(ពោធិ៍សាត់​)៖​ លោក​ឧត្តម​សេនីយ៍​ទោ​ សារុន​ ចាន់ធី ស្នងការនគរបាលខេត្តពោធិ៍សាត់​ នៅព្រឹកថ្ងៃទី១៦​ ខែឧសភា​ ឆ្នាំ២០១៦នេះ​ បានចេញមុខបកស្រាយបញ្ជាក់ជុំវិញការចោទប្រកាន់ថា កម្លាំងនគរបាលរបស់លោក ដោះលែងក្រុមចោរលួចក្របីរបស់ប្រជាពលរដ្ឋ ជាថ្នូរនឹងទឹកប្រាក់៥ពាន់ដុល្លារ។

​លោកស្នងការបានបញ្ជាក់ថា កាលពីថ្ងៃទី០៦​ ខែឧសភា​ មានប្រជាពលរដ្ខ៥គ្រួសារ​ បាត់ក្របី​ចំនួន​៩ក្បាល ដល់ថ្ងៃទី០៧​ខែឧសភា​ កម្លាំងនគរបាលស្រុកបាកាន​ បានឃាត់រថយន្ត២គ្រឿង​ នៅចំណុចព្រំប្រទល់ស្រុកកណ្តៀង​ និងស្រុកបាកាន នៅភូមិអំពិលកញ្ច្រិណ​ ឃុំកោះជុំ ក៏បានរាយការណ៍ជូនព្រះរាជអាជ្ញា តន់ សីហតេជៈ ហើយលោកព្រះរាជអាជ្ញា បានបញ្ជាឲ្យឃាត់យកមកដាក់នៅប៉ុស្តិ៍ស្នាមព្រះ​ រួចជូនដំណឹងទៅតាមបណ្តាស្រុក​ ឲ្យប្រាប់ប្រជាពលរដ្ឋណាដែល បានបាត់ក្របីឲ្យមកមើល​។​

លោកស្នងការបានឲ្យដឹងថា ប្រជាពលរដ្ឋ០៥គ្រួសារ​ បានមកបញ្ជាក់ថា​ ក្របីទាំងអស់នេះជារបស់ពួកគាត់ រួចព្រះរាជអាជ្ញាបានសម្រេចប្រគល់ក្របីឲ្យគេវិញ ហើយក៏ឲ្យឃាត់ម្ចាស់រថយន្ត​០២នាក់។​ បន្ទាប់មកព្រះរាជអាជ្ញាបានឲ្យឪពុកម្តាយម្ចាស់រថយន្តទាំង២​ មកធានាត្រលប់ទៅមូលដ្ឋានវិញ​។

លោកស្នងការបញ្ជាក់ទៀតថា បន្ទាប់មកទៀតសមត្ថកិច្ច បានស្រាវជ្រាវកំណត់មុខសញ្ញា​០៤នាក់​ ក្នុងនោះកម្លាំងនគរបាល បានបញ្ជូនសំណុំរឿងទៅតុលាការហើយ ដើម្បីសុំដីការ​ ចាប់ខ្លួនអ្នកទាំង០៤នាក់ និងកំពុងស្វែងរកការចាប់ខ្លួន។ ចំពោះករណីចោទប្រកាន់ថា កម្លាំងនគរបាលខេត្តពោធិ៍សាត់ យកលុយ៥ពាន់ដុល្លារ​ ដោះស្រាយក្រៅប្រព័ន្ធតុលាការនោះ គឺសមត្ថកិច្ចពុំមានការពាក់ព័ន្ធឡើយ​៕