(ភ្នំពេញ)៖ លោក វ៉ន ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ (IDEA) បានចេញសេចក្តីបំភ្លឺមួយ ដោយបដិសេធព័ត៌មានថា សមាគមរបស់លោក បានបោះពុម្ពអាវយឺត​ពណ៌ខ្មៅ សម្រាប់ចែក ជូនអ្នកចូលរួមយុទ្ធនាការ «ថ្ងៃច័ន្ទពណ៌ខ្មៅ»។

លោក  វ៉ន ពៅ បានសម្តែងការសោកស្តាយចំពោះការសង្ស័យនេះ ហើយថា កាលពីថ្ងៃទី០៩ ខែឧសភា ឆ្នាំ២០១៦ ជាថ្ងៃដំបូងនៃយុទ្ធនាការថ្ងៃចន្ទពណ៌ខ្មៅ លោកបានសម្រាក​ពីការងារដោយ​មានបញ្ហាសុខភាព។

លិខិតលោក វ៉ន ពៅ បានបន្តថា «ដើម្បីកុំឲ្យមានការសង្ស័យបន្តទៀត សមាគមIDEA សូមបំភ្លឺជូនសាធារណជន ឲ្យបានជ្រាបថា សមាគមយើង ខ្ញុំ ជាសមាកមឯករាជ្យ និងធ្វើការ​តាមវិជ្ជាជីវៈ ក្នុងបុព្វហេតុបម្រើក្នុងវិស័យសេដ្ឋកិច្ចក្រៅប្រព័ន្ធ មិនបម្រើនិន្នាការគណបក្ស នយោបាយណាមួយនិងមិន ឲ្យគណបក្សនយោបាយណា​មួយយកសមាគមធ្វើ​ជាឈ្នាន់​នោះទេ»

សេចក្តីបំភ្លឺរបស់ សមាគមប្រជាធិបបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានធ្វើឡើងក្រោយពេលដែល អាជ្ញាធរ និងសមត្ថកិច្ច ហៅ លោក វ៉ន ពៅ ប្រធានសមាគមប្រជាធិបតេយ្យ​ឯករាជ្យ​នៃសេដ្ឋកិច្ចក្រៅ​ប្រព័ន្ធ ទៅសួរនាំកាលពីថ្ងៃទី១១ ខែឧសភា ឆ្នាំ២០១៦ នៅប៉ុស្តិ៍នគរបាលទឹកថ្លាខណ្ឌ សែន សុខ រាជធានីភ្នំពេញ ទាក់ទងនឹងព័ត៌មានថា សមាគមបានបោះពុម្ពអាវយឺត​ពណ៌ខ្មៅ​សម្រាប់ចែកជូនអ្នក​ចូលរួមយុទ្ធនាការ «ថ្ងៃចន្ទពណ៌ខ្មៅ» ៕