(ភ្នំពេញ)៖ អតីតមិត្តភក្តិរួមជំនាន់សាលាបាក់ទូក០១ក្រុម បានគោរពអញ្ជើញអតីតលោកគ្រូអ្នកគ្រូ មិត្តភក្តិរួមជំនាន់ រួមសាលាបាក់ទូកឆ្នាំ១៩៨០-១៩៨៩ ចូលរួមជួបជុំនិងពិសារអាហាររួមគ្នា នៅបញ្ជាការដ្ឋានកងរាជអាវុធហត្ថ រាជធានីភ្នំពេញ នាថ្ងៃទី២៨ ខែឧសភា ឆ្នាំ២០២២។
អតីតមិត្តភក្តិរួមជំនាន់សាលាបាក់ទូក ផ្តួចផ្តើមប្រមូលផ្តុំគ្នាឡើងដោយលោកឧត្តមសេនីយ៍ឯក រ័ត្ន ស្រ៊ាង ចាប់តាំងពីឆ្នាំ២០១៤ តាមរយៈចងក្រងក្រុមក្នុងបណ្តាញទំនាក់ទំនងសង្គម បន្ទាប់ពីលោកឧត្តមសេនីយ៍ឯក រ័ត្ន ស៊្រាង បានផ្លាស់ពីមេបញ្ជាការកងរាជអាវុធហត្ថខេត្តបន្ទាយមានជ័យ មកកាន់តំណែងជាមេបញ្ជាការកងរាជអាវុធហត្ថរាជធានីភ្នំពេញ ក្នុងគោលបំណងរំលឹកនូវអនុស្សាវរីយ៍ ដែលធ្លាប់មានជាមួយគ្នាក្នុងគ្រាកន្លងមក តាមដានសុខទុក្ខគ្នា ទៅវិញទៅមក និងជួយយកអាសារគ្នាក្នុងគ្រាមានអាសន្ន ហើយតែងតែប្រារព្ធពិធីជួបជុំគ្នា ជារៀងរាល់ឆ្នាំ និងបំពេញសកម្មភាពមនុស្សធម៌ ធ្វើពិធីរំលឹកគុណអតីតលោកគ្រូអ្នកគ្រូ កសាងសមិទ្ធផលនានាក្នុងសាលាបាក់ទូក និងជាពិសេសតែងតែរួមសាមគ្គីចែករំលែក ធនធានជួយគ្នាគ្រប់ពេលដែល លោកគ្រូ អ្នកគ្រូ និងមិត្តក្នុងក្រុម ជួបការលំបាក រហូតបង្កើតជាពាក្យស្លោកប្រចាំក្រុម ដែលមានខ្លឹមសារថា «សាមគ្គីមិត្តភាព បង្កើតចិត្តរមនា ចែករំលែកជួយគ្នា គ្រប់គ្រាលំបាក»។
តែដោយសារមានបញ្ហាជំងឺឆ្លងកូវីដ១៩ បានធ្វើឱ្យក្រុមមិត្តិរួមជំនាន់មួយនេះ អាកខានមិនបានជួបជុំគ្នាអស់ពេល២ឆ្នាំ។ ក្នុងរយៈពេល២ឆ្នាំ ដែលមិនបានជួបគ្នាផ្ទាល់ ម្នាក់ៗបានត្រឹមទំនាក់ទំនងដឹងសុខទុក្ខគ្នា តាមរយៈការជជែក ក្នុងក្រុមនៃបណ្តាញទំនាក់ទំនងសង្គម ហើយក្នុងអំឡុង២ឆ្នាំនេះផងដែរ មានមិត្តភក្តិ លោកគ្រូអ្នកគ្រូខ្លះ ជួបប្រទះការខ្វះខាត ជួបការឆ្លងជំងឺកូវីដ១៩ក្នុងគ្រួសារ តែមិត្តផ្សេងទៀតបានត្រឹមចូលរួម ពីចម្ងាយជាសម្ភារៈ ថ្នាំសង្កូវ និងថវិកាប៉ុណ្ណោះ។
ក្នុងឱកាសដែលមានវត្តមានរបស់អតីតលោកគ្រូអ្នកគ្រូនៃសាលាបាក់ទូក លោកឧកញ៉ា លោក លោកស្រី អតីតមិត្តរួមជំនាន់ រួមសាលាបាក់ទូកឆ្នាំ១៩៨០-១៩៨៩ លោកឧត្តមសេនីយ៍ឯក រ័ត្ន ស្រ៊ាង បានបានថ្លែងថា ការជួបជុំគ្នានៅថ្ងៃនេះ គឺជាសំណាង ដែលបានមកពីការដឹកនាំដ៏ឈ្លៀសវាងវៃ របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលសម្តេចមានទស្សនៈវិស័យវែងឆ្ងាយ ច្បាស់លាស់ ធ្វើឱ្យកម្ពុជាឆ្លងផុតពី គ្រោះមហន្តរាយនៃជំងឺឆ្លងកូវីដ១៩ យ៉ាងឆាប់រហ័ស ជាពិសេសនោះ គឺអរគុណសន្តិភាព ដែលផ្តើមចេញពីការយកជីវិតធ្វើដើមទុន របស់សម្តេចតេជោ ហ៊ុន សែន ឆ្ពោះទៅរកការរំដោះជាតិ ឱ្យរួចផុតពីរបបវាលពិឃាត។
មាននយោបាយឈ្នះឈ្នះ ដែលដាក់ចេញដោយសម្តេច បានរំលាយទាំងស្រុងនូវអង្គការចាត់តាំងនយោបាយនិងយោធាខ្មែរក្រហម នាំយកនូវសន្តិភាពពេញលេញ ជូនជាតិមាតុភូមិកម្ពុជា ក៏ដូចជាប្រជាជនខ្មែរទូទាំងប្រទេស មានការអភិវឌ្ឍន៍រីកចម្រើនលើគ្រប់វិស័យធ្វើឱ្យម្នាក់ៗ មានសិទ្ធិសេរីភាពពេញលេញ ទាំងការសិក្សា ការប្រកបរបរចិញ្ចឹមជីវិត ការគោរពនិងជឿលើជំនឿសាសនា ការធ្វើដំណើរកំសាន្តក្នុងនិងក្រៅប្រទេស ជាពិសេសគឺការជួបជុំដែលប្រកបដោយភាពស្និទ្ធិស្នាលនិងសប្បាយរីករាយ ដូចក្នុងថ្ងៃនេះ។
អតីតមិត្តភក្តិរួមជំនាន់សាលាបាក់ទូក បានមូលមតិគ្នារំលេចនូវផ្ទាំងប៉ាណូយ៉ាងធំ ក្រោមប្រធានបទ អរគុណសន្តិភាព សម្រាប់ថតទុកជាអនុស្សាវរីយ៍ អមដោយរូបថតសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងខ្លឹមសារ អរគុណ នយោបាយឈ្នះឈ្នះ (ទី១៖ ធានាសុវត្ថិភាពផ្លូវកាយ និងអាយុជីវិត, ទី២៖ ធានាកម្មសិទ្ធិ និងទ្រព្យសម្បត្តិ, ទី៣៖ ធានាអាជីព និងមុខរបរ) និងខ្លឹមសារ ដឹងគុណស្ថាបនិក មគ្គុទេសក៍ឯក និងប្រតិបត្តករ នយោបាយឈ្នះឈ្នះ ដែលបាននាំមកនូវសន្តិភាព និងការឯកភាពជាតិពេញលេញជូនកម្ពុជា។
ក្នុងកម្មវិធីជួបជុំនេះផងដែរ អតីតមិត្តភក្តិរួមជំនាន់មួយក្រុមនេះ បានរួមសាមគ្គីគ្នារៀបចំអំណោយ ជូនដល់អតីតលោកគ្រូអ្នកគ្រូ ចំនួន៤១នាក់ ដោយក្នុងម្នាក់ៗទទួលបានអំណោយ ទឹកសុទ្ធ ២កេស, មី០២កេស, ភេសជ្ជៈប៉ូវកម្លាំង២កេស, ត្រីខ២យួរ, ទឹកត្រីឆ្ងាញ់០១ដប ថវិកាចំនួន៨០ម៉ឺនរៀល ដែលក្នុងនោះមានថវិកា អ្នកគ្រូ វ៉ា អ៉ឹមឡេង បានជួយឧបត្ថម្ភ ២០ម៉ឺនរៀល ក្នុងម្នាក់ៗ និងអ្នកគ្រូ ឃុន សុខារី បានជួយឧបត្ថម្ភ ១០ម៉ឺនរៀលក្នុងម្នាក់ៗ៕
