ​បាន​ហោះហើរចេញពីអាកាសយានដ្ឋាន Charles de Gaulle ក្នុងទីក្រុងប៉ារីស ប្រទេសបារាំង នៅម៉ោង ២៣៖០៩នាទី ទៅកាន់អាកាសយាន​ដ្ឋាន Cairo Airport ទីក្រុងគែ ប្រទេសអេហ្ស៊ីប៕