(ភ្នំពេញ)៖ កីឡាករលោតទឹកជម្រើសជាតិអាមេរិក ដើមកំណើតខ្មែរ Jordan Pisey Windle ត្រូវបានលោក ស៊ុន ចាន់ថុល ទេស​រដ្ឋ​មន្ត្រី រដ្ឋ​មន្ត្រី​ក្រសួង​សាធារណ​ការ និង​ដឹកជញ្ជូន អនុញ្ញាតឲ្យចូលជួបសម្ដែងការគួរសម មុននឹងគេធ្វើដំណើរទៅសហរដ្ឋអាមេរិកវិញ ។ ជាមួយគ្នានោះ Jordan Pisey បានសន្យាជាមួយលោកទេសរដ្ឋមន្ដ្រីថា នឹងត្រឡប់មកជួយវិស័យកីឡាលោតទឹកកម្ពុជា និងចូលរួមប្រកួតលើឆាកអន្ដរជាតិ ក្នុង​នាម​តំណាង​ប្រទេស​ជាតិ​កម្ពុជា​ផង​ដែរ ។

យោងតាមប្រព័ន្ធទំនាក់ទំនងសង្គមរបស់ក្រសួងសាធារណការ និងដឹកជញ្ជូនបានឲ្យដឹងថា កាលពីម្សិលមិញនេះ លោក​ទេស​រដ្ឋ​មន្ដ្រី ស៊ុន ចាន់ថុល ដែលជាប្រធានសហព័ន្ធខ្មែរកីឡាហែលទឹក បានអនុញ្ញាតឲ្យកីឡាករកូនខ្មែរសញ្ជាតិអាមេរិក Jordan Pisey ចូលជួប និងសួរពីជីវៈប្រវត្តិ រួមទាំងការហ្វឹកហាត់ខ្លះៗរបស់អតីតកុមារកំព្រាមកពីខេត្តព្រៃវែងរូបនេះ ។

នៅក្នុងឱកាសនោះ លោកទេសរដ្ឋមន្ដ្រី បានស្នើសុំទៅលោក Jerry Windle ដែលជាឪពុកចិញ្ចឹមរបស់ Jordan Pisey ដើម្បី​ឲ្យ Jordan Pisey មក​ចូល​រួម​ជា​មួយ​ក្រុម​លោត​ទឹកជម្រើសជាតិកម្ពុជា សម្រាប់ចូលរួមប្រកួតតំណាងឲ្យប្រទេសកម្ពុជាលើឆាកអន្តរជាតិ ។ ជា​ការ​ឆ្លើយ​តប​ដោយ​ភាព​ត្រេក​អរ​ក្រៃ​លែង កីឡាករ Jordan Pisey បានសន្យាថា នឹងមកចូលរួមជាកីឡាករជម្រើសជាតិ លោតទឹករបស់កម្ពុជា នាថ្ងៃអនាគត ហើយ​បាន​ប្តេជ្ញា​ចិត្ត​ដណ្ដើម​យក​មេដាយ​ជូន​កម្ពុជា​ឲ្យ​ខាន​តែបានទៀតផង ។

ក្រោយទទួលបានការសន្យាបែបនេះ លោក ស៊ុន ចាន់ថុល បានសម្ដែងការស្វាគមន៍យ៉ាងកក់ក្ដៅ ចំពោះវត្តមានរបស់ Jordan Pisey ព្រោះ​គេ​ជា​ជន​ជាតិ​ខ្មែរ ។ លោកសង្ឃឹមថា ប្រសិន​បើ Jordan Pisey Windle ចូល​រួម​ជា​ក្រុមជម្រើសជាតិលោកទឹកកម្ពុជាមុន SEA Games ឆ្នាំ២០១៧ នៅម៉ាឡេស៊ីមកដល់ នោះ​កម្ពុជា​នឹង​មាន​សង្ឃឹម​ខ្ពស់ក្នុងការដណ្ដើមបានមេដាយលើវិញ្ញាសាលោតទឹកនេះ ។

គួរបញ្ជាក់ផងដែរថា Jordan Pisey ជាកុមារកំព្រាមានស្រុកកំណើតនៅខេត្តព្រៃវែង ហើយមានវាសនាទៅរស់នៅអាមេរិកតាំងពីអាយុ ២​ឆ្នាំ ក្រោម​ការ​ចិញ្ចឹមបីបាច់ថែរក្សាដោយបុរសជនជាតិអាមេរិកលោក Jerry Windle ។ ប៉ុន្ដែឥឡូវគេបានវិវត្តន៍ខ្លួនក្លាយជាកីឡាករលោតទឹកជម្រើស​ជាតិ​អាមេរិក ហើយ​គេ​ក៏​កំពុង​ហ្វឹក​ហាត់​ត្រៀមចូលរួមប្រកួតកីឡាអូឡាំពិក ទីក្រុងរីយ៉ូ ប្រទេសប្រេស៊ីល នាខែសីហា ឆ្នាំ២០១៦ ខាងមុខនេះផងដែរ ៕