(ស្វាយរៀង)៖ គ្រោះថ្នាក់ចរាចរណ៍មួយបានសម្លាប់គោ៧ក្បាលភ្លាមៗនៅកន្លែងកើតហេតុ ដោយសាររថយន្តមួយគ្រឿងបើកបរក្នុងល្បឿនយ៉ាងលឿនបុករះ កាលពីវេលាម៉ោង៣៖៣៥នាទីរសៀលថ្ងៃទី២៩ ខែមេសា ឆ្នាំ២០២២ លើផ្លូវជាតិលេខ១ គីឡូម៉ែត្រលេ១២៧ និង១២៨ ស្ថិតក្នុងភូមិបាក់រនាស់ សង្កាត់សង្ឃ័រ ក្រុងស្វាយរៀង។
សមត្ថកិច្ចនគរបាលក្រុងស្វាយរៀង បានឱ្យដឹងថា អ្នកបើករថយន្តមានឈ្មោះ សេង វិទ្យា អាយុ២៩ឆ្នាំ មុខរបរបើកបររស់នៅភូមិរកា ឃុំដូនស ស្រុកស្វាយជ្រំ ខេត្តស្វាយរៀង រថយន្តខូចខាតធ្ងន់។ ចំណែកសត្វគោចំនួន៧ក្បាលបានងាប់ភ្លាមៗ នៅនឹងកន្លែងកើតុហេតុ ប៉ុន្តែមិនមានអ្នកណាម្នាក់ចេញមុខដោះស្រាយថាជាម្ចាស់សត្វគោនោះទេ។
បើតាមសាក្សីបានឱ្យដឹងថា នៅមុនពេលកើតហេតុមានរថយន្តមួយគ្រឿងម៉ាក HYUNDAI ពណ៌លឿងខ្ចី-ប្រផេះ ពាក់ស្លាកលេខភ្នំពេញ 3E-5328 បើកបរពីកើតទៅលិច លើផ្លូវជាតិលេខ១ ខណៈនោះស្រាប់តែមានសត្វគោចំនួន ៧ក្បាល បានដើរឆ្លងផ្លូវពីជើងទៅត្បូង ក៏ត្រូវរថយន្តបុកពេញទំហឹងលាន់ដូចរន្ទះបង្កការភ្ញាក់ផ្អើលដល់អ្នកភូមិ និងអ្នកធ្វើដំណើរតែម្ដង។
សមត្ថកិច្ចបានបញ្ជាក់ថា ចំពោះម្ចាស់រថយន្តមិនមានរងរបួសនោះទេ ប៉ុន្តែរថយន្តខូចខាតទាំងស្រុងផ្នែកខាងមុខដោយមិនមានអ្នកណាម្នាក់អះអាងជាម្ចាស់គោនោះទ្បើយ៕
