(បន្ទាយមានជ័យ)៖ កម្លាំងនគរបាលក្រុងសិរីសោភ័ណ ខេត្តបន្ទាយមានជ័យ បានឃាត់ខ្លួនក្រុមក្មេងស្ទាវភាគច្រើនជាសិស្សសាលា១៤នាក់ និងម៉ូតូ១១គ្រឿង ព្រោះពូកែជិះម៉ូតូបង្ហោះពេញផ្លូវ និងកែច្នៃបំពង់ស៊ីម៉ាំងឮខ្លាំងៗ បង្កឲ្យប្រជាពលរដ្ឋភិតភ័យ ដែលការឃាត់ខ្លួននេះធ្វើឡើងនៅម៉ោង៥ល្ងាចនៅថ្ងៃទី១០ ខែមិថុនា ឆ្នាំ២០២២។

លោកវរសេនីយ៍ឯក ស៊ី ឌី អធិការនគរបាលក្រុងសេរីសោភ័ណ បានប្រាប់ភ្នាក់ងារព័ត៌មាន Fresh News កាលពីថ្ងៃទី១២ ខែមិថុនា ឆ្នាំ២០២២ថា ក្រុមក្មេងស្ទាវទាំង១៤នាក់ ត្រូវបានកម្លាំងចម្រុះរួមមាន ជំនាញផ្នែកប្រឆាំង គ្រឿងញៀន, ផ្នែកព្រហ្មទណ្ឌ និងផ្នែកសណ្តាប់ធ្នាប់ នៃអធិការដ្ឋាននគរបាលក្រុងសិរីសោភ័ណ សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ទឹកថ្លា សង្កាត់កំពង់ស្វាយ និងសង្កាត់អូរអំបិល បង្ក្រាបនៅចំណុចភូមិសាស្ត្រ សង្កាត់ទឹកថ្លា, សង្កាត់អូរអំបិល និងសង្កាត់កំពង់ស្វាយ ដោយឃាត់បានអ្នកបង្ហោះម៉ូតូ២គ្រឿង ជិះពីក្រោយ២គ្រឿង, ជិះរេចុះឡើង១គ្រឿង, ស៊ីមាំងឮសម្លេងខ្លាំង៦គ្រឿង ក្នុងនោះមានម៉ូតូអត់ពន្ធចំនួន៣គ្រឿងផងដែរ។

លោក ស៊ី ឌី បានប្រាប់បន្តទៀតថា ក្រុមក្មេងស្ទាវទាំង១៤នាក់ រួមមាន៖

*ទី១៖ ឈ្មោះ ត្រាណ លីហ៊ាង អាយុ២០ឆ្នាំ មុខរបរជាងជួសជុលម៉ូតូនៅភូមិកណ្តាលឃុំសឹង្ហ រស់នៅភូមិនៅភូមិកណ្តាល ឃុំសឹង្ហ ស្រុកអូរជ្រៅ
*ទី២៖ ឈ្មោះ សាន សិទ្ធ អាយុ២៩ឆ្នាំ មុខរបរជាងសំណង់ រស់នៅផ្សារថ្មីសង្កាត់កំពង់ស្វាយ រស់នៅភូមិនៅភូមិពង្រ សង្កាត់កំពង់ស្វាយ ក្រុងសិរីសោភ័ណ
*ទី៣៖ ឈ្មោះ ផាត សុធី អាយុ១៩ឆ្នាំ មុខរបរកម្មករលីអីវ៉ាន់ខារ៉ាបៅ រស់នៅផ្លូវលេខ២ សង្កាត់កំពង់ស្វាយ រស់នៅភូមិនៅភូមិពង្រ សង្កាត់កំពង់ស្វាយ ក្រុងសិរីសោភ័ណ
*ទី៤៖ ឈ្មោះ ប្រុស ហេង អាយុ១៦ឆ្នាំ មុខរបរសិស្ស នៅវិទ្យាល័យអូរអំបិលសង្កាត់អូរអំបិល រស់នៅភូមិនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ
*ទី៥៖ ឈ្មោះ ប៉ុន សុភារ៉ា អាយុ១៦ឆ្នាំ មុខរបរសិស្ស នៅវិទ្យាល័យអូរអំបិលសង្កាត់អូរអំបិល រស់នៅភូមិនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ
*ទី៦៖ ឈ្មោះ វី សុខភួន អាយុ១៥ឆ្នាំ មុខរបរសិស្ស នៅវិទ្យាល័យអូរអំបិល សង្កាត់អូរអំបិល រស់នៅភូមិនៅភូមិគាប សង្កាត់ទឹកថ្លា ក្រុងសិរីសោភ័ណ
*ទី៧៖ ឈ្មោះ ទូច ចាន់នឿន អាយុ១៤ឆ្នាំ មុខរបរសិស្សនៅបឋមសិក្សាតាក់ហៅយ៉េ នៅភូមិទឹកថ្លា រស់នៅភូមិនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ
*ទី៨៖ ឈ្មោះ សុខ សេងលី អាយុ១៩ឆ្នាំ មុខរបរជាងជួសជុលម៉ូតូ នៅមុខរោងចក្រផ្លូវ៧មករា សង្កាត់កំពង់ស្វាយ រស់នៅភូមិនៅភូមិព្រៃឬស្សី សង្កាត់ព្រះពន្លា ក្រុងសិរីសោភ័ណ
*ទី១០៖ ឈ្មោះ ឌុច សីហាឡៃហាំង អាយុ១៨ឆ្នាំ មុខរបរសិស្ស នៅវិទ្យាល័យហ៊ុនសែនខ្លាកូន សង្កាត់កំពង់ស្វាយ បច្ចុប្បន្នរស់នៅភូមិបន្ទាយមានរឹទ្ធ ឃុំគោករមាត ស្រុកថ្មពួក
*ទី១១៖ ឈ្មោះ វេង វ័ន្ត អាយុ២២ឆ្នាំ មុខរបរកម្មកររោងការ នៅមុខមុខវត្តតាហ៊ី សង្កាត់កំពង់ស្វាយ រស់នៅភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ និងអ្នកជិះពីក្រោយ៣នាក់ទៀត។

លោកវរសេនីយ៍ឯក ស៊ី ឌី បានបញ្ជាក់ឲ្យដឹងបន្តទៀតថា ចំពោះក្មេងទំនើងទាំងនោះ នគរបាលឲ្យរត់ចំនួន២០ជុំដងទង់ជាតិ រួចធ្វើការអប់រំ ធ្វើកិច្ចសន្យាបញ្ឈប់មិនឲ្យប្រព្រឹត្តជាលើកទី២បន្តទៀត បើមិនរៀងចាលចាប់បានជាលើក ទី២ នឹងអនុវត្តតាមវិធានការរដ្ឋបាល។

បន្ទាប់មកសមត្ថកិច្ច បានកោះហៅឪពុកម្តាយ ឬអាណាព្យាបាលមកធានាយកទៅអប់រំបន្ត ហើយម៉ូតូដែលពាក់ព័ន្ធនឹងបំពង់ស៊ីម៉ាំងឮខ្លាំង តម្រូវឲ្យម្ចាស់ដាក់បំពង់ស៊ីម៉ាំងត្រូវតាមលក្ខណៈដើមវិញ ដោយឡែកម៉ូតូដែលអត់ពន្ធនោះ សមត្ថកិច្ចអនុវត្តតាមច្បាប់។

ជាមួយគ្នានេះ លោកអធិការនគរបាលក្រុង បានអំពាវនាវដល់ឪពុកម្តាយ ឬអាណាព្យាបាលមេត្តាណែនាំដល់កូនចៅ របស់ខ្លួនកុំឲ្យប្រព្រឹត្តនូវអំពើដែលសង្គមស្អប់ខ្ពើម ដូចជា ការបង្ហោះម៉ូតូ ជិះរេចុះឡើងពេញផ្លូវនេះ វាបង្កគ្រោះថ្នាក់ខ្លួនឯង និងអ្នកដទៃដែលប្រើប្រាស់ផ្លូវជាមួយ។ ចំពោះម៉ូតូកែច្នៃបំពង់ស៊ីម៉ាំងឮខ្លាំង វារំខានដល់អារម្មណ៍ និងការរស់នៅរបស់ប្រជាពលរដ្ឋជាខ្លាំង៕