(កោះកុង)៖ នៅថ្ងៃទី២ ខែឧសភា ឆ្នាំ២០២២នេះ អាជ្ញាធរស្រុកបុទុមសាគរ បានចាប់ផ្តើមប្រគល់វិញ្ញាបត្រសម្គាល់អចលនវត្ថុ ជូនដល់ប្រជាពលរដ្ឋចំនួន២ឃុំ ដែលរស់នៅក្នុងឃុំតានូន និងឃុំថ្មស ស្រុកបូទុមសាគរ ខេត្តកោះកុង ដោយអាជ្ញាធរស្រុកបូទុមសាគរ សហការជាមួយនឹងរដ្ឋបាលខេត្ត មន្ទីរជំនាញ ដើម្បីចុះទៅដល់មូលដ្ឋានខ្នងផ្ទះប្រជាពលរដ្ឋ ដែលពួកគាត់ទើបតែទទួលដោះស្រាយសំណងរបស់រាជរដ្ឋាភិបាល កាលពីពេលថ្មីៗកន្លងមក។
លោក ហាក់ ឡេង អភិបាលស្រុកបូទុមសាគរ បានឱ្យដឹងថា យន្តការផ្ដើមដល់វិញ្ញាបនបត្រសម្គាល់អចលនវត្ថុ ជូនប្រជាពលរដ្ឋដល់ក្នុងផ្ទះរបស់ពួកគាត់យ៉ាងដូច្នេះ ដោយសារតែទើបតែរដ្ឋាភិបាលបានប្រទានកម្ម និងចុះហត្ថលេខាពីអាជ្ញាធរខេត្ត និងមន្ទីរជំនាញ ជាពិសេសដើម្បីកាត់បន្ថយការចំណាយ និងលើកទឹកចិត្តដល់ប្រជាពលរដ្ឋ ហើយការប្រគល់វិញ្ញាបនបត្រវត្ថុ អាជ្ញាធរនិងមន្ត្រីជំនាញ មិនតម្រូវឱ្យចំណាយថវិកានោះទេ ដោយអាជ្ញាធរនិងមន្ត្រីជំនាញស្ម័គ្រចិត្តប្រគល់វិញ្ញាបនបត្រអចលនវត្ថុជូនពួកគាត់ដល់ដៃតែម្ដង។
សូមបញ្ជាក់ថា នៅក្នុងរយៈពេលប៉ុន្មានថ្ងៃនេះ ដោយមានការចង្អុលបង្ហាញអនុញ្ញាតពីលោកស្រី មិថុនា ភូថង អភិបាលខេត្ត និងលោក សុខ សុទ្ធី បានអញ្ជើញលោកអភិបាលគ្រប់ស្រុកក្រុង ជាសេនាធិការរបស់ខេត្ត ទទួលនូវវិញ្ញាបនបត្រអចនវត្ថុ ជាមួយមើលក្បាលដី ដើម្បីទទួលយកទៅដល់ជូនប្រជាពលរដ្ឋនៅតាមបណ្ដាស្រុក។
ក្នុងនោះ មានក្រុងខេមរភូមិន្ទ ស្រុកមណ្ឌលសីមា ស្រុកកោះកុង ស្រុកថ្មបាំង ស្រុកបុទុមសាគរ ស្រុកគីរីសាគរ និងស្រុកស្រែអំបិល ដើម្បីផ្ដល់ជូនប្រជាពលរដ្ឋ ដែលមានឈ្មោះជាកម្មសិទ្ធិគ្រប់គ្រងវិញ្ញាបនបត្រអចលនវត្ថុរបស់ប្រជាពលរដ្ឋ៕
