(ភ្នំពេញ)៖ សមាជិករណសិរ្ស​រំដោះជាតិ​ខ្មែរ​មួយ​រូប​ ​ដែល​ជា​ចលនា​ខុស​ច្បាប់​បង្កើត​ឡើង ​ដើម្បី​​ប្រឆាំង​នឹង​រាជរដ្ឋាភិបាល​ស្រប​ច្បាប់​នៃ​កម្ពុជា​ ត្រូវ​បាន​លោក​ ប៉ុល​ សំអឿន​ ប្រធាន​ក្រុម​ប្រឹក្សា​ជំនុំជម្រះ​សាលាឧទ្ធរណ៍​ សម្រេចនៅថ្ងៃទី​១៧​ ខែ​ឧសភា​ ឆ្នាំ​២០១៦​ តម្កល់​សាលក្រម​សាលា​ដំបូង​រាជធានី​ភ្នំពេញ​ ទុក​ជា​បាន​ការ​ដដែល​ ពោល​គឺ​ជនជាប់ចោទ​ត្រូវ​ជាប់​ពន្ធនាគារ​៧ឆ្នាំ​។

លោក​ចៅក្រម​ ប៉ុល​ សំអឿន​ ថ្លែង​ថា​ មូល​ហេតុ​នៃ​ការ​សម្រេច​តម្កល់​សាលក្រម​នេះ​ គឺ​ដោយសារ​បទល្មើស​នេះ ​មាន​លក្ខណៈ​ធ្ងន់ធ្ងរ​ និង​ ការ​សម្រេច​ដាក់​គុក​៧ឆ្នាំ​ មាន​លក្ខណៈ​សមរម្យ​ហើយ​។

ជនជាប់ចោទ​ឈ្មោះ​ ហ៊ិ​ន ចាន់​ អាយុ​៣៤ឆ្នាំ​ ជាប់​ចោទ​​ពី​បទ​រួម​គំនិត​ក្បត់​ជាតិ​ និង​ក្លែង​ឯកសារ​សាធារណៈ​ ពាក់ព័ន្ធ​លិខិត​ឆ្លងដែន​។

មន្រ្តី​សាលាឧទ្ធរណ៍​ថ្លែង​ថា​ ជនជាប់ចោទ​ឈ្មោះ​ ហ៊ិ​ន ចាន់​ ត្រូវ​បាន​សាលា​ដំបូង​រាជធានី​ភ្នំពេញ​ ផ្តន្ទា​ទោស​ដាក់​ពន្ធនាគារ​រយៈពេល​៧ឆ្នាំ​ ប្រព្រឹត្តិនៅក្នុងប្រទេសកម្ពុជា កាលពី​អំឡុង​ឆ្នាំ ២០១២ រហូតដល់​ឆ្នាំ ខែឧសភា ឆ្នាំ ២០១៤។​ ប៉ុន្តែ​ជនជាប់ចោទ​បាន​ប្តឹង​មក​សាលាឧទ្ធរណ៍​។

ក្នុង​សវនាការ​សាលាឧទ្ធរណ៍​ ជនជាប់ចោទ​បាន​សារភាព​ថា​ ពិត​ជា​បាន​ចូលរួម​ចលនា​ប្រឆាំង​រាជរដ្ឋាភិបាល​ ប្រាកដ​មែន​។ ជនជាប់ចោទ​បញ្ជាក់​ថា​ ខ្លួន​ដឹង​កំហុស​ហើយ​ សូម​ឲ្យ​សាលាឧទ្ធរណ៍​ជួយ​បន្ធូរបន្ថយ​ទោស​។ ដោយ​ឡែក​បទ​ក្លែង​ឯកសារ​សាធារណៈ​ ជនជាប់ចោទ​ស្នើ​ឲ្យ​សាលាឧទ្ធរណ៍​ទម្លាក់​ការ​ចោទប្រកាន់​៕