(ក្រចេះ)៖ លោក វ៉ា ថន អភិបាលខេត្តក្រចេះ និង លោកស្រី ព្រមទាំងលោកស្នងការនគរបាលខេត្ត បានអញ្ជើញទៅបោះឆ្នោត ក្រុមប្រឹក្សាឃុំ សង្កាត់រួចហើយ នៅព្រឹកថ្ងៃទី៥ ខែមិថុនា ឆ្នាំ២០២២នេះ នៅវិទ្យាល័យសម្ដេចតេជោ ហ៊ុន ក្រុងក្រចេះ ស្ថិតក្នុងក្រុងក្រចេះ។
លោក អ៉ីវ សុផានី ប្រធានគណៈកម្មការរៀបចំការបោះឆ្នោតខេត្តក្រចេះ បានឲ្យដឹថា ខេត្តក្រចេះ មានអ្នកបោះឆ្នោតនៅក្នុងបញ្ជីបោះឆ្នោតផ្លូវការចំនួន ២១៨៧៧៦នាក់, ចំនួនការរិយាល័យបោះឆ្នោតសរុបមាន ៥៨៧ ការិយាល័យបោះឆ្នោត។ ចំពោះគណបក្សនយោបាយដែលបានចុះបញ្ជីបេក្ខជនឈរឈ្មោះបោះឆ្នោតសំរាប់ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ឆ្នាំ២០២២ មានចំនួន៧គណបក្ស។
គណបក្សទាំង៧រួមមាន៖ គណបក្សប្រជាជនកម្ពុជា, គណបក្សភ្លើងទៀន, គណបក្សហ៊្វុនស៊ុនប៉ិច,គណបក្សខ្មែររួបរួមជាតិ, គណបក្សខ្មែរស្រលាញ់ជាតិ,គណបក្សជនជាតិដើមប្រជាធិបតេយ្យកម្ពុជា និងគណបក្សយុវជនកម្ពុជា។
លោកបញ្ជាក់ទៀតថា រហូតដល់ម៉ោង៨និង៣០នាទីព្រឹកនេះការបោះឆ្នោតជ្រើសរើសក្រុមប្រឹក្សា ឃុំ សង្កាត់ទាំង៥៨៧ការិយាល័យ មិនទាន់មានបាតុភាពអ្វីកើតឡើងនោះទេ គឺដំណើរការល្អប្រសើរ តាមបច្ចេក និងបទបញ្ជារបស់ គ ជ ប។
ជាមួយគ្នានេះដែរគេសង្កេតឃើញ នៅតាមការិយាល័យរៀបចំការបោះឆ្នោតនិមួយៗ កំពុងតែមមាញឹកបំពេញការងាររបស់ខ្លួន ហើយប្រជាពលរដ្ឋកំពុងសម្រុកទៅចូលរួមបោះឆ្នោតយ៉ាងច្រើនកោះករករប្រកបដោយទឹកមុខរីករាយ៕
