(ភ្នំពេញ)៖ ព្រះអង្គម្ចាស់ នរោត្តម ចក្រាវុធ ព្រះប្រធានគណបក្សហ៊្វុនស៊ិនប៉ិច ព្រមទាំងថ្នាក់ដឹកនាំ និងសមាជិក សមាជិកា ផ្ញើសារលិខិត ចូលរួមរំលែកទុក្ខយ៉ាងក្រៀមក្រំបំផុត ចំពោះមរណភាពរបស់ ឯកឧត្តមព្រឹទ្ធាចារ្យ ហ៊ុន ណេង សមាជិកគណៈកម្មាធិការអចិន្ត្រៃយ៍រដ្ឋសភា និងជាតំណាងរាស្ត្រមណ្ឌលខេត្តកំពង់ចាម ដែលបានទទួលអនិច្ចកម្ម ដោយរោគាពាធ នៅម៉ោង៦៖២៥នាទីល្ងាច ថ្ងៃទី០៥ ខែឧសភា ឆ្នាំ២០២២ ក្នុងជន្មាយុ៧២ឆ្នាំ។
តាមរយៈសារលិខិតរំលែកមរណទុក្ខ ព្រះអង្គម្ចាស់ នរោត្តម ចក្រាវុធ មានបន្ទូលយ៉ាងដូច្នេះថា៖ «ខ្ញុំ ព្រមទាំងថ្នាក់ដឹកនាំ និងសមាជិក សមាជិកា នៃគណបក្សហ៊្វុនស៊ិនប៉ិច មានហឬទ័យ និងអារម្មណ៍រន្ធត់ក្តុកក្តួល និងសោកសង្រេងយ៉ាងក្រៃលែង ដោយបានទទួលព័ត៌មានដ៏សែនក្រៀមក្រំ ស្តីពីមរណភាពរបស់ ឯកឧត្តម ហ៊ុន ណេង សមាជិកអចិន្ត្រៃយ៍រដ្ឋសភា ប្រធានគណៈកម្មការទី៤ នៃរដ្ឋសភា និងជាអ្នកតំណាងរាស្ត្រមណ្ឌលកំពង់ចាម ដែលត្រូវជាស្វាមី បង បងថ្លៃ ឪពុក ឪពុកក្មេក ជីតា ជីតាទួត កាលពីថ្ងៃទី៥ ខែឧសភា ឆ្នាំ២០២២ វេលាម៉ោង៦:២៥នាទីល្ងាច ក្នុងជន្មាយុ៧២ឆ្នាំ ដោយរោគាពាធ»។
«មរណភាពរបស់ ឯកឧត្តម ហ៊ុន ណេង គឺជាការបាត់បង់នូវឥស្សរជនស្នេហាជាតិដ៏ខ្ពង់ខ្ពស់ប្រកបដោយព្រហ្មវិហារធម៌ល្អប្រពៃមួយរូប ដែលបានខិតខំអស់ពីសមត្ថភាព និងលទ្ធភាពក្នុងការបំពេញតួនាទីជាច្រើនវិស័យជូនជាតិមាតុភូមិកម្ពុជា ក្រោមបាវចនា ជាតិ សាសនា ព្រះមហាក្សត្រ ដោយទទួលបានលទ្ធផលគួរជាទីមោទនភាពជាតិយ៉ាងក្រៃលែង និងជាការបាត់បង់នូវស្វាមី បង បងថ្លៃ ឪពុក ឪពុកក្មេក ជីតា ជីតាទួត ជាទីគោរពស្រឡាញ់ស្មើជីវិត និងប្រកបដោយព្រហ្ម វិហារធម៌ថ្លៃថ្លាសម្រាប់ភរិយា បង ប្អូន កូន ចៅ និងសាច់ញាតិជិតឆ្ងាយទាំងអស់»។
ក្នុងឱកាសដ៏សោកសៅនេះ យើងខ្ញុំសូមសំដែងនូវសមានទុក្ខ និងការសោកស្តាយឥតឧបមាជាមួយលោកជំទាវ និង ក្រុមគ្រួសារទាំងអស់នៃសព និងសូមធ្វើគារវកិច្ចដោយក្តីក្រៀមក្រំបំផុត ចំពោះវិញ្ញាណក្ខន្ធ ឯកឧត្តម ហ៊ុន ណេង និងសូមឧទ្ទិសដល់វិញ្ញាណក្ខន្ធ ឯកឧត្តម ហ៊ុន ណេង សូមបានទៅសោយសុខក្នុងសុគតិភពកុំបីឃ្លៀងឃ្លាតឡើយ។
សូមបញ្ជាក់ថា៖ សពរបស់ ឯកឧត្តម ហ៊ុន ណេង ត្រូវតម្កល់ធ្វើបុណ្យនៅគេហដ្ឋាន ភូមិទី៧ សង្កាត់កំពង់ចាម ក្រុងកំពង់ចាម ខេត្តកំពង់ចាម ទៅតាមប្រពៃណីព្រះពុទ្ធសាសនា ហើយនៅថ្ងៃចន្ទ ៩កើត ខែពិសាខ ឆ្នាំខាល ចត្វាស័ក ព.ស. ២៥៦៥ ត្រូវនឹងថ្ងៃទី៩ ខែឧសភា ឆ្នាំ២០២២ សពឯកឧត្តម ហ៊ុន ណេង នឹងត្រូវដង្ហែទៅបញ្ចុះនៅវត្តសុវណ្ណគិរីរតនៈ ភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម៕
