(កំពង់ចាម)៖ លោក អ៊ុន ចាន់ដា អភិបាលខេត្តកំពង់ចាម បានឱ្យដឹងថា គិតរហូតមកឆ្នាំ២០២២នេះ ខេត្តកំពង់ចាម មានបណ្តាញអគ្គិសនី បានតភ្ជាប់បណ្តាញអគ្គិសនីប្រើប្រាស់ ចំនួន ៩១៤ភូមិ លើ៩២៣ភូមិ ស្មើនឹង ៩៩.០២% ដែលមានប្រជាពលរដ្ឋប្រើប្រាស់ចំនួន ២០១,៣៣៧ខ្នងផ្ទះ។ ចំណែកវិស័យទឹកស្អាត ក្នុងខេត្តមានវិសាលភាពគ្របដណ្តប់នៅទូទាំងខេត្តបានចំនួន ១០៧ឃុំ លើ១០៩ ឃុំ-សង្កាត់ ស្មើនឹង ៩៨.១៦% និងភូមិចំនួន ៨៧០ភូមិ លើ ៩២៣ភូមិ ស្មើនឹង ៩៤.២៥%។
ការឱ្យដឹងបែបនេះរបស់លោក អ៊ុន ចាន់ដា បានធ្វើឡើងក្នុងពេលចូលរួម ពិធីបុណ្យឆ្លងសាលាធម្មសភា និងសមិទ្ធផលនានា នៅវត្តត្រពាំងអំពិល ឃុំជ្រៃវៀន ស្រុកព្រៃឈរ ក្រោមអធិបតីភាពលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក នៅព្រឹកថ្ងៃទី២៩ ខែមេសា ឆ្នាំ២០២២នេះ។
លោកអភិបាលខេត្ត បានថ្លែងថា រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិត និងឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានធ្វើឱ្យប្រទេសជាតិទទួលបានសុខសន្តិភាពយ៉ាងពេញលេញ មានស្ថេរភាពនយោបាយ និងមានការអភិវឌ្ឍន៍រីកចម្រើនលើគ្រប់វិស័យ ទាំងផ្នែកពុទ្ធចក្រ និងអាណាចក្រ។
ជាមួយគ្នានេះលោក អ៊ុន ចាន់ដា បានបន្តថា ក្នុងអំឡុងពេលជាងពីរទសវត្សរ៍កន្លងមកនេះ រាជរដ្ឋាភិបាល បានដាក់ចេញនូវគោលនយោបាយអភិវឌ្ឍន៍ប្រកបដោយចីរភាព និងយុទ្ធសាស្ត្រចតុកោណដំណាក់កាលទី៤ ខេត្តកំពង់ចាម បាននឹងកំពុងមានការរីកចម្រើន និងប្រែប្រួលមុខមាត់ជាបន្តបន្ទាប់ ទាំងផ្នែកសន្តិសុខ សណ្តាប់ធ្នាប់សាធារណៈ សេដ្ឋកិច្ច សង្គមកិច្ច បរិស្ថាន និងសមិទ្ធផលរូបវ័ន្តជាច្រើន ពិសេសជីវភាពរស់នៅរបស់ប្រជាពលរដ្ឋកាន់តែ បានលើកកម្ពស់ពីមួយថ្ងៃទៅមួយថ្ងៃ តាមរយៈការទទួលបាននូវសមិទ្ធផលនានាពីរាជរដ្ឋាភិបាលកម្ពុជា ដៃគូអភិវឌ្ឍន៍ អង្គការសង្គមស៊ីវិល វិស័យឯកជន សប្បុរសជននានា។
លោកបានបញ្ជាក់ថា «សមិទ្ធផលទាំងនោះហើយបាននឹងកំពុង ជួយដល់ប្រជាពលរដ្ឋក្នុងការកាត់បន្ថយភាពក្រីក្រ ជាបន្តបន្ទាប់ ស្របតាមគោលនយោបាយរបស់រាជរដ្ឋាភិបាលកម្ពុជា ផ្តើមចេញពីកត្តានេះធ្វើឱ្យបងប្អូន ប្រជាពលរដ្ឋ មានឱកាសគ្រប់គ្រាន់ក្នុងការប្រតិបត្តិជំនឿសាសនា និងមានឱកាសចូលរួមបរិច្ចាកនូវធនធានផ្ទាល់ខ្លួនចូលរួមកសាង និងអភិវឌ្ឍន៍វិស័យពុទ្ធសាសនាឱ្យមានការរីកចម្រើន ស្របតាមការអភិវឌ្ឍន៍នៃសង្គមជាតិផងដែរ»។
រដ្ឋធម្មនុញ្ញបានតម្កល់ព្រះពុទ្ធសាសនា ជាសាសនារបស់រដ្ឋ ព្រមជាមួយនឹងការផ្តល់សិទ្ធិសេរីភាពពេញលេញក្នុងជំនឿសាសនា ជូនប្រជាពលរដ្ឋគ្រប់រូប ដែលនាពេលបច្ចុប្បន្ននេះខេត្តកំពង់ចាម មានប្រជាពលរដ្ឋចំនួន៩៧.៦% កំពុងប្រតិបត្តិតាមគន្លងព្រះពុទ្ធសាសនា ហើយខេត្តមាន ៣៧៨វត្ត (ធម្មយុត្តិ ១២វត្ត) និងមានព្រះសង្ឃសរុប ៥,៨០១អង្គ (ធម្មយុត្តិ ១៦៤អង្គ)។ ដោយឡែកនៅក្នុងស្រុកព្រៃឈរ មានវត្តចំនួន ៥៨វត្ត មានព្រះសង្ឃសរុប ៧៦៩អង្គ (ភិក្ខុចំនួន ១៩៦អង្គ និងសាមណេរ ៥៧៣អង្គ)។
លោក អ៊ុន ចាន់ដា បានគូសបញ្ជាក់ថា ទន្ទឹមនឹងនេះវិស័យកសិកម្មនៅក្នុងខេត្តកំពង់ចាម ក៏កំពុងមានការប្រែប្រួលតាមរយៈការយល់ដឹងការប្រែប្រួលទម្លាប់អន់ថយ ការផលិតសម្រាប់តែផ្គត់ផ្គង់គ្រួសារទៅជាការផលិត សម្រាប់បម្រើឱ្យការនាំចេញ។ យើងកត់សម្គាល់ឃើញថា ប្រជាពលរដ្ឋចេះប្រើប្រាស់ពូជ ជី ថ្នាំសម្លាប់សត្វល្អិត ការធ្វើស្រូវមួយឆ្នាំ២ ទៅ៣ដង ផលិតកម្មកសិកម្មភាគច្រើនប្រើប្រាស់គ្រឿងចក្រកសិកម្ម។
បច្ចុប្បន្នការវិនិយោគលើវិស័យកសិកម្ម កំពុងមានសកម្មភាពយ៉ាងសកម្មពីសំណាក់វិស័យឯកជន ជាពិសេសដំណាំស្រូវ កៅស៊ូ ចេក ជាដើម៕
